استانادا وتكەن بۇركىتشىلەردىڭ xالىقارالىق تۋرنيرىندە ماڭعىستاۋلىق قۇسبەگى ايشۋاق تايمانوۆ جەڭىمپاز اتاندى.
20-21 قازان كۇندەرى استانا قالاسى الاش تاس جولىنىڭ بويىندا كۇنتۋعان توقتىباي ۇلى اتىنداعى حالىقارالىق قۇسبەگىلەر جارىسى ءوتتى. ەكى كۇنگە سوزىلعان جارىسقا موڭعوليا، قىرعىزستان، قازاقستاننان وتىزعا جۋىق قىران مەن ەلىمىزدىڭ ون وبلىسىنان قۇسبەگىلەر قاتىستى. قىران قۇستار سايىسىنىڭ ناتيجەسى بويىنشا جامبىل وبلىسى I ورىن، اتىراۋ وبلىسى II ورىن، ماڭعىستاۋ وبلىسى III ورىن الدى. كىشى قۇستاردان، ياعني يتەلگى سايىسىنان I ورىندى ماڭعىستاۋ وبلىسى، II ورىندى استانا قالاسى، III ورىندى اتىراۋ وبلىسى يەمدەندى.
«يتەلگىم ءالى بالاپان. ەسىمى – جەبە. دايىنداعانىما 3-4 اي بولدى. يتەلگىمدى ءالى دالا اڭىنا سالىپ كورگەنىم جوق. بالاپان بولعاندىقتان، تەك وسى سايىس ەرەجەسى بويىنشا دايىندادىم. نەگىزگى سۇيىكتى ءىسىم – قۇسبەگىلىك. يتەلگىمدى تەك جارىسقا دايىنداعان بولاتىنمىن. ال اڭعا الدىمىزدا كەلە جاتقان قانسوناردا سالامىن»، — دەدى ماڭعىستاۋلىق جەڭىمپاز ايشۋاق تايمانوۆ.
تايمانوۆ ايشۋاق، بۇركىتشى، 1988 جىلى تۇششىبەك اۋىلىندا دۇنيەگە كەلگەن. بوس ۋاقىتىندا قۇس ۇشىرىپ، قاقپان قۇرۋمەن، ساياتشىلىقپەن اينالىسادى.
قۇسبەگى اۋىلدا باۋىرلارىنا ەرىپ، سولاردان كورىپ قۇسقا دەگەن قىزىعۋشىلىعى ويانعانىن ايتادى. بالا كەزىنەن ۇلكەن اكەسى مەن ءوز اكەسىنە ەرىپ قاقپان قۇرىپ وسكەن. ال قۇسبەگىلىك شاڭىراعىندا مۇلدەم بولماعان دەيدى.
«جارىسقا بۇركىت پەن يتەلگىمدى اپاردىم. يتەلگى — كىشى قۇس. الاتىن اڭىنىڭ ەڭ ءىرىسى - قويان، ۇيرەك سەكىلدى اڭدار. ال بۇركىت بابىنا كەلسە، قاسقىرعا دەيىن الادى. ەڭ قيىنى — بۇركىتتى باپتاۋ. ونى اڭعا سالۋ ءۇشىن 40-45 كۇن ارىتادى. ەڭ ءبىرىنشى ورىندا بۇركىتتىڭ ءىش-قۇرىلىسىنىڭ تازالىعى. ەگەر قىراننىڭ اسقازانىندا ماي بولسا، قۇس سالعان اڭىنا اينىپ، بارماي قالادى. سونىڭ بارلىعىن قاداعالاپ وتىرۋ قاجەت. قۇستى باپتاعاندا بوز جەم، اق جەم، سارى بورتپە بەرىپ باپتايمىز»، — دەيدى قۇسبەگى ايشۋاق تايمانوۆ.
