18-19 قازان كۇندەرى ماڭعىستاۋ وبلىسى مادەنيەت باسقارماسىنىڭ باستاماسىمەن، ماڭعىستاۋ وبلىسى اكىمدىگىنىڭ قولداۋىمەن قازاقستاننىڭ ەڭبەك سىڭىرگەن ءارتىسى، قۇرمانعازى اتىنداعى قازاق ۇلتتىق كونسەرۆاتورياسىنىڭ قۇرمەتتى پروفەسسورى، «قۇرمەت» وردەنىنىڭ يەگەرى، كۇيشى روزا ايداربايەۆانىڭ شىعارماشىلىعىنا ارنالعان رەسپۋبليكالىق كۇيشى قىز-كەلىنشەكتەر بايقاۋى ءوتتى.

ەكى كۇنگە سوزىلعانن ونەر سايىسىنا 23 دومبىراشى قاتىستى. ولار ەلىمىزدىڭ قاراعاندى، اقتوبە، اتىراۋ، قىزىلوردا، شىعىس قازاقستان، ماڭعىستاۋ، باتىس قازاقستان وبلىستارىنان جانە استانا، الماتى قالالارىنان جينالدى.

روزا ايداربايەۆا ءوزى باسشىلىق ەتكەن قازىلار القاسىنىڭ قۇرامىندا قازاقستاننىڭ ەڭبەك سىڭىرگەن قايراتكەرى، قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى كاريما سۇندەت قىزى ساحاربايەۆا، ق ر مادەنيەت قايراتكەرى، قازاق ۇلتتىق ونەر ۋنيۆەرسيتەتىنىڭ وقىتۋشىسى گۇلپەريزات ەلەۋسىز قىزى ۇلتاراقوۆا، قازاقستاننىڭ ەڭبەك سىڭىرگەن قايراتكەرى، ابىل تاراق ۇلى اتىنداعى ۇلت اسپاپتار وركەسترىنىڭ كوركەمدىك جەتەكشىسى جانە باس ديريجەرى راحات بەكبول ۇلى مادىرەيەۆ، مەملەكەتتىك «سەرپەر» جاستار سىيلىعىنىڭ يەگەرى، ق ر تۇڭعىش پرەزيدەنتى–ەلباسى قورىنىڭ لاۋرەاتى، قۇرمانعازى اتىنداعى قازاق مەملەكەتتىك اكادەميالىق حالىق اسپاپتارى وركەسترىنىڭ باس ديريجەرى ابىلاي جانبولات ۇلى تىلەپبەرگەنوۆ جانە ابىل تاراق ۇلى اتىنداعى ۇلت اسپاپتار وركەسترىنىڭ ءارتىسى عاليا اقبەرگەن قىزى قوجابەرگەنوۆا بار.

-بايقاۋ ءۇش تۋردان تۇردى، اقتىق سىندا 15-تەي دومبىراشى قالدى. قازاق كۇيىنىڭ اناسى – دينا شەشەمىز عوي. ونىڭ اتىندا دا قىز-كەلىنشەكتەر كونكۋرسى بار. قىزدار مەن ەر ادامداردىڭ ارالاسىپ جاتقانىنان گورى ءبىر ەرەكشەلىك بولسىن دەپ قىز-كەلىنشەكتەر اراسىندا ۇيىمداستىرىلدى. ورىنداۋشىلاردىڭ شەبەرلىگى وتە جوعارى دەڭگەيدە، مەنىڭ جانە اكەمنىڭ كۇيلەرىن كۇندەلىكتى تىڭداپ جۇرگەندەي ناقىشىنا كەلتىرىپ ورىندادى. كونكۋرس وتكىزۋ يدەياسى مەن 60 جاسقا تولعاندا كەلگەن بولاتىن. ءبىراق بارلىعى قارجىعا قاراپ قالادى عوي. دەگەنمەن بيىل وبلىس باسشىسى ەرالى توعجانوۆ ارنايى قارجى ءبولىپ، بايقاۋدى وتكىزۋ مۇمكىندىگىنە يە بولدىق، - دەيدى روزا تايمان قىزى.

ەلىمىزدىڭ تۇكپىر-تۇكپىرىنەن باس قوسقان دومبىراشىلار اراسىندا ءىىى ورىندى قىدىرسيحوۆا توعجان (الماتى)، پەردەبەكوۆا ديدار (اقتاۋ)، ۇمبەت توعجان (استانا)، ءىى ورىندى زينور نۇراي (اتىراۋ)، ءابدۋاحاپ سىمبات (الماتى)، ءى ورىندى بەكەنوۆا انەل (الماتى) مەن اينۇر ساحۋپوۆا (اتىراۋ) قانجىعالادى. ال باس جۇلدەنى قۇرمانعازى اتىنداعى قازاق ۇلتتىق كونسەرۆاتورياسىنىڭ 2 كۋرس ستۋدەنتى نازەركە بازاربايەۆا ەنشىلەدى. تايمان ايداربايەۆ اتىنداعى ارنايى جۇلدە ونىڭ كۇيلەرىن جوعارى دەڭگەيدە ورىنداعان ءابدۋاحاپ سىمباتقا بۇيىردى.

بايقاۋ قاتىسۋشىلارى ارنايى ديپلوممەن ماراپاتتالدى. جەڭىمپازدارعا اقشالاي جۇلدەلەر تابىستالدى.