ومىرلىك كوزقاراستى وزگەرتكەن 3 كىتاپ: ر.كييوساكي «باي اكە، كەدەي اكە»، پاولو كوەلو «الحيميك»، دەيل كارنەگي «دوس قاتارىن كوبەيتۋ جانە ادامدارعا اسەر ەتە الۋ»؛
ومىرلىك ۇرانعا اينالعان 3 ماقال-ماتەل: «بولار بالا ون بەسىندە باسپىن دەر، بولماس بالا وتىزىندا جاسپىن دەر»، «اتقا ءمىندىڭ، اجالعا ءمىندىڭ»، «كورە-كورە كوسەم بولاسىڭ، سويلەي-سويلەي شەشەن بولاسىڭ»؛
شابىت سىيلايتىن 3 سيتاتا: ۋينستون چەرچيلل: «ەشقاشان بەرىلمەڭىز»، ستيب دجوبس: «اش قالىڭىز. اڭعال بولىڭىز»، بريۋس لي: «جەڭىلىس ءسىز ءوزىڭىز مويىنداماعانشا جەڭىلىس ەمەس»؛
الەمدىك دەڭگەيدە وشپەستەي ءىز قالدىرعان قۇرمەتكە لايىق 3 تۇلعا: مۇحاممەد پايعامبار (س.ع.س.)، ى.التىنسارين، يلون ماسك؛
ءومىر سۇرۋگە قولايلى 3 تاڭعاجايىپ مەكەن: يتاليا، جاپونيا، اۆستراليا؛
ءومىرىنىڭ 10 جىلىن امەريكادا وتكىزىپ، «جارتىلاي امەريكالىق» بولىپ كەتكەن ەركەبۇلان كاكىمبەكوۆتىڭ يۋتۋب كانالىنا كەزدەيسوق تاپ بولدىم. ءوزىن «half amerikan» دەپ اتايتىن ەركەبۇلاننىڭ جۇرەگى قازاق دەپ سوعاتىنى يۋتۋبقا جۇكتەگەن ۆيدەوسىنان دا، ينستاگرامعا سالعان ءار جازباسىنان دا انىق بايقالادى. ءبىر كەزدەرى نيۋ-يوركتەگى باس كونسۋلدىڭ كومەكشىسى قىزمەتىن اتقارعان تورعايلىق قازاقپەن بەتپە-بەت جۇزدەسىپ، اشىق اڭگىمەلەسە الماساق تا whatsapp كومەگىمەن سۇحبات الۋدى ءجون كوردىك.
-تورعايدىڭ تۋماسىسىز. تۋعان ولكەنىڭ ءبىر ۋىس توپىراعىن قاستەرلەيتىن ازاماتسىز. تورعايعا دەگەن ساعىنىش جۇرەگىڭىزدى تۋلاتپاي ما؟
-قايدا جۇرسەم دە، ءوزىمنىڭ تورعايلىق قازاق ەكەندىگىمدى ۇمىتپايتىن جانمىن. بىلتىر عانا تۋعان توپىراعىما تابان تىرەپ، ماۋقىمدى باسىپ كەلدىم. قازاقتىڭ دارحان دالاسىنا كوز تاستاپ، تاۋ مەن تاسىنا تامسانىپ، تەبىرەنىپ، سالقىن سۋىنان ءبىر ۇرتتاپ، سامال جەلگە كەۋدە توسىپ، كوڭىلىم تاسىدى. جاقىندارىمدى قاپسىرا قۇشاقتاپ، «اينالايىن» دەگەندەرىنەن قۇلاعىمنىڭ قۇرىشى قانىپ، قۋانىشىم قوينىما سىيمايدى. قايران تورعاي دەسەڭىزشى! قانشاما اسىل ازاماتتى دۇنيەگە اكەلگەن مەكەن! بۇگىنگى تاڭدا وركەندەگەن قازاقستاننان شەت جىراق قالىپ قويعان تۋعان تورعايىم كۇندەردىڭ ءبىرى تۇرەن سالىپ، جەر جارعان اتاعىن قايتاراتىنىنا سەنىمىم مول.
