كورگەننەن كوزاقى الماي بيزنەسىمىز دوڭگەلەنبەيدى دەپ ويلايتىن كافە، مەيرامحانا، تويحانا قوجايىندارى كەيىنگى كەزدە ەر ازامات داياشىلارىن، الجاپقىش بولسا مەيلى عوي، شوتلاند كيلتىمەن (يۋبكاسىمەن) وراپ تاستايتىن بولعان. سوزدەن جەڭىلگەن بەيپىل اۋىز قاتىندار «ەركەك بولماساڭ يۋبكا كيىپ ال!» دەپ اشۋعا ءمىنۋشى ەدى، داياشىلاردىڭ يۋبكا كيەتىندەي نە جازىعىنىڭ بار ەكەنىن تۇسىنبەدىك. نەگىزى، ەر ازاماتتىڭ يۋبكا كيۋى بىزدە نامىس بولىپ كورىنگەنىمەن، بۇل شوتلاندىقتاردىڭ ۇلتتىق كيىمى. دەگەنمەن، وزگە ەلءدىڭ ۇلتتىق اتريبۋتىن بۇتىمىزعا جاپسىرعاننان نە ۇتىپ جاتقانىمىز ۇعىنىقسىز. 
چەحيا، اۆستريا، فرانسيا، تۇركيا سياقتى دامىعان ەلدەردە ايەل زاتىن، ونىڭ ىشىندە قىز بالاسىن داياشىلىققا جولاتپايدى. بۇل كاسىپپەن كوبىنە جاسى 50-دەن اسىپ، اقىل توقتاتقان ەر ازاماتتار اينالىسادى. ەركەك-گارسوندار تاعام ءمازىرىن ايەلدەرگە قاراعاندا سابىرمەن، سالماقپەن، ۇعىنىقتىلاۋ جەتكىزەدى دەگەن ءداستۇر بار. ال بىزدە ءتۇن جارىمىنا دەيىن سىرا تاسىپ، اراق قۇيىپ جۇرگەن ورىمدەي جاس قىزداردى كورەسىڭ. اششى سۋعا سىلقيا تويىپ الىپ، بەيادەپ قىلىقتارىمەن ەلدىڭ بەرەكەسىن قاشىرىپ جاتقان اتپالداي ازاماتتاردىڭ، ءبىر جۇتىم ۇرتتاپ السا، سايقال كۇلكى قىساتىن ماساڭ ايەلدەردىڭ بىلاپىت سوزدەرىن وسى قىزدار كۇن سايىن ەستۋگە ءماجبۇر. «زالالدى» جۇمىستان الاتىن تاۋلىكاقىسى دا ماردىمسىز. 1000-1500 تەڭگە! «مۇنداي ابىرويسىز جۇمىسقا قولىمىزعا تيەتىن ازىن-اۋلاق شاكىرتاقىمىزعا قوسىمشا ءناپاقا بولىپ قالا ما دەپ ماجبۇرلىكتەن جەگىلەمىز»، دەيدى وزدەرىن كوللەدجدىڭ ستۋدەنتتەرىمىز دەپ تانىستىرعان ورىمدەي بويجەتكەندەر. كەيدە ماسايراپ، قارق-قارق كۇلكى قىسقان جىگىتتەردىڭ تەزدەتىپ تاپسىرىس بەرۋدىڭ ورنىنا جۇزىكتىڭ كوزىنەن وتكەندەي جاپ-جاس قىزداردىڭ اتى-جوندەرىن سۇراپ، جەتى اتاسىن تۇگەندەپ، ۋاقىت وتكىزىپ، كەلەمەج ەتىپ وتىرعاندارىن دا بايقايسىڭ. ونى ايتاسىز، داياشىلىققا قىزمەتكە الۋ ءۇشىن قىسقا يۋبكا كيۋىن تالاپ ەتەتىن «كاستينگشىل» مەيرامحانالار دا بار كورىنەدى. شەتەلدە داياشىنى تاڭداۋ باسقاشا جۇرەدى: شەت ءتىلىن مەڭگەرۋىنە، مادەنيەتى مەن ەتيكەتىنە، مەيرامحانا ءمازىرىن، اسىرەسە، تاعام ينگراديەنتتەرىن، ءار تاعامنىڭ ازىرلەنۋ تەحنولوگياسىن جاتقا بىلۋىنە ايرىقشا نازار اۋدارىلادى.
قىسقاسى، «قىزعا قىرىق ۇيدەن تىيۋ» بولىپ تۇرعانىمەن، ءتۇن جارىمىنا دەيىن كاليان مەن تەمەكى تۇتىنىنە تۇنشىعىپ، قولاڭسى يىستەن باستارى اينالىپ جۇرگەن قاراكوز قارىنداستارىمىزدى داياشىلىقتان تىيا الماي وتىرمىز...
ءسىز قالايسىز، قىزىڭىز ۇيدە مە، الدە تابىس تابام دەپ كافە جاعالاپ ءجۇر مە؟

بەكجىگىت سەردالى