بۇگىنگى تاڭدا ەلىمىزدەگى ە-كوممەرسيانى ىلگەرىلەتۋ ماقساتىندا كوپتەگەن ءىس-شارالار جۇزەگە اسىپ جاتىر. سولاردىڭ ءبىرى – ەلەكتروندى ساۋدا قاتىسۋشىلارىنا ارنالعان تولەم جۇيەسى. بارشامىز بىلەتىندەي، بۇل جۇيە ينتەرنەت-ساۋداداعى نەگىزگى ەلەمەنتتەردىڭ ءبىرى. وسى رەتتە، ەلەكتروندى ساۋدا سۋبەكتىلەرى ءۇشىن قولما-قول اقشاسىز تولەمنىڭ قۇرالى رەتىندە «سالىنبالى تولەمدى» تانۋ بويىنشا ءتۇسىندىرۋ جۇمىستارى جۇرگىزىلۋدە.  

وتاندىق ب ا ق تاراتقان مالىمەت بويىنشا قازىرگى تاڭدا «قر-نىڭ كەيبىر زاڭنامالىق اكتىلەرىنە ساۋدا قىزمەتىن رەتتەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭى جوباسىنىڭ تۇجىرىمداماسى ازىرلەندى. وسىعان سايكەس، ەلەكتروندى ساۋدانى ودان ءارى دامىتۋ ماسەلەلەرى رەتتەلمەك.

«جالپى، ەلەكتروندى ساۋدا سالاسىنداعى مەملەكەتتىك باعدارلامالار مەن ءىس-شارالاردى ىسكە اسىرۋ باستالعاننان بەرى نارىقتىڭ دامۋىندا وڭ ءۇردىس بايقالادى. وسى وڭ وزگەرىستەردى ءارى قاراي جالعاستىرۋ ماقساتىندا ەلەكتروندى ساۋدانى دامىتۋدا قولدانىستاعى تاسىلدەردى قايتا قاراۋ جۇمىستارى باستالىپ كەتتى»، – دەلىنگەن ۇلتتىق ەكونوميكا مينيسترلىگىنىڭ بەرگەن مالىمەتىندە.

بۇل ماقساتتا الەمدىك تاجىريبە زەرتتەلگەن. حالىقارالىق تاجىريبە كورسەتكەندەي، ەلەكتروندى ساۋدا الاڭدارىن دامىتۋ ەلەكتروندى كوممەرسيانى دامىتۋدا وڭ ءۇردىستى كورسەتكەن. بۇل ءوز كەزەگىندە ەلەكتروندى ساۋدا سۋبەكتىلەرىنە سايت قۇرۋدى، قولما-قول اقشاسىز تولەمدەر جۇيەسىن ەنگىزۋدى، جەتكىزۋ قىزمەتتەرىندە جانە ت.ب. ۇنەمدەۋگە مۇمكىندىك بەرمەك.

ۇلتتىق ەكونوميكا مينيسترلىگىنىڭ مالىمەتىنشە، ەلىمىزدەگى ونلاين نارىقتى دامىتۋ ءۇشىن «قازپوشتا» اق الماتى جانە استانا قالالارىندا فۋلفيلمەنت ورتالىقتارىن سالۋ بويىنشا جوبالارىن ىسكە قوستى (قاتتاۋ، ساقتاۋ، سۇرىپتاۋ، قاپتاۋ، تا­سىمالداۋ). مۇنداي ورتالىقتار تاۋار جەتكىزۋ ۋاقىتىن ەداۋىر قىسقارتۋعا، تاسىمالداۋ شىعىندارىن ازايتۋعا جانە جەكە كۋرەرلىك پوشتالاردى قالىپتاستىرۋعا ىقپال ەتپەك. بۇعان قوسا، ينتەرنەت-دۇكەندەر جانە ەلەكتروندى الاڭدارمەن لوگيستيكالىق ۇردىستەردىڭ اۋتسورسينگىن قالىپتاستىرۋعا جاعداي جاسايدى.

تاعى دا ايتا كەتەتىن جايت، 2018 جىلدىڭ 1ء-شى قاڭتارىندا قازاقستاندا ەلەكتروندى ساۋدا قىزمەتكەرلەرى تابىس سالىعىنان بوساتىلعان بولاتىن. ياعني، ەلەكتروندى ساۋدا سالاسىنىڭ كورپوراتيۆتىك جانە جەكە تابىس سالىعىنان الىناتىن سالىقتان 0 پايىزعا دەيىن بوساتۋدىڭ بەلگىلەنگەن تارتىبىنە سايكەس سالىقتىق جەڭىلدىكتەر كۇشىنە ەندى. بۇل ەرەجە 2023 جىلدىڭ 1 قاڭتارىنا دەيىن جۇزەگە اسىرىلادى.