ماجىلىستە «قازاقستان رەسپۋبليكاسىنىڭ جاڭا كونستيتۋسياسىن قابىلداۋعا بايلانىستى راقىمشىلىق جاساۋ تۋرالى» زاڭ جوباسى ءبىرىنشى وقىلىمدا تانىستىرىلدى. قۇجات مەملەكەت باسشىسىنىڭ بيىل 17 ناۋرىزدا جاريالاعان باستاماسىن ىسكە اسىرۋعا باعىتتالعان.

زاڭ جوباسىن تانىستىرعان دەپۋتات ابزال قۇسپاننىڭ ايتۋىنشا، بۇل جولعى راقىمشىلىقتىڭ ەرەكشەلىگى – قازاقستاندا العاش رەت قىلمىستىق جانە اكىمشىلىك راقىمشىلىق قاتار جۇرگىزىلەدى.

قۇجاتقا سايكەس، قىلمىستىق تەرىس قىلىقتار، اۋىرلىعى از قىلمىستار، سونداي-اق كەلتىرىلگەن زالالى تولىق وتەلگەن ورتاشا اۋىر قىلمىستار بويىنشا قىلمىستىق ىستەر توقتاتىلۋى مۇمكىن. سونداي-اق وسى ساناتتاعى قىلمىستار ءۇشىن سوتتالعان ازاماتتاردى جازادان بوساتۋ جانە ورتاشا اۋىر، اۋىر جانە اسا اۋىر قىلمىستار بويىنشا سوتتالعانداردىڭ جازاسىنىڭ وتەلمەگەن بولىگىن قىسقارتۋ ۇسىنىلىپ وتىر.

سونىمەن بىرگە راقىمشىلىق سىبايلاس جەمقورلىق، تەرروريزم، ەكسترەميزم، كامەلەتكە تولماعاندارعا قارسى جىنىستىق قىلمىستار، ازاپتاۋ، قايتالانعان اۋىر قىلمىستار جانە باسقا دا قوعامدىق ءقاۋىپتى ارەكەتتەر جاساعاندارعا قولدانىلمايدى.

زاڭ جوباسى اكىمشىلىك قۇقىق بۇزۋشىلىقتار ءۇشىن سالىنعان ايىپپۇلداردى دا كەشىرۋدى كوزدەيدى. اتاپ ايتقاندا، جەكە تۇلعالار، جەكە كاسىپكەرلەر، نوتاريۋستار، جەكە سوت ورىنداۋشىلارى، ادۆوكاتتار مەن زاڭ كونسۋلتانتتارى اكىمشىلىك ايىپپۇلدان بوساتىلۋى مۇمكىن. الايدا بۇل جەڭىلدىك سوتتار تاعايىنداعان ايىپپۇلدارعا جانە قوعامدىق قاۋىپسىزدىككە قاتەر توندىرەتىن قۇقىق بۇزۋشىلىقتارعا قاتىستى قولدانىلمايدى.

دەپۋتاتتىڭ مالىمەتىنشە، راقىمشىلىق جاساۋ تۋرالى تۇپكىلىكتى شەشىمدى ءار سوتتالعان ادامعا قاتىستى سوت جەكە قارايدى.

سونداي-اق زاڭ جوباسىندا باس بوستاندىعىنان ايىرۋ ورىندارىنان بوساتىلاتىن ازاماتتاردى قوعامعا بەيىمدەۋ جانە قايتا الەۋمەتتەندىرۋ مىندەتى جەرگىلىكتى اتقارۋشى ورگاندارعا جۇكتەلەدى.

زاڭ قابىلدانعان جاعدايدا، ول قوسىمشا بيۋدجەت شىعىندارىن تالاپ ەتپەيدى جانە الەۋمەتتىك-ەكونوميكالىق تەرىس سالدارعا اكەلمەيدى دەپ كۇتىلۋدە.