ءوزىنىڭ جاڭا جاسىن الماتىنىڭ باس مەرەكەسىمەن بىرگە اتاپ ءوتىپ جاتقان ليۋبوۆ كورچەنكو – ەكى عاسىردىڭ تاريحي وقيعالارىنىڭ كۋاگەرى. كەيۋانا الىپ شاھارعا 13 جاسىندا قونىس اۋدارعان. مىڭ جىلدان استام تاريحى بار الىپ شاھار ادام تانىماستاي كەڭەيىپ، كەمەلدەنە تۇسكەن. ون عاسىر بۇرىنعى المالۋ مەن قازىرگى الماتىمىزدىڭ سىرتقى كەلبەتىندە جەر مەن كوكتەي ايىرماشىلىق بار ەكەنى انىق دەيدى. 

ليۋبوۆ كورچەنكو – قالاداعى قارت انالاردىڭ ءبىرى. كەيۋانا الىپ شاھاردىڭ تۋعان كۇنىندە ءوزىنىڭ 101 جاسىن اتاپ وتۋدە. ول ارۋ قالا – الماتىدا 13 جاسىنان بەرى تۇرىپ كەلەدى. اتا-اناسىنان ەرتە ايىرىلعان ليۋبوۆ اجەي ەڭبەككە ەرتە ارالاسقان. 40 جىلدان استام ۋاقىت قالانىڭ باس پوچتاسىندا قىزمەت ەتىپتى. ەڭ سۇيىكتى دەمالىس ورنى – 28 گۆاردياشى-پانفيلوۆشىلار ساياباعى بولعان. سۇيىكتى جارىن دا سول ورىندا كەزدەستىرىپتى.

«الماتىنىڭ تابيعاتى ەرەكشە. ول كەزدەرى قالادا تۇرعىندار از بولاتىن. كولىك تە بىرەن-ساران ەدى. كوبىنەسە جاياۋ جۇرەتىنبىز. مادەني وشاقتار قۇرىلىسى قالاي جۇرگەنى ەسىمدە. اباي اتىنداعى وپەرا جانە بالەت تەاترى جۇمىس ورنىما جاقىن ورنالاسقان ەدى. ودان بولەك، لەرمونتوۆ دراما تەاترى جۇمىس ىستەيتىن»، – دەيدى ليۋبوۆ كورچەنكو.

كەيۋانا جۇمىستان كەيىن ارىپتەستەرىمەن تاۋعا ءجيى بارعان. ول جەردە جەمىس-جيدەكتىڭ ءتۇر-تۇرى سامساپ تۇراتىن دەپ ەسكە الادى. ال ۋاقىتىن وتباسىمەن مەدەۋ مۇز ايدىنىندا وتكىزگەندى ۇناتقان.  

«كونكيمەن سىرعاناعاندى جاقسى كورەتىن ەدىك. قىس مەزىگىلىندە مۇز ايدىنىنان شىقپايتىنبىز. كوبىنەسە قالانى جاياۋ ارالايتىنبىز. ول ۋاقىتتا ءزاۋلىم عيماراتتار سيرەك كەزدەسەتىن. ال قازىرگى قالا كەلبەتى ادام تانىماستاي وزگەرگەن. بيىك، اسەم نىساندار وتە كوپ»، – دەيدى گەنناديي كورچەنكو.

ءبىر عاسىر عۇمىر كەشكەن قارت انا ۇزاق جاساۋىنىڭ سىرىن ەڭبەكپەن بايلانىستىرادى. سەكسەننىڭ سەڭگىرىنە جەتكەن ۇلى گەنناديي جاس كەزىنەن سالاۋاتتى ءومىر سالتىن ۇستانعان. قازىرگى تاڭدا الماتىدا ورتاشا ءومىر ءسۇرۋ جاسى – 75،9 جاس. بۇل ەلىمىز بويىنشا جاقسى كورسەتكىشتەردىڭ ءبىرى. بيىل مەگاپوليستە «بەلسەندى ۇزاق ءومىر» جول كارتاسى جاسالعان. ونىڭ ماقساتى – ەگدە جاستاعى ازاماتتاردى بەلسەندى ومىرگە تارتۋ، ولاردىڭ الەۋەتىن پايدالانىپ، ۇرپاقتار ساباقتاستىعىن قامتاماسىز ەتۋ.

«جوبانى جۇزەگە اسىرۋ بارىسىندا «بەلسەندى ۇزاق ءومىر» ورتالىعى قۇرىلدى. ودان بولەك، جول كارتاسى اياسىندا دەنە شىنىقتىرۋ جانە سپورت باسقارماسىمەن بىرگە الەۋمەتتىك جوبا جاسالدى. قاريالارعا فيتنەس-كلۋبتارعا تەگىن جولداما بەرىلدى. سونىمەن قاتار، تۋريزم باسقارماسىمەن زەينەتكەرلەرگە قالانىڭ كورىكتى جەرلەرىن ارالاۋعا مۇمكىندىك جاسالدى»، – دەدى الماتى قالاسى جۇمىسپەن قامتۋ جانە الەۋمەتتىك باعدارلامالار باسقارماسى مۇگەدەكتەرمەن جانە ارداگەرلەرمەن جۇمىس ءبولىمىنىڭ باسشىسى لاۋرا ابجانوۆا.

قالادا «بەلسەندى ۇزاق ءومىر» ورتالىعىنان بولەك، الەۋمەتتىك 55 كلۋب جۇمىس ىستەيدى. جول كارتاسى اياسىندا 5 مىڭ ەگدە جاستاعى ازاماتتاردى قامتۋ كوزدەلگەن. قازىرگى تاڭدا وعان قاتىسۋشىلار قاتارى 6 مىڭعا جەتكەن. بۇگىندە الىپ شاھاردا 223 مىڭ زەينەتكەر تۇرادى. بۇل قالا تۇرعىندارىنىڭ 12،5 پايىزى.