الماتىدا كوشەلەر ويىلىپ، قانداي دا ءبىر اقاۋ شىقسا، مەردىگەرلەر ونى 10 كۇن ىشىندە جوندەۋى ءتيىس. بۇدان بىلاي قالادا اعىمداعى جوندەۋ جۇمىستارى مەملەكەتتىك-جەكەمەنشىك ارىپتەستىك اياسىندا جۇرگىزىلەدى. بۇل ءۇشىن قالا بيۋدجەتىنەن 5 ملرد تەڭگەدەن استام قارجى بولىنەدى. جوبا ءماسليحاتتىڭ كەزەكتى سەسسياسىندا ماقۇلداندى.
جاڭا جۇيەگە سايكەس، 4 مەردىگەر كومپانيامەن 5 جىلعا كەلىسىم-شارت جاسالادى. ءار مەردىگەردىڭ موينىنا قالانىڭ قوس اۋدانىنداعى تاس جول جۇكتەلەدى. ياعني، تۇرعىندار كوشە جولدارىنىڭ تەسىلگەنىن بايقاسا، بىردەن سۋرەتكە ءتۇسىرىپ، قالا اكىمدىگىنە جولداي الادى. جاۋاپتى باسقارما ول اقاۋدى جوندەۋ ءۇشىن كەلىسىم-شارتقا وتىرعان مەردىگەر ۇيىمعا سول مەكەنجايدى جىبەرەدى. ال جول جوندەۋشىلەر شاعىم تۇسكەن بويدا ول جەردى دەرەۋ تاقتايداي تەگىس ەتۋى ءتيىس.
«مىسالى، الماتى قالاسىنىڭ تۇرعىنى كەلە جاتقان كەزدە جولدا بەلگىلى ءبىر اقاۋدى كورگەن جاعدايدا، ينستاگراممعا ءتۇسىرىپ جىبەرۋى مۇمكىن. بىزدە الەۋمەتتىك جەلىلەرگە مونيتورينگ جاسايتىن ارنايى ءبولىم بار. سول بولىمدەر بىزگە جىبەرەدى. ونى العان كۇننەن باستاپ ءبىز دەرەۋ مەردىگەرلەرگە جولدايمىز. مەردىگەرلەر، ارينە، سول اقاۋدى الىپ تاستاپ جوندەۋگە كىرىسەدى. جوندەۋ ءۇشىن ءبىزدىڭ كەلىسىم-شارت بويىنشا 10 جۇمىس كۇنى بەرىلەدى»، – دەدى الماتى قالاسى جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى قانات بايقوڭىروۆ.
ەگەر مەردىگەرلەر 10 كۇن ىشىندە ويىلعان جولدى ورنىنا كەلتىرىپ ۇلگەرمەسە، جازالانادى. ءتىپتى، جاسالعان جۇمىستىڭ كولەمىنە قاراي تولەنەتىن اي سايىنعى اقشاسىنىڭ 5 پايىزىنان قاعىلادى. اعىمداعى جوندەۋ جۇمىستارىن 5 جىل كولەمىندە بەلگىلى ءبىر مەردىگەر ۇيىمعا تاپسىرۋدىڭ ءتيىمدى تۇستارى كوپ دەيدى جوبانى ۇسىنۋشىلار. ولار بۇرىنعىداي تەندەر وتكىزىپ، كوپ ۋاقىتىن جوعالتپايدى. دەمەك، شۇرق تەسىلگەن قالا كوشەلەرى تۇرعىنداردى كوپ كۇتتىرمەي، دەر كەزىندە جوندەلمەك.
«بۇل جوبا الماتى قالاسىنا وتە ءتيىمدى. سەبەبى، ءبىز جىل سايىن كونكۋرستىق پروسەدۋرالار، بيۋدجەتتىك پروسەدۋرالاردى وتكىزگەن كەزدە كوپ ۋاقىت جوعالتاتىن ەدىك. ال قازىرگى تاڭدا وسى جوبا ارقىلى ءبىز ۇزاق جىلعا، ياعني 4 جىل 5 ايعا كەلىسىم-شارتقا وتىرۋ نەگىزىندە ءاردايىم جۇيەلى جۇمىس ىستەي الامىز. ياعني، كوپ ۋاقىتتى ۇنەمدەيمىز جانە بيۋدجەتتىڭ شىعىندارىن ازايتامىز»، – دەدى الماتى قالاسى جولاۋشىلار كولىگى جانە اۆتوموبيل جولدارى باسقارماسى باسشىسىنىڭ ورىنباسارى قانات بايقوڭىروۆ.