-وتكەن كۇندە بەلگى بار دەپ جاتادى. كەلمەسكە كەتكەن بالالىق شاعىڭىزدىڭ ەستەن كەتپەگەن ءبىر كۇنىن بايانداپ بەرىڭىزشى.
-اكە-شەشەم قوناققا كەتكەن سايىن قارىنداسىمدى وزدەرىمەن بىرگە الىپ كەتىپ، مەنى ۇيدە تاستاپ كەتەتىنىنە رەنجيتىنمىن. ءبىر كۇنى قاتتى اشۋلانعانىم سونشالىق، «كورەسىڭدەر ءالى، مەن قازاقستاندى عانا ەمەس، بۇكىل الەمنىڭ قالالارىن ارالايمىن» دەپ وز-وزىمە سەرت بەرگەنمىن. وسى ءبىر بالالىق رەنىش مەنىڭ ءومىرىمدى وزگەرتكەندەي بولدى. سەبەبى سودان بەرى تۋريزم سالاسىنا قىزىعۋشىلىعىم زور. الەمنىڭ سۇلۋلىعىن كورۋ ءۇشىن كەز كەلگەن مەملەكەتكە ساپار شەگۋگە دايىنمىن.
-سول ارماننىڭ جەتەگىمەن مۇحيت استىڭىز. بىلايشا ايتقاندا، ارمانىڭىز ورىندالدى. ارمانى ورىندالعان، ىشتەي وزىنە قاناعاتتانعان ادام قانداي كۇي كەشەدى؟
-يراندا ءبىر جىل، گەرمانيادا ءبىر اي ءومىر ءسۇردىم. 10 جىل بويى نيۋ-يوركتەمىن. جارتى الەمدى تۋريست رەتىندە ارالاپ شىقتىم دەسەم بولادى. بىلايشا ايتقاندا، ۋادەمدە تۇرىپ، ءوز ارمانىمدى ومىرگە اينالدىرعان ازاماتپىن. ءبىراق ادامنىڭ كوزى ءبىر ۋىس توپىراققا تويادى دەگەن ءسوز بار. ارمانىم ءالى كوپ. مەن كورمەگەن تاڭعاجايىپ مەكەندەر ءبىرشاما. سولارعا ساياحات جاساۋدى ارماندايمىن.
-بالا كەزدەگى ارمانىڭىزدى قاراپايىم قازاق بالاسىنىڭ كوكسەگەنى دەپ ءتۇسىندىم. ال، امەريكالىق ارمان شە؟ ول قاشان جانە قالاي دۇنيەگە كەلدى؟ امەريكالىق ارماننىڭ قازاقستاندىق ارماننان ايىرماشىلىعى بار ما؟
-قازۇۋ-دا شىعىستانۋ فاكۋلتەتىندە وقىپ جۇرگەندە حالىقارالىق قاتىناستار فاكۋلتەتىنىڭ 3-كۋرس ستۋدەنتىمەن جاتاقحانادا بىرگە تۇردىق. ول «Work and travel» باعدارلاماسى ارقىلى اقش-قا 3 ايعا بارىپ كەلگەنىن ايتتى. مەنىڭ قىزىعۋشىلىعىم سول كەزدە وياندى. امەريكالىق، قازاقستاندىق ارمان دەگەن جوق. ادام بارلىق جەردە بىردەي. بارلىعىمىزدىڭ كوكسەيتىنىمىز – ءال-اۋقاتتى ءومىر ءسۇرۋ، باقىتتى بولۋ، شىڭدالۋ، جەڭىسكە جەتۋ.
-نيۋ-يوركتە تۇراسىز عوي؟ قازاقتار قانشالىقتى كوپ؟ قازاق ەڭ كوپ شوعىرلانعان قالالار، اۋداندار قانداي؟
-نيۋ-يورك قالاسىندا تۇرعانىما ون جىل بولدى. 10 جىلدىڭ ىشىندە قالاداعى قازاقتاردىڭ سانى ءبىرشاما وسكەن. اسىرەسە، قازاق كوپ شوعىرلانعان اۋدان – برۋكلين. جالپى، برۋكليندە تمد ەلدەرىنەن كەلگەندەر كوپ، سونىڭ اراسىندا قازاقتار دا بار.
