ت.جۇرگەنوۆ اتىنداعى قازاق ۇلتتىق ونەر اكادەمياسىندا مەملەكەت جانە قوعام قايراتكەرى، ءبىلىم مەن ونەردىڭ ناعىز جاناشىرى تەمىربەك جۇرگەنوۆتىڭ تۋىلعانىنا 120 جىل تولۋىنا ارنالعان حالىقارالىق عىلىمي-پراكتيكالىق كونفەرەنسيا بولىپ ءوتتى.                                                                               

جيىن تاقىرىبى: «قازاقستان مەن ورتا ازياداعى ءبىلىم بەرۋدى، مادەنيەتتى جانە ونەردى ۇلتتىق سانانىڭ كەمەلدەنۋىندەگى بىرەگەي تاجىريبە رەتىندە جاڭعىرتۋ» دەپ اتالدى. ۇلت قايراتكەرى تەمىربەك جۇرگەنوۆ قازاق ونەرى مەن ءبىلىمىن دامىتۋعا ۇلكەن ۇلەس قوسقان ءبىرتۋار ازاماتتاردىڭ ءبىرى. شارانىڭ  ماقساتى – جۇرگەنوۆتىڭ تاعىلىمى مول ونەگەلى عۇمىرىن كەيىنگى ۇرپاق وكىلدەرىنە كەڭىنەن ناسيحاتتاۋ ەدى.

حالىقتىڭ ارداقتى ۇلى، مەملەكەت قايراتكەرىنىڭ 120 جىلدىق مەرەيتويى اياسىنداعى سالتاناتتى جيىننىڭ  اشىلۋىمەن اكادەميا رەكتورى مىندەتىن اتقارۋشى، پروفەسسور ش.امىربەكوۆ قۇتتىقتاپ،  جىلى لەبىزىن ءبىلدىردى.

اتالعان كونفەرەنسياعا: ش.ءۋاليحانوۆ اتىنداعى تاريح جانە ەتنولوگيا ينسيتيۋتى ديرەكتورىنىڭ ورىنباسارى، پروفەسسور س.بورباسوۆ، م.ۇلۋعبەك اتىنداعى وزبەكستان ۇلتتىق ۋنيۆەرسيتەتىنىڭ پروفەسسورى ز.يشانحودجايەۆا، رەسەي-تاجىك سلاۆيان ۋنيۆەرسيتەتىنىڭ كافەدرا مەڭگەرۋشىسى، دوسەنت ا.ارتىقوۆ، قوعامدىق قور، ۇكىمەتتىك ەمەس ۇيىمدار جەتەكشىلەرى، جوو-نىڭ وقىتۋشى-پروفەسسورلارى، دوكتورانتتارى، تەمىربەك قارا ۇلىنىڭ تۋىسقاندارى، سونىمەن بىرگە ل.گۋميليەۆ اتىنداعى ەۇۋ تەلەراديو جانە قوعاممەن بايلانىس كافەدراسىنىڭ دوسەنتى ب.يمانعالييەۆ قاتىستى.

       ءىس-شارا بارىسىندا ارنايى كورمە ۇيىمداستىرىلىپ، دەرەكتى فيلم كورسەتىلدى. ت.جۇرگەنوۆتىڭ قايراتكەرلىك، قالامگەرلىك، ازاماتتىق بولمىسى جايىندا ءسوز بولدى. جۇرگەنوۆتانۋشى-عالىم ب.يمانعالييەۆ ناركوم جۇرگەنوۆ تۋرالى ارنايى بايانداما جاساپ، قايراتكەردىڭ رەسپۋبليكا تاريحىندا الار قوعامدىق-ساياسي ورنى، قالامگەرلىك مۇراسى، جاس ۇرپاققا بەرەر ونەگەسى جانە تىڭ ۇسىنىستارىن جەتكىزدى. شىعىپ سويلەۋشىلەر دە اعارتۋ كوميسسارىنىڭ قيلى عۇمىرى، اتقارعان قىزمەتى تۋرالى ەستەلىكتەر ايتتى.

ت.جۇرگەنوۆ اتىنداعى قوعامدىق قوردىڭ ءتوراعاسى سابي انسات: «دارا تۇلعانىڭ قايراتكەرلىگىن باعالاۋدا ءۇش ولشەم بار: – بيىكتىك، تەرەڭدىك، كەڭدىك. تابيعي تالانتتاردى ىزدەپ تابۋ، تانۋ، ولارعا جاعداي جاساپ، ونەر كوگىندە جارقىراي كورىنۋلەرىنە، اشتىقتان تۇرالاعان، قانسىراعان مەملەكەتتى ءۇش جىلدا، ياعني، 1936 جىلى ماسكەۋدەگى ونكۇندىكتە قازاق ۇلتىنىڭ رۋحى بيىك، مادەنيەتى مەن ادەبيەتىنىڭ ەشبىر ەلدەن كەم ەمەستىگىنىڭ كورىنىس تابۋى جۇرگەنوۆتىڭ قايسار قايراتكەرلىگى مەن وراسان زور ىسكەرلىگى، ۇيىمداستىرۋشىلىق قابىلەتىنىڭ اۋقىمدىلىعى، ءبىر سوزبەن ايتقاندا بيىكتىگى ەدى. ماسكەۋدە وقىپ جاتقان قازاق ازاماتتارىنا قارجىلاي دەمەۋشىلىك جاساپ تۇرعان جانە قازاق، وزبەك، تاجىك ازاماتتارىن بىلىمدەرىن كوتەرۋگە رەسەيدىڭ ورتالىق قالالارىنا جىبەرگەن، ولار ءوز كەزەگىندە ىرگەلى ءبىلىم وردالارىنان العان بىلىمدەرىمەن ءوز ەلدەرىنىڭ مادەنيەتىن، ونەرىن، ادەبيەتىن كوتەرگەن. بۇل – تەمىربەك جۇرگەنوۆتىڭ كورەگەندىگىنىڭ جانە كەڭدىگىنىڭ دالەلى»، - دەپ ايرىقشا اتاپ ءوتتى بايانداماسىندا.

ايتا كەتۋ كەرەك، ل.گۋميليەۆ اتىنداعى ەۋرازيا ۇلتتىق ۋنيۆەرسيتەتىنىڭ دوسەنتى يمانگالييەۆ باۋىرجان بەلگىلى جوعارى وقۋ ورىندارىندا ستۋدەنتتەر ءۇشىن تەمىربەك جۇرگەنوۆ اتىنداعى ستيپەنديا تاعايىنداۋ، ورتا مەكتەپ وقۋلىقتارىنا «تۇلعاتانۋ» باعدارلاماسى بويىنشا تەمىربەك جۇرگەنوۆتىڭ ءومىرى مەن قايراتكەرلىگى جايلى ماعلۇمات ەنگىزۋ ماسەلەلەرىن ۇسىندى.

جيىندا  عالىمدار اسا ءىرى مەملەكەت جانە قوعام قايراتكەرىنىڭ ءومىرى مەن ەلگە سىڭىرگەن ەڭبەگى جايلى رۋحاني-تاعىلىمى مول ويلاردى ورتاعا سالدى.