چەليابى وبلىسى مەن قازاقستاننىڭ 2018 جىلدىڭ ءبىرىنشى جارتى جىلدىعىنداعى تاۋار اينالىمى 1،2 ميلليارد اقش دوللارىنان استى.
قازاقستان چەليابى وبلىسىنىڭ باسقا ەلدەرمەن تاۋار اينالىمىنداعى قۇرىلىمىندا 24%-دى الا وتىرىپ جانە كورشى قىتايدان العا وزىپ، ءبىرىنشى ورىنعا شىقتى، دەپ حابارلايدى قازاقستاننىڭ سىرتقى ساۋدا پالاتاسىنىڭ باسپا ءسوز قىزمەتى. چەليابىدە وتكەن ۋرال ازىق-تۇلىك فورۋمىندا بۇل كورسەتكىشتى ودان ءارى ارتتىرۋدىڭ ءساتى ءتۇستى. فورۋم اياسىندا «الماتى ءونىمى» ج ش س 20 ميلليون رۋبلدەن استام سوماعا كونديتەرلىك بۇيىمداردى ەكسپورتتاۋعا كەلىسىمشارت جاساستى.
«الحان حالال» جانە «ALBA Foods Company» كومپانيالارى چەليابىنىڭ جانە وبلىستىڭ ساۋدا جەلىلەرىنە 50 ميلليوننان استام رۋبلگە شۇجىق ونىمدەرىن جەتكىزۋگە شارتتار جاساستى.
«چەليابى قازاقستاندىق ەكسپورتتاۋشىلار ءۇشىن الەۋەتتى وتكىزۋ نارىعى بولىپ تابىلادى، بۇل شەكارالاس ءوڭىر. وسى ءىس-شارا تاماق ونىمدەرىن وندىرۋشىلەر تاراپىنان ۇلكەن قىزىعۋشىلىق تۋدىردى، وسىعان بايلانىستى قازاقستاننىڭ سىرتقى ساۋدا پالاتاسى قازاقستاندىق تاماق ونىمدەرىن وندىرۋشىلەردىڭ ۋرال ازىق-تۇلىك فورۋمىنا كاتىسۋىن ۇيىمداستىردى»، - دەپ اتاپ ءوتتى قازاقستاننىڭ سىرتقى ساۋدا پالاتاسىنىڭ وكىلى ءانۋار بەيسەكوۆ.
فورۋمعا وڭتۇستىك ۋرال، سۆەردلوۆ، قورعان، ۆولگوگراد وبلىستارىنىڭ، التاي ولكەسىنىڭ، باشكيريانىڭ، ۋدمۋرتيانىڭ، قازاقستان رەسپۋبليكاسىنىڭ اۋىل شارۋاشىلىق جانە تاماق ونەركاسىبىنىڭ 150-دەن استام كاسىپورىندارى قاتىستى.
سالانىڭ جاڭا ينۆەستيسيالىق مۇمكىندىكتەرى، پروبلەمالارى مەن پەرسپەكتيۆالارى تالقىلاندى. ونداعان ىسكەرلىك ءىس-شارالاردان باسقا، تاماق ونىمدەرى مەن سۋسىنداردان ءدام تاتىپ كورۋ كاسىبي كونكۋرسى بولىپ ءوتتى.
چەليابى وبلىسى مەن قازاقستاننىڭ 2018 جىلدىڭ ءبىرىنشى جارتى جىلدىعىنداعى تاۋار اينالىمى 1،2 ميلليارد اقش دوللارىنان اسقانىن اتاپ ءوتۋ كەرەك.
نەگىزىنەن بۇل مينەرالدى ونىمدەرگە، مەتالدار مەن ودان جاسالعان بۇيىمدارعا تيەسىلى بولدى. سونداي-اق ءبىز جانۋارلار مەن وسىمدىكتەن الىناتىن ونىمدەرىمەن، مايلارمەن، تاماق ونىمدەرىمەن، سۋسىندارمەن جانە تەمەكىمەن ءوزارا ساۋدا-ساتتىق جاسايمىز.
