«الماتىنىڭ قۇرمەتتى ازاماتى» مارتەبەسىنە يە بولعان تۇرعىنداردىڭ ەسىمدەرى بەلگىلى بولدى. ولاردىڭ قاتارىندا اتاقتى كومپوزيتور، قازاقستانننىڭ حالىق ءارتىسى ەسكەندىر حاسانعالييەۆ، ۇلتتىق عىلىم اكادەمياسىنىڭ اكادەميگى، عالىم سەرىك قيرابايەۆ جانە قازاق تاريحىندا تۇڭعىش ەلشى بولعان ايەل – اقمارال ارىستانبەكوۆا بار.
بۇل ادامدار قازاقستاننىڭ دامۋىنا ءار سالادا ۇلكەن ۇلەس قوسقان. ماسەلەن، ەسكەندىر حاسانعالييەۆ جارتى عاسىرلىق شىعارماشىلىق عۇمىرىندا حالىققا 200-دەن استام تاماشا مۋزىكالىق تۋىندىلاردى تارتۋ ەتتى. ولاردىڭ كوپشىلىگىن جۇرت ءالى كۇنگە تامسانىپ ورىنداۋدا. سونىڭ ءبىرى اتاقتى «اتامەكەن» ءانى. ال سەرىك كيرابايەۆ 600-گە جۋىق عىلىمي ەڭبەكتىڭ اۆتورى بولسا، اقمارال ارىستانبەكوۆا ەلىمىزدىڭ بىرىككەن ۇلتتار ۇيىمىنداعى ءبىرىنشى جانە تۇراقتى وكىلى بولدى.
قالالىق ءماسليحات دەپۋتاتتارى اتالعان ءۇش ازاماتتىڭ كانديداتۋرالارىن ءبىراۋىزدان ماقۇلداپ، «الماتىنىڭ قۇرمەتتى ازاماتى» اتاعىن بەردى.
«ۇسىنىلعان كانديداتتاردىڭ ءبىزدىڭ قالامىزدىڭ عانا ەمەس، بۇكىل ەل تاريحىندا ەتكەن ەڭبەگى وراسان ەكەنىن ەسكەرە وتىرىپ، ارىستانبەكوۆا اقمارال حايدارقىزىنا، قيرابايەۆ سەرىك سمايىلۇلىنا جانە حاسانعالييەۆ ەسكەندىر وتەگەنۇلىنا «الماتى قالاسىنىڭ قۇرمەتتى ازاماتى» اتاعىن بەرۋدى قولداۋلارىڭىزدى سۇرايمىز»، – دەدى الماتى قالاسى اكىمىنىڭ ورىنباسارى ارمان قىرىقبايەۆ.