-امەريكاعا العاش بارعاندا قازاقتىڭ الدىنان شىعاتىن ەڭ باستى كەدەرگى نە؟
-ارينە، ەڭ ءبىرىنشى ماسەلە ول – ءتىل. مۇحيت اسىپ، امەريكا كەلگەن قازاق قايدا تۇراقتارىن، قايدان جۇمىس تابارىن بىلمەي جاتادى. زاڭدارىنان دا بەيحابار. وسىنىڭ ءبارى جەتىستىككە جەتۋ جولىندا بوگەت بولادى. اتالمىش قيىندىقتاردىڭ ءبارىن ءوز باسىم ارتتا قالدىردىم. مەن سياقتى قينالماسىنشى دەگەن ويمەن youtube-تا جەكە ارنامدى اشتىم. مەنىڭ ۆلوگتارىمدى كورگەن ادام وزىنە كوپتەگەن پايدالى ماعلۇمات پەن اقىل-كەڭەس الادى دەگەن ۇمىتتەمىن.
-جۇمىسىڭىز، كاسىبىڭىز تۋرالى ايتىپ بەرسەڭىز. ايلىعىڭىز شايلىعىڭىزعا جەتە مە؟ جەكە باسپاناڭىز بار ما؟ جالپى، كۇن كورىس -قامىنا قانشا قاراجەت كەتەدى؟
-ريەلتور بولىپ جۇمىس جاسايمىن. ول دەگەنىمىز ءۇيدى جالعا الۋعا نەمەسە ساتىپ الۋعا كومەك بەرەمىن. الاتىن ايلىعىم جامان ەمەس. بۇل جاقتا ۇستەماقى الاتىن مۇمكىندىك قاراستىرىلعان. ەڭبەگىڭە قاراي تيىن-تەبەن دە بەرىلەدى، قىسقاسى. ايىنا $5000-10 000 ارالىعىندا اقشا تابۋعا مۇمكىندىك بار. جالپى، نيۋ-يوركتە ءومىر ءسۇرۋ قىمباتقا تۇسەدى. ءبىر بولمەلى ءۇيدى جالعا الۋ ءۇشىن ايىنا $1500-1700-داي قاراجات جۇمسايسىڭ. ءبىراق ايلىعىم شايلىعىما ەمىن-ەركىن جەتەدى دەپ ايتا الامىن. ريەلتورلىقتان باسقا دا جۇمىستارمەن اينالىسامىن. كىشىگىرىم كاسىبىم بار. «نيۋ-يوركقا ات باسىن بۇرعان قازاق اقشادان قينالماس ءۇشىن نە ىستەۋى كەرەك» دەگەن سياقتى سۇراقتاردىڭ جاۋابىن جاقىندا مەنىڭ youtube ارنامنان شىعاتىن كەزەكتى ۆلوگىمنان بىلە الاسىزدار.
-امەريكادا ءبارى بار، ءبارى جاقسى سياقتى كورىنەدى. ونداعى شىنايى ءومىر تۋرالى ۆلوگ ءتۇسىرىپ، يۋتۋبقا سالا باستادىڭىز. كەز كەلگەن ادامنىڭ مۇندا باعى اشىلا بەرمەيتىندىگىن مەڭزەيسىز. سوندا ۆلوگ جۇرگىزۋدەگى كوزدەگەن ماقساتىڭىز قانداي؟ ايتار ويىڭىزدى بۇكپەسىز جايىپ سالساڭىز؟
-امەريكاعا بارسام، باقىتتى بولامىن دەپ ويلاۋ قاتە. امەريكادا دا ءومىر عاجايىپ ەمەس. كۇن سايىن مىڭ ءتۇرلى كەدەرگى الدىڭنان شىعادى. كەرىسىنشە بۇل جەردە باسەكەلەستىك ءورشىپ تۇر. الدىڭنان كوپ ەسىك اشىلاتىنى راس، الايدا ىشكە ەنگەن سوڭ قورقىنىش پەن ۇرەيگە بوي الدىرماستان باسپالداقپەن جوعارى قاراي ورلەۋىڭ شارت. مەن ءوز ۆلوگتارىم ارقىلى امەريكاداعى شىنايى ءومىردى كورسەتكىم كەلدى. اقش-قا كەلىپ، كوپ اقشا تابامىن دەپ جۇرگەندە ءبىر ولىمنەن قالىپ، ارباعا تاڭىلعان لاۋرا قىزدى سۇحباتقا تارتۋىم دا وسىدان. «وسى جاعداي مەنىڭ باسىمنان شەتەلدە ەمەس، قازاقستاندا بولعاندا، ماعان جەڭىلىرەك بولاتىن ەدى» دەپ كوز جاسىن توقتاتا الماعان لاۋرا تاعاشيەۆانىڭ ءار سوزىنەن وزەگىن ورتەگەن وكىنىشتى سەزبەۋ مۇمكىن ەمەس. جاقىندارىڭدى الىستا قالدىرىپ، جاپادان جالعىز بوتەن مەملەكەتكە اتتانۋ قيىننىڭ قيىنى. جاناشىرىڭ جوق جەردە قاتەلەسۋ دە وڭاي. امەريكاعا ارمان ارقالاپ كەلگەن ءار قازاق ءتۇپتىڭ تۇبىندە قازاقستاننان ارتىق مەكەن جوق ەكەنىن ءبىلۋى شارت.
