ەكپەنى جۇرگىزۋ ءۇشىن «گريپپول پليۋس» اتتى رەسەيلىك ۆاكسينانىڭ 45 مىڭ دوزاسى ساتىپ الىنعان. بيىل دسۇ ۇيىمىنىڭ بولجامى بويىنشا ميچيگان – ا (ن1N1)، سينگاپۋر – A (H3N2)، كولورادو – B اتتى ءۇش ءتۇرلى شتاما كۇتىلۋدە.

ء-بىز ەكپە سالىناتىن كونتينگەنتتەردى ءبولىپ قويدىق. جۇكتى ايەلدەر، ءجيى اۋىراتىن بالالار، جۇرەك-قان تامىرىمەن اۋىراتىن ادامدار، بالالار ءۇيى مەن قارتتار ۇيىندە تۇراتىندار، مەديسينا قىزمەتكەرلەرى تەگىن، ال وزگە تۇرعىندار اقىلى تۇردە ەكپە قابىلدايدى. اقىلى ەكپە قالاداعى «Interteach»، «چاكۋر» جانە «Vital Prestige» كلينيكالارىندا جۇرگىزىلەدى. اتالعان كلينيكالاردا گوللانديالىق (3500 تەڭگە) جانە رەسەيلىك (1600 تەڭگە) ۆاكسينا بار، — ماڭعىستاۋ وبلىستىق قوعامدىق دەنساۋلىق ساقتاۋ دەمارتامەنتىنىڭ باسشىسى دەيدى بەكمۇرات بۇقار ۇلى.

اتالعان ەكپە ەگىلگەن سوڭ 15-20 كۇندە يممۋنيتەت قالىپتاسادى. ماماندار اۋرۋ ناعىز قىزاتىن مەزگىلگە قاراي اعزا وعان قارسى تۇرۋعا قاۋقارلى بولماق دەگەندى ايتادى. ۆاكسينانىڭ كۇشى 1 جىلعا جەتكىلىكتى.

-بىلتىرعى ماۋسىمدا دا رەسەيدە شىعارىلعان «گريپپول پليۋس» ۆاكسيناسىن قولداندىق. ول يىق بۇلشىق ەتىنە سالىنادى. 6 اي مەن 3 جاس ارالىعىنداعى بالالارعا 0،25 مل كولەمىندە ءبىر اي ينتەرۆالىمەن 2 رەت ەگىلەدى. ال 3 جاستان اسقان بالالارعا تولىق دوزا 0،5 مل مولشەردە سالىنادى، — دەيدى قوعامدىق دەنساۋلىق ساقتاۋ دەپارتامەنتىنىڭ ەپيدەميولوگيالىق باقىلاۋ ءبولىمىنىڭ جەتەكشىسى گۇلشات شورباسوۆا.

بۇگىنگى تاڭدا بارلىق اۋدان، قالالارداعى ەمحانالارعا ۆاكسينا جەتكىزىلگەن. 2017 جىلى ۆاكسيناعا 30 ملن 502 مىڭ قاراجات بولىنسە، بيىل 38 ملن 664 مىڭ تەڭگە جۇمسالعان. مو دەنساۋلىق ساقتاۋ باسقارماسىنىڭ باسشىسى تالعاتبەك باپييەۆ وبلىس ەمحانالارى تولىققاندى دايىن دەگەندى العا تارتتى.

-قازىرگى تاڭدا ماۋسىمدىق اۋرۋ – تۇماۋعا ماڭعىستاۋ بويىنشا دايىندىق بارىسى جاقسى. قوسىمشا ەمحانالارعا شاقىرۋ مەن كەڭەس بەرۋ ءۇشىن 64 تەلەفون ورناتىلىپ جاتىر. قازىرگى تاڭدا 50 اۆتوكولىك جانە 180 توسەك ورىن دايىن. دارى-دارمەكتىڭ ءبارى رەزەرۆتە بار، قامتاماسىز ەتىلگەن. بۇگىندە اقتاۋ قالاسىندا 17 جەدەل جاردەم بريگاداسى قىزمەت ەتەدى، — دەيدى ول.

ماڭعىستاۋ رەسپۋبليكاداعى تۇماۋ ءبىرىنشى انىقتالاتىن وڭىرلەر قاتارىندا. مۇنىڭ سەبەبىن ماماندار وبلىستىڭ 5 ەلمەن شەكارالاس بولۋىمەن بايلانىستىرادى.

-كاسپيي تەڭىزى ارقىلى بىرنەشە ەلمەن كورشى وتىرمىز، قۇستاردىڭ ۇشىپ كەلۋى دە اسەر ەتەدى. ۆيرۋس جان-جاقتان كەلۋى مۇمكىن. بىلتىر وبلىستا گريپپ ماۋسىمى قاڭتار ايىنىڭ العاشقى اپتاسىندا باستالدى، — دەگەندى ايتتى گۇلشات سىرىمبەت قىزى.

وتكەن جىلى 146 گريپپ زەرتحانامەن راستالعان. ونىڭ 65ء-ى بالالار اراسىندا تىركەلگەن. دارىگەرلەر بولاشاقتا ەكپە الاتىندار قاتارىن 70 مىڭعا دەيىن جەتكىزۋدى جوسپارلاپ وتىر.