بۇل جونىندە قوعامدىق دەنساۋلىق ساقتاۋ قىزمەتى ءبولىمىنىڭ باسشىسى عالىم التۋرايەۆ مالىمدەدى. ماڭعىستاۋ وبلىسى 2018 جىلدىڭ 1 ساۋىرىنەن باستاپ مەديسينالىق قۇجاتتامانى قاعازسىز جۇرگىزۋ بويىنشا پيلوتتىق جوباعا ەندى. 2017 جىلى مەديسينالىق اقپاراتتىق جۇيە 4 دەنساۋلىق ساقتاۋ ۇيىمىندا بولسا، بۇگىندە 34 ۇيىمعا (29 – مەملەكەتتىك، 5 – جەكە مەنشىك) ەنگىزىلگەن.

ماڭعىستاۋ وبلىسىندا 89 مەديسينالىق نىساننىڭ بارلىعى 100 پايىز ينتەرنەت جەلىسىمەن قامتىلعان. 2612 جۇمىس ورنى 98 پايىزعا كومپيۋتەرلىك تەحنيكامەن جابدىقتالعان. 5911 مەديسينالىق قىزمەتكەر مينيسترلىك پورتالدارىن پايدالانادى.

— وبلىستا 20-60 جاس ارالىعىنداعى 345 مىڭ ينتەرنەتبەلسەندى حالىق بار. ولاردىڭ 116 357ء-سى «DamuMed» ءموبيلدى قوسىمشاسىن پايدالانۋشىلار. سونىمەن قاتار وبلىستاعى بارلىق مەديسينالىق ۇيىمدارعا تىركەلگەن حالىق سانى 676 109 بولسا، ونىڭ 636 016-سىنىڭ ەلەكتروندى دەنساۋلىق كۋالىكتەرى تولتىرىلعان. ماج-دە 1 709 840 ادام مەديسينالىق قىزمەت العان، — دەيدى عالىم بيسەنباي ۇلى.

«DamuMed» ءموبيلدى قوسىمشاسى ارقىلى ەڭبەككە جارامسىزدىق پاراقتارى مەن لابوراتوريالىق زەرتتەۋلەردىڭ ناتيجەلەرىن الۋعا بولادى. سونداي-اق دارىگەردى ۇيگە شاقىرۋ قىزمەتى، دارىگەرگە ونلاين جازىلۋ مۇمكىندىگى قاراستىرىلعان. تەكسەرىستەن ءوتۋىڭىز قاجەتتىگى جونىندە (پرافيلاكتيكا، سكرينينگ، فليۋوروگرافيا ت.ب.) ەسكەرتپە كەلىپ تۇرادى. قوسىمشانىڭ «مەنىڭ دەنساۋلىعىم» ءبولىمى تىركەۋدە تۇرعان جۇكتى ايەلدەرگە قىزمەت ەتەدى. مەديسينالىق جۇيە قولدانىسقا ەنگىزىلگەننەن باستاپ 49 347 دارىگەردى ۇيگە شاقىرۋ قىزمەتى ورىندالعان. ونىڭ 21 مىڭنان استامى ءموبيلدى قوسىمشا ارقىلى جۇرگىزىلگەن.