ماڭعىستاۋ وبلىسى اكىمى ەرالى توعجانوۆتىڭ قاتىسۋىمەن وتكەن اپپاراتتىق جيىندا "جۇمىسپەن ناتيجەلى قامتۋ جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان" ەڭبەك باعدارلاماسىن ىسكە اسىرۋدىڭ الدىن الا قورىتىندىلارى قارالدى.

2017 جىلدىڭ ناۋرىز ايىندا باستالعان باعدارلاما جۇمىسسىز جانە ءوزىن-وزى جۇمىسپەن قامتىپ وتىرعان حالىقتى جاپپاي وقىتۋ، كاسىپكەرلىك نەگىزدەرىنە وقىتۋ جانە جەڭىلدەتىلگەن شاعىن كرەديت بەرۋ ارقىلى كاسىپكەرلىك باستامالاردى قولداۋعا، ەڭبەك ۇتقىرلىعىن ارتتىرۋعا باعىتتالعان. بيىل باعدارلامانى ىسكە اسىرۋعا 2،8 ملرد.تەڭگە قاراستىرىلعان.

"باعدارلاماعا سايكەس 1131 ادامدى 15 ۇيىمدا وقىتۋ كوزدەلىپ وتىر. ولار، ەڭ الدىمەن، ۇبت تاپسىرماعان جانە وقۋ ورىندارىنا تۇسپەگەن مەكتەپ تۇلەكتەرى. ستۋدەنتتەر تەگىن وقيدى، سونىمەن قاتار شاكىرتاقى تولەنىپ، كۇنىنە ءبىر رەت ىستىق تاماق بەرىلەدى. باسقا قالالاردان كەلگەندەرگە جول ءجۇرۋ جانە تۇرۋ شىعىندارىنا ماتەريالدىق كومەك بەرۋ كوزدەلگەن. سونداي-اق كوللەدجدە جانە وقۋ ورتالىقتارىندا 712 ادام قىسقا مەرزىمدى كۋرس وقىدى. وقۋ مەرزىمى ەڭبەك نارىعىندا سۇرانىسقا يە ماماندىقتار بويىنشا 1 ايدان 6 ايعا دەيىن. وقۋدان كەيىن 187 ادام جۇمىسقا ورنالاستىرىلدى»،- دەدى ماڭعىستاۋ وبلىسىنىڭ جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ باسشىسى قۋانىش بەرىشبايەۆ.

ال «اتامەكەن» ۇكپ ماڭعىستاۋ وبلىسى بويىنشا باسشىسى نۇربەك قاراسايەۆتىڭ ايتۋىنشا، "باستاۋ بيزنەس" باعدارلاماسى بويىنشا 880 ادام وقىتىلعان. سونداي-اق جالپى سوماسى 605،2 ملن.تەڭگەنى قۇرايتىن 192 جوبا جۇزەگە اسىرىلعان.