ء-ومىرىڭىزدىڭ 10 جىلىن مۇحيتتىڭ ار جاعىندا وتكىزىپسىز. 10 جىلدا نە ءبىتىردىڭىز؟ 10 جىلدان كەيىن ەركەبۇلان تاعى قانداي جەتىستىككە جەتەدى؟
-العاشقى ەكى جىلدى ءتىلدى مەڭگەرۋگە ارنادىم. جالپى، ءوز-وزىمدى دامىتۋعا بەس جىل ارنادىم. ەكى جارىم جىل بويى نيۋ-يورك قالاسىندا ورنالاسقان باس كونسۋلدىقتىڭ كونسۋلىنىڭ كومەكشىسى رەتىندە قىزمەت اتقاردىم. كەيىنگى بەس جىلىمدى وتباسىن قۇرۋعا جانە ماقسات-مۇراتىمدى جۇزەگە اسىرۋعا ارنادىم. زۋ ەتىپ وتكەن 10 جىلىمدى سارالاسام، جەتكەن جەتىستىگىم كوپ ەكەن. 10 جىلدان كەيىن وز-وزىمە ەسەپ بەرگەندە ماقتانىشپەن ايتا الاتىنداي جەتىستىكتەرگە جەتۋدى ماقسات تۇتامىن. مىسالى، تمد ەلدەرىنە ايگىلى امەريكا تۋرالى شىنشىل ءارى قىزىق ۆيدەو تۇسىرگەن ۆلوگگەر اتانعىم كەلەدى. امەريكادا تۇراتىن قازاق ميلليونەرى اتانۋدى ارماندايمىن. ادامزاتتىڭ دامۋىنا ءوز ۇلەسىمدى قوسقىم كەلەدى.
-سۇيىكتى جارىڭىز قازاق پا؟ جار تاڭداۋدا نە نارسەگە كوڭىل ءبولدىڭىز؟ باسقا ۇلتتىڭ قىزىن جار ەتەتىندەرگە قالاي قارايسىز؟
-جولداسىم الماتىنىڭ قىزى. 17 جاسىندا امەريكاعا ءبىلىم الۋعا كەلگەن قاراكوز. سول ۋنيۆەرسيتەتتە وقىپ جۇرگەندە نيۋ-يورككە قىدىرىپ كەلەدى. اتالمىش ساپار كەزىندە ەكەۋمىز تانىسىپ، بىردەن ءتىل تابىسىپ، ءبىر-بىرىمىزدى ۇناتىپ قالدىق. مىنەزىمىز، تابيعاتىمىز ۇيلەسكەندىكتەن وتباسىن قۇرۋدى ءجون دەپ شەشتىك. امەريكادا ءجۇرىپ، ءبىر نارسەنى جاقسى ۇقتىم، ول – بىرەۋدىڭ ومىرىنە ارالاسپاۋ مادەنيەتى. ادام – ءوز ءومىرىنىڭ قوجاسى. قانداي ماماندىققا تۇسەدى، قانداي ۇلتتىڭ قىزىن الادى، قانداي كيىم كيەدى، ءبارىن-بارىن ءوزى شەشەدى. ول ادامنىڭ تاڭداۋىنا تالاسۋدىڭ قاجەتى جوق. امەريكادا ادامنىڭ تاڭداۋىنا قۇرمەتپەن قارايدى. بوگدە بىرەۋدىڭ ومىرىنە بىلەك سىبانا ارالاسپايدى. ءوز ويىن ىشتە ساقتاۋدى جوعارى مادەنيەتتىلىككە بالايدى. سوندىقتان مەن دە قىزدارىمىزدىڭ تاڭداۋىنا قۇرمەتپەن قارايمىن. «تۇرمىسقا شىق نە شىقپا» دەپ ايتا الماسپىن. قايدا بارسا دا تاستاي باتىپ، سۋداي سىڭسە، باقىتتى جانۇيا اتانسا، قۋانىشتىمىن.
