بۇل – جانۋاردىڭ بىرنەشە جىلدان سوڭ ماڭعىستاۋعا ورالۋى. ءۇستىرت مەملەكەتتىك تابيعي قورىعى ديرەكتورىنىڭ ورىنباسارى مەڭدىباي اعييەۆتىڭ ايتۋىنشا، الابارىس (لەوپارد) 2015 جىلى قاقپانعا تۇسكەن. ول ادامدارعا شابۋىل جاساعاندىقتان ولتىرىلگەن. ودان بۇرىن شامامەن 2005 جىلى پايدا بولعانىمەن، ءبىراق ەش جەرگە جاريالانباپتى.

بۇل جولى ءۇستىرت قورىعىنا كەلگەن جىرتقىش 29 قىركۇيەك كۇنى قورىقتىڭ فوتوتۇزاعىنا ءتۇسىپ قالعان.

ء-بىز اڭداردى قاراپ وتىرۋ ءۇشىن فوتوتۇزاق قۇرىپ قويامىز. بۇل الابارىس كوكەسەم شوقىسىنىڭ وڭتۇستىك باعىتىندا 40 شاقىرىمدا «جامان كەندىرلى» بۇلاعىنىڭ ماڭىنداعى فوتوتۇزاققا ءتۇسىپ قالعان. بۇل – ءبىز ءۇشىن جاڭالىق، ويتكەنى لەوپارد بۇرىن ءبىزدىڭ جانۋارلارىمىزدىڭ تىزىمىندە بولماعان، ەندى تىركەپ قويامىز. عالىمداردىڭ ايتۋى بويىنشا، جانۋار تۇركمەنستان ەلىندە بار، سول جاقتان كەلگەن بولۋى مۇمكىن، - دەيدى مەڭدىباي اعييەۆ.

جالپى الابارىس افريكادا، ازيادا، تۇرىكمەنستاندا، رەسەيدىڭ قيىر شىعىسىندا ءجيى ۇشىراسادى. نەگىزىنەن تۇياقتى اڭدارمەن (بۇعى، ەلىك، ارقار، ت.ب.) قورەكتەنەدى.

شاپشاڭ قيمىلدايتىن جانۋاردى «كوزبەن كورگەن» فوتوتۇزاقتىڭ بۇگىندە قورىق اۋماعىنا 8 داناسى قۇرىلعان. ءارقايسىسىنىڭ قۋاتى 2 ايعا جەتەدى.

-ول اڭ، قۇس، كەز كەلگەن قوزعالعان نارسەنى سۋرەتكە ءتۇسىرىپ تۇرادى. باتارەياسىنىڭ قۋاتى ەكى ايعا دەيىن جەتەدى. دەگەنمەن ءبىز ەكى اپتادا، ءبىر ايدا تەكسەرىپ، سۋرەتتەرىن قۇيىپ الىپ وتىرامىز، - دەيدى مەڭدىباي اعييەۆ.

بۇعان دەيىن اپپاراتقا لەوپاردتان وزگە بۇرىن كوزگە كورىنبەي جۇرگەن قاراقۇلاق، مىسىقتىڭ تۇرلەرى، دالا مىسىعى تۇسكەن. قورىق ماماندارى ەندى يتايۋ جانۋارىن ءتۇسىرۋدى جوسپارلاپتى.