اعىمداعى جىلدىڭ 24 قازان كۇنى ءداستۇرلى «Zhastar Innovation» بايقاۋىنىڭ قورىتىندىسى جاريالاندى. الماتى قالاسى جاستار ساياساتى ماسەلەلەرى جونىندەگى باسقارماسىنىڭ تاپسىرىسىمەن «ەل-شەجىرە» قوعامدىق قورى ۇيىمداستىرعان بايقاۋعا بيىل 200-گە جۋىق جۇمىستار كەلىپ تۇسكەن. ولاردىڭ اراسىندا ونەرتاپقىش جاستارمەن قوسا باستاۋىش كاسىپكەرلەردە بولدى.

جوبانىڭ نەگىزگى ماقساتى جاستاردىڭ يننوۆاسيالىق بەلسەندىلىگىن ارتتىرىپ، جاڭا تەحنولوگيا سالاسىندا ماڭىزدى جوبالار جاساپ شىعارۋعا باعىتتالعان. سونداي-اق يننوۆاسيالىق ستارتاپتارىنا قولداۋ كورسەتىپ، ىنتالاندىرۋ. ۇزدىك دەپ تانىلعانىن وندىرىسكە ەنگىزۋ.

جوبا اياسىندا كاسىبي بيزنەس-جاتتىقتىرۋشىلارمەن تەگىن ترەنينگ جۇرگىزىلىپ،  جەتى جەتەكشى كاسىپكەرمەن كەزدەسۋ وتكىزىلگەن.

قورىتىندى كەشكە الماتى قالاسىنىڭ ءماسليحات دەپۋتاتتارى، ءبىر توپ كاسىپكەرلەر، ستۋدەنتتەر جانە جوبا قاتىسۋشىلارى قاتىستى. بارلىق جۇمىستاردى سارالاي كەلە، قازىلار القاسى «Tazalyk» جوباسىن جەڭىمپاز ەتىپ تاڭدادى. بايقاۋدىڭ جالپى ۇتىس قورى – 1 ميلليون تەڭگە.

ال، 2ء-شى ورىن جەڭىمپازدارىنا «جاڭا ۇرپاق» رەسپۋبليكالىق كوشباسشىلار مەكتەبىنە ءبىر جىلدىق تەگىن وقۋ مۇمكىندىگى، 3ء-شى ورىن يەگەرلەرىنە ءىلياس باتىروۆ ءوزىنىڭ قازاقستانداعى №1 وراتورلار كلۋبىنا ءۇش ايلىق ابونومەنتكە جولداما تارتۋ ەتتى. سونداي-اق، جوبالارمەن تانىسىپ، كوڭىلىنەن شىققان الەۋمەتتىك «Fortitude» جوباسىنا "AssylTas" قورى دا ارنايى سىيلىعىن ۇسىندى.  «Fortitude» جوباسى مۇمكىندىگى شەكتەۋلى بالالاردىڭ قوعامدا ءوزىن جات سەزىنبەۋى ءۇشىن قولىنان كەلگەنشە ەڭبەك ەتىپ ءوز تابىسىن وزدىگىنەن تابۋدا. سول سياقتى جۇمىس جاساۋعا ىنتالى مۇمكىندىگى شەكتەۋلى جاستاردى وقىتىپ، وزگەلەرمەن تەڭ دارەجەدە قىزمەت ەتۋىنە جاردەمدەسەدى.  قوردىڭ قۇرىلتايشىسى نۇرجان وكىمبايەۆ جوبانى جاساعان جاستارعا العىسىن ءبىلدىرىپ، ءاردايىم كومەك كورسەتۋگە دايىن ەكەندەرىن جەتكىزدى. بۇعان قوسا، جوبا اياسىندا ءبىلىم العان الماس ەسىمدى جىگىتتى جۇمىسقا قابىلدايتىندارىن ايتتى.

جادىرا نارماحانوۆا