-امەريكالىق قىزدار قانشا ۇيدەن تىيىم كورىپ وسەدى؟ قازاق قىزىن قىرىق ءۇيدىڭ تىيعانىن بىلەسىز.
-نيۋ-يوركتە باسقا مەملەكەتتەردەن كوشىپ كەلگەن يمميگرانتتار كوپ تۇرادى. اركىم ءوز حالقىنىڭ مادەنيەت، ءسالت-داستۇرى بويىنشا تالىم-تاربيە بەرەدى. قىزىن قىرىق ۇيدەن تىياتىن وتباسىلار دا، ەمىن-ەركىن جىبەرەتىن وتباسىلار بار. ناقتى ءبولىپ-جارىپ ايتۋ قيىن.
-ۇلىڭىزدىڭ ەسىمى - ادام. ۇلى اباي «تولىق ادام» بولىڭدار دەپ وسيەت ايتىپ كەتتى. ادامنىڭ تولىق ادام بولۋى ءۇشىن قانداي اكەلىك تاربيە بەرىپ جاتىرسىز، وزىڭىزگە ءتان ءادىس-تاسىل بار ما؟ بالا تاربيەلەۋدە ۇلتجاندىلىق ماسەلەسىنە قانشالىقتى كوڭىل بولەسىز؟
-«اتاڭنىڭ عانا ەمەس، ادامنىڭ بالاسى بول» دەگەن وي-نيەتپەن تۇلا بويىم تۇڭعىشىمنىڭ ەسىمىن «ادام» دەپ قويدىم. بۇل ەسىمنىڭ تاعى ءبىر ەرەكشىلىگى، بالام ەرتەڭگى كۇنى قازاقستاندا دا، اقش-تا دا تۇرسا دا، قينالمايدى. ەسىمى تۇسىنىكتى، ايتۋعا جەڭىل. ءوز باسىم قازاقى تاربيە العان جانمىن. بالامدى دا ۇلتتىق سيپاتتا تاربيەلەپ وسىرۋدەمىن. ءبىرىنشى ورىنعا ۇلتجاندىلىقتى قويامىن. بالام امەريكادا وسىپ-جەتىلەتىندىكتەن قورشاعان ورتانىڭ اسەرىمەن ناعىز قازاق بولمايتىندىعى تۇسىنىكتى. الايدا قازاقى بولمىس پەن مىنەز-قۇلىقتى بارىنشى ءسىڭىرۋدى مىندەت-پارىز دەپ سانايمىن.
-قىلىقتى قىزىڭىز دۇنيەگە كەلسە، ەسىمىن كىم دەپ قويعىلارىڭىز كەلەدى؟
-جارتىلاي قازاقشا، جارتىلاي امەريكالىق ات قويۋ ماقساتىمەن قىزىما ايلين دەگەن ەسىم بەرەتىن ەدىم.
-«جارتىلاي امەريكالىق» دەپ اتايسىز ءوزىڭىزدى. دەمەك جارتىلاي قازاقسىز. «جارتىلاي امەريكالىق» – قۇلاققا ادەمى ەستىلگەنمەن، ايتارى اۋىر دۇنيە. وكىنىشكە ورىن جوق پا؟
-جاسىم ءقازىر 34-تە. ۇلتىم- قازاق. «جارتىلاي امەريكالىق» دەگەن مەنىڭ لاقاپ اتىم. وعان ۇركە قاراماۋ قاجەت. 34 جىلدىق ءومىرىمنىڭ 10 جىلىن شەتەلدە وتكىزگەنىم راس قوي.
