مۇرات موڭكە ۇلىنىڭ 175 جىلدىعىنا ارنالعان حالىقارالىق عىلىمي كونفەرەنسياعا 300 عىلىم مەن ءبىلىم وكىلى قاتىستى، دەپ حابارلايدى اتىراۋ وبلىستىق وڭىرلىك كوممۋنيكاسيالار قىزمەتى.

«مۇرات موڭكە ۇلى مۇراسى جانە تۋعان جەر يدەياسى» تاقىرىبىنداعى عىلىمي-تاجىريبەلىك كونفەرەنسيا ح.دوسمۇحامەدوۆ اتىنداعى
اتىراۋ مەملەكەتتىك ۋنيۆەرسيتەتىندە بولدى. بۇل كەزدەيسوق ەمەس. مۇرات موڭكە ۇلىنىڭ شىعارمالارىن العاش زەرتتەگەن حالەل دوسمۇحامەدوۆ ەدى، عالىم اقىننىڭ ادەبي مۇراسىن جيناپ، ءوز باعاسىن بەرگەن. ءار جىلدارى ادەبيەتتانۋشىلار، اقىندار مەن جازۋشىلار مۇرات شىعارماشىلىعىن زەرتتەۋمەن اينالىستى. كونفەرەنسياعا قاتىسقان بايانداماشىلار مۇرات موڭكە ۇلىنىڭ ادەبي مۇراسى وسكەلەڭ ۇرپاقتى وتانسۇيگىشتىككە باۋلۋدا زور ماڭىزعا يە ەكەنىن اتاپ ءوتتى.

- بۇگىنگى كونفەرەنسيا مەملەكەت باسشىسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا ۇيىمداستىرىلىپ وتىر. ەلىمىزدىڭ قالىپتاسۋىنا ۇلكەن ۇلەس قوسقان تۇلعالاردى ناسيحاتتاۋ-ماقساتىمىز. بابالارىمىز كەڭ بايتاق قازاق جەرىن ساقتاپ قالدى. ەندى ءبىزدىڭ مىندەتىمىز جۇرتشىلىققا اتالارىمىزدىڭ ەرلىك داستانىن، اقىن-جازۋشىلارىمىزدىڭ شىعارمالارىن ناسيحاتتاۋ. مۇرات موڭكە ۇلى اتىراۋ وبلىسىنىڭ ءار تۇرعىنىنىڭ جۇرەگىنەن ورىن الادى. ءبىزدىڭ اقىنىمىزدى، تالانتتى ايتىسكەرىمىزدى ءبارى ءبىلۋى كەرەك. ۋاقىتتارىن ءبولىپ، وسى شاراعا قاتىسقان بارلىق عالىمدارعا العىس ايتامىن، - دەدى اتىراۋوبلىسىنىڭ اكىمى نۇرلان نوعايەۆ.