مەملەكەت باسشىسى قالانى ءتيىمدى باسقارۋعا ارنالعان اۋقىمدى مالىمەتتەر (Big Data) پلاتفورماسىن قامتيتىن احۋالدىق ورتالىقتىڭ جۇمىسىمەن تانىستى. قالالىق جانە رەسپۋبليكالىق 10 جۇيەنىڭ بىرىگۋى شاھارداعى اۆتوترافيك، قوعامدىق كولىكتەگى جۇرگىنشىلەر اعىنىنىڭ كۇندەلىكتى كولەمى، مەكتەپتەر مەن بالاباقشالاردىڭ جۇكتەمەسى، قىلمىستىق احۋال جونىندەگى مالىمەتتەردى تالداۋعا، سونداي-اق بيۋدجەتتىڭ ورىندالۋىنا مونيتورينگ جۇرگىزۋگە مۇمكىندىك بەرەدى.

سونىمەن قاتار، نۇرسۇلتان نازاربايەۆقا قالاداعى ءتۇرلى ۇدەرىستەر كولەمىن رەتتەۋگە، يميتاسيالاۋعا جانە مودەلدەۋگە مۇمكىندىگى بار 3D-پروەكسيا تۇرىندەگى الماتىنىڭ گولوگرافيكالىق ماكەتى تانىستىرىلدى.

قازاقستان پرەزيدەنتى «الماتى باس جوسپارى» عىلىمي-زەرتتەۋ ينستيتۋتىن ارالاپ كورگەن سوڭ الماتى قالاسىن ودان ءارى دامىتۋ جونىندە ءبىرقاتار تاپسىرما بەردى.

مەملەكەت باسشىسى زاۋىت جۇمىسى جونىندەگى باياندامانى تىڭداپ، ءۇشىنشى بۋىن سانالاتىن ەلەكترلى اۆتوبۋستار جاساۋ ءوندىرىسىنىڭ تەحنولوگيالىق ۇدەرىسىمەن تانىستى.

بۇل جوبانى ىسكە اسىرۋعا 15 ميلليارد تەڭگە كولەمىندە جەكە ينۆەستيسيا تارتىلدى. وعان مەملەكەتتىك قولداۋ ارقىلى الماتى قالاسىنىڭ اكىمدىگى تاراپىنان جەر تەلىمى بولىنگەن جانە 2 ميلليارد تەڭگەگە سۋمەن قامتۋ جانە ەلەكتر جەلىلەرى تارتىلعان.

ونىمدىلىك قۋاتى جىلىنا 100 ەلەكترلى اۆتوبۋس شىعاراتىن زاۋىت 1 مىڭنان استام ادامدى جۇمىسپەن قامتيدى.

قازاقستان پرەزيدەنتىنە الماتى قالاسىنىڭ يندۋستريالىق ايماعىنداعى جۇمىس ناتيجەلەرى مەن ونى دامىتۋدىڭ پەرسپەكتيۆالىق جوسپارلارى جونىندە مالىمدەلدى.

نۇرسۇلتان نازاربايەۆ جوعارى تەحنولوگيالى توك وتكىزگىش كابەل ونىمدەرىن شىعاراتىن «كمك Investment» جاۋاپكەرشىلىگى شەكتەۋلى سەرىكتەستىگىنىڭ وندىرىستىك سيكلىمەن، سونداي-اق دايىن ءونىم ۇلگىلەرىمەن تانىستى.

كاسىپورىن جۇمىسشىلارىمەن اڭگىمەلەسكەن ەلباسى وندىرىستە ەۋروپالىق ساپاعا ساي باسەكەگە قابىلەتتى ءونىم شىعارۋعا مۇمكىندىك بەرەتىن زاماناۋي تەحنولوگيا مەن قۇرىلعىلار قولدانۋدىڭ ماڭىزدىلىعىن اتاپ ءوتتى.

مەملەكەت باسشىسى «Tokyo Rope Almaty» جاۋاپكەرشىلىگى شەكتەلۋ سەرىكتەستىگىنىڭ زاۋىتىندا مەتالل گابيون تورىن جاسايتىن اۆتوماتتاندىرىلعان وندىرىسپەن تانىسىپ، دايىن ءونىم ۇلگىلەرىن كوردى.

قازاقستان پرەزيدەنتى الماتى قالاسىنا جۇمىس ساپارى بارىسىندا جاياۋ جۇرگىنشىلەر مەن ۆەلوسيپەدشىلەر ءۇشىن ينفراقۇرىلىمى قايتا جاساقتالعان اباي داڭعىلىن ارالاپ كوردى.

قالا اكىمى باۋىرجان بايبەك مەملەكەت باسشىسىنا شاھار تىرشىلىگىن ساۋلەت-قۇرىلىس جۇرگىزۋ تۇرعىسىنان رەتتەۋ ءۇشىن پيلوتتىق رەجىمدە ەنگىزىلگەن جاڭا ديزايىن-كود ءادىسى جونىندە مالىمدەدى. بۇل ءادىس مەگاپوليستىڭ ءبىرىڭعاي ءستيلىن قالىپتاستىرۋعا ارنالعان ءارى ءبىر قۇجاتتا ناقتىلانعان ەرەجەلەر مەن ۇسىنىمداردى ايقىندايدى.

سونىمەن قاتار، نۇرسۇلتان نازاربايەۆ جالپى ۇزىندىعى 8،7 شاقىرىمدى قامتيتىن تيميريازيەۆ جانە جاندوسوۆ كوشەلەرىنىڭ بويىمەن تارتىلعان BRT كوشە-جول جەلىسىمەن تانىستى.