-قازاقتىڭ قانداي تانىمال ۇل-قىزدارىمەن دوستىق، ارىپتەستىك بايلانىستاسىز؟
-قاراقات ءابىلدينا اپكەمىزبەن دوستىق قارىم-قاتىناستامىز.
-قازاق مادەني ورتالىعىن اشقىڭىز كەلگەنىنە ءبىراز جىلدىڭ ءجۇزى بولدى. الداعى ۋاقىتتا ويىڭىزدىڭ ىسكە اساتىن ءتۇرى بار ما؟ قاراقات ءابىلدينا قولداۋ كورسەتىپ جاتىر دەپ جازاسىز ينستاگرام پاراقشاڭىزدا. وسىعان كەڭىرەك توقتالساڭىز.
-قر سىرتقى ءمينيسترىنىڭ ورىنباسارى ەرجان اشىقبايەۆ امەريكاعا كەلگەن كەزدە وسى ۇسىنىستى ايتقان بولاتىنمىن. الايدا وعان قارجى بولىنبەيتىنىن اشىق ايتىپ، ەل-حالىق بولىپ جۇمىلىپ اشۋعا كەڭەس بەردى. ودان بەرى ەكى جىل ءوتتى. ورتالىقتى اشۋدى قايتادان قولعا الىپ جاتىرمىن. ۇستىمىزدەگى جىلدىڭ 20 قازانىندا قازاقستاننىڭ نيۋ-يورك قالاسىنداعى باس كونسۋلدىقتىڭ باس كونسۋلى جانىبەك ابدىراشيەۆ اعامىزبەن بىرنەشە ازامات كەزدەسىپ، سول ماسەلە جايىندا اڭگىمە قوزعادىق. باس كونسۋل قارجىلاي بولماسا دا باسقا قولدان كەلەتىن كومەگىن كورسەتەتىنىن ايتتى. الداعى ۋاقىتتا: 1. قازاق مادەني ورتالىعىن (Non Profit organization) زاڭدى تۇردە اشامىز. 2. قازاق مادەني ورتالىعىنا ارنالعان قور قۇرامىز. 3. مادەني ورتالىققا ارنالعان عيمارات ىزدەيمىز. 4. مادەني ورتالىققا قانشا قاراجات كەرەك ەكەنىن ەسەپتەپ حالىقتان كومەك سۇرايمىز. مادەني ورتالىقتىڭ ماقساتى: 1. قازاقستاندىقتاردىڭ باسىن بىرىكتىرۋ؛ 2. Kazakh town قۇرۋ؛ 3. مەرەكەلىك شارالار ۇيىمداستىرۋ؛ 4. قازاق جانە اعىلشىن ءتىلىن ۇيرەنگىسى كەلگەندەرگە كومەكتەسۋ؛ 5. جەرگىلىكتى اتقارۋشى ورگاندار، قۇقىق قورعاۋ ورگاندارى جانە زاڭگەرلەرمەن ءجيى كەزدەسۋ ۇيىمداستىرۋ ارقىلى جەرلەستەرىمىزدىڭ ساۋاتتىلىعىن ارتتىرۋ؛ 6. كومەك كە ءزارۋ ازاماتتارعا قول ۇشىن بەرۋ؛ 7. بالاباقشا اشۋ جانە ت.س.س. مادەني ورتالىق مەرەكەلىك شارالاردان تۇسكەن قاراجاتتان، حالىقتان تۇسكەن اقشادان، (membership donation) جانە جەرگىلىكتى وكىلدەردەن تۇسكەن قاراجاتتار ارقىلى جۇمىس جاسايدى.
