ەكولوگيالىق فەستيۆال بۇعان دەيىن قازاقستاننىڭ 12 قالاسىندا وتكەن. «بىرگە جارقىرايمىز!» شاراسىنىڭ اقتاۋدا وتكەن جيىنىندا ءوڭىردىڭ ەكولوگيالىق احۋالى، قالدىقتاردى وڭدەۋ، تۇرعىنداردىڭ قوقىستاردى جۇيەلەۋ پسيحولوگياسىن قالىپتاستىرۋ ماسەلەلەرى تالقىلاندى.
فەستيۆال ماقساتى – ءبىلىم بەرۋ مەكەمەلەرى اراسىندا ەكولوگيالىق مادەنيەتتى دامىتۋ، تازا، جاسىل قالا رەتىندە اقتاۋ يدەولوگياسىن ناسيحاتتاۋ، ەنەرگيا ۇنەمدەيتىن تەحنولوگيالارعا، بولەك قالدىقتاردى جيناۋ ءۇردىسىن بالالار مەن اتا-انالار اراسىندا قالىپتاستىرۋ.
بۇۇ دامۋ باعدارلاماسى، قوعامدىق ماڭىزى بار باستامالاردى دامىتۋ قورىنىڭ ۇيىمداستىرۋىمەن وتكەن فەستيۆال اياسىندا ارنايى بريفينگ ۇيىمداستىرىلدى. وعان ق ر پارلامەنتى ءماجىلىسىنىڭ دەپۋتاتى، ەكونوميكالىق رەفورمانىڭ جانە وڭىرلەردىڭ دامۋى جونىندەدەگى كوميتەتتىڭ مۇشەسى مايرا ايسينا، دامىتۋ قورى ءتوراعاسىنىڭ ورىنباسارى تاتيانا نەمسان، ق ر بۇۇ دب وكىلدەرى، مو تابيعي رەسۋرستار جانە تابيعات پايدالانۋدى رەتتەۋ باسقارماسى باسشىسى دۇيسەن قۇسبەكوۆ، ۇەۇ وكىلدەرى مەن ءماسليحات دەپۋتاتتارى قاتىستى.
ق ر پارلامەنت ءماجىلىسىنىڭ دەپۋتاتى مايرا ايسينا باسقا ءوڭىردىڭ ادامدارىنا ماڭعىستاۋ تابيعاتىنا بەيىمدەلۋ قيىنعا سوعاتىنىن، كەز كەلگەننىڭ مۇنداعى اۋا رايىنا شىداس بەرمەيتىنىن تىلگە تيەك ەتتى.
— ءبىزدىڭ كەلگەن ماقساتىمىز ءبارىن تالقىلاپ، ماسەلەنى 1-2 كۇننىڭ ىشىندە شەشە سالۋ ەمەس. وسى ماسەلەگە حالىقتىڭ نازارىن اۋدارتايىق، ءوزىمىز باستاما جاسايىق دەگەن وي بولدى. استانادا كەڭسەدە وتىرا بەرسەڭ، ايماقتاردا، اۋىلداردا نە بولىپ جاتقانىن بىلمەيسىڭ. ارالاساڭ، قايدا قانداي ماسەلە بار، قاي جەرگە كوڭىل ءبولۋ كەرەكتىگىنەن حاباردار بولاسىڭ، — دەدى ول.
2019 جىلدان باستاپ ماكۋلاتۋرا، شىنى قالدىقتارىن قوقىسقا تاستاۋعا رۇقسات ەتىلمەيتىن بولادى. وسىعان بايلانىستى ماماندار دايىندىق جۇمىستارىن جۇرگىزۋ قاجەتتىگىن ايتىپ، وعان دايىندىق بارىسىن ءسوز ەتتى.
— قوقىس وڭدەۋ زاۋىتىن سالۋعا مۇمكىندىگىمىز بار. ءبىراق بىزدە قوقىستاردى جەكە-جەكە سۇرىپتاۋ پسيحولوگياسى قالىپتاسپاعان. ەۋروپادا قالدىقتاردىڭ وڭدەلۋ كورسەتكىشى 60-70% بولسا، بىزدە 10%. وسىنىڭ ءبارىن رەتتەۋ ءۇشىن بالاباقشادان باستاپ ۋنيۆەرسيتەت ستۋدەنتتەرىنە دەيىن جۇمىستار جۇرگىزۋىمىز كەرەك. ءبىز ەۋروپانىڭ 30-40 جىلدا جەتكەن جەتىستىگىن 10 جىل كولەمىندە جۇزەگە اسىرۋىمىزعا ابدەن بولادى. سوندىقتان پسيحولوگيانى قالىپتاستىرۋ
ءۇشىن جان-جاقتى شارالار قولدانۋ كەرەك، — دەدى تەحنيكا عىلىمدارىنىڭ كانديداتى نۇراددين جايىلحان.
فەستيۆال اياسىندا «بىرگە جارقىرايمىز!» ارت جوباسى، ەنەرگوەففەكتيۆتى كۆەست جانە «ءبىز تازا كاسپيي ءۇشىن» اتتى جاعالاۋداعى تازالىق شارالارى ۇيىمداستىرىلدى.