قاراقات اپكەم قولداۋ بىلدىرۋگە دايىن ەكەندىگىن جەتكىزدى. ارنايى كونسەرت ۇيىمداستىرعالى جاتىر. كونسەرتتەن تۇسكەن قارجىنىڭ 1/3 بولىگى ۇيىمداستىرۋ جۇمىستارىنا، 1/3 بولىگى ورتالىق اشۋعا ارنالعان قورعا، 1/3 بولىگى امەريكاعا كەلىپ، تاعدىر تەزىنە ۇشىراپ، ارباعا تاڭىلعان نيۋ-يورك تۇرعىنى لاۋرا تاعاشيەۆانىڭ ەمىنە جۇمسالماق. ويعا العان ىستەر اماندىق بەرىپ، تۇگەلدەي جۇزەگە اسسا، «قامشىدان» ءسۇيىنشى سۇراۋدان اسىقپىز. ازىرگە ءبارى جوسپار دەڭگەيىندە.
-جاقىندا عانا «نيۋ-يورككە جولداما» دەگەن بايقاۋ جاريالادىڭىز. ءسىزدىڭ الەۋمەتتىك جەلىدەگى پاراقشالارىڭىزعا جازىلعان كەز كەلگەن قازاقستان ازاماتى نيۋ-يورككە ءسىزدى ەسەبىڭىزدەن 5 كۇنگە قىدىرىپ بارىپ قايتپاق. ناتيجەسىن قاراشانىڭ ءبىرى كۇنى جاريالايدى ەكەنسىز. ءبىر قازاقتىڭ ارمانىن ورىندايمىن دەگەن وي-ارمانىڭىز بار ما، بۇل الدە ءيميدجىڭىز بەن تانىمالدىلىعىڭىزدى ارتتىرۋ ءۇشىن جاسالعان ماركەتينگتىك قادام با؟
- الەۋمەتتىك جەلىلەردەگى پاراقشالارىما جازىلىپ، بايقاۋ شارتتارىن دۇرىس ورىنداعان ازامات قاتىسۋشى بولىپ سانالادى. ۇستىمىزدەگى جىلدىڭ قاراشانىڭ بىرىندە بايقاۋ ناتيجەسىن شىعارامىن. بايقاۋدىڭ تولىق ەرەجەسىن بىلگىسى كەلگەن وقىرمان مەنىڭ youtube ارناما – half_amerikan-عا كىرىپ، كەرەك ماعلۇماتتى الا الادى. اتالمىش بايقاۋدى جاريالاۋ ارقىلى ءبىر وقپەن ەكى قوياندى اتىپ الۋدى جوسپارلاپ وتىرمىن. بىرىنشىدەن، ارمان جەتەگىندە جۇرگەن ءوز باۋىرىمنىڭ امەريكانىڭ كوركەم جەرلەرىن ارالاپ، رۋحاني، مادەني دەمالىپ قايتقانىن قالايمىن. امەريكادا تۇرىپ جاتقان قازاقتاردىڭ تۇرمىس-تىرشىلىگىنەن اقپارات بەرەتىن قىزىقتى ۆيدەوبلوگ ءتۇسىرۋ ارقىلى عالامتور پايدالانۋشىسىنا پايدالى كونتەنت ۇسىنعىم كەلەدى. وسى ارقىلى ءيميدجىمدى كوتەرگىم كەلەدى. جالپى العاندا، «اتقا ءمىندىڭ، اجالعا ءمىندىڭ» دەگەن ءسوز بار. امەريكادا جۇرگەن مەن بابامىز ايتقان ناقىل ءسوزدىڭ جاۋاپكەرشىلىگىن تۇسىنەمىن. قازاق دەگەن اتقا سىزات تۇسىرمەۋگە بارىمدى سالىپ كەلەمىن. قازاققا، جالپى ادامزاتقا پايدامنىڭ تيگەنىن قالايمىن.
-قازاقستانعا قاشان ورالاسىز؟ ورالۋ جالپى ويىڭىزدا بار ما؟
-بەيبارىس بابامىزداي مەن دە جۋسان ءيىسىن اڭسايمىن. جوسپارلارىمدى جۇزەگە اسىرىپ، اياققا نىق سەنىمدى تۇرعان بويدا ەلگە ورالامىن. جەتىستىككە جەتپەسەم دە، قازاقستانعا قايتۋدى كوزدەيمىن. سەبەبى اتا-انامدى، اعايىن-تۋىسىمدى تاستاپ، بوتەن ەلگە تۋ تىگە الماسپىن.
