الماتىداعى مەدەۋ بيىك تاۋلى سپورت كەشەنىندە مەملەكەتتىك رامىزدەر كۇنىنە ارنالعان قازاقستان رەسپۋبليكاسىنىڭ مەملەكەتتىك تۋىن سالتاناتتى كوتەرۋ ءراسىمى ءوتتى.

پاتريوتتىق ءىس-شاراعا الماتى اكىمى دارحان ساتىبالدى، مادەنيەت جانە سپورت قايراتكەرلەرى، ءماسليحات دەپۋتاتتارى، قوعام قايراتكەرلەرى، قازاقستان حالقى اسسامبلەياسى مۇشەلەرى، سونداي-اق جاستار ۇيىمدارىنىڭ وكىلدەرى قاتىستى. سالتاناتتى راسىمگە جالپى سانى ءبىر جارىم مىڭنان استام ادام جينالدى.

رەسمي ءبولىم اياقتالعاننان كەيىن مەرەكەلىك ءىس-شارا شىعارماشىلىق ۇجىمدار مەن ونەرپازداردىڭ  كونسەرتىمەن جالعاستى.

سونداي-اق، قالاداعى بارلىق اۋداندا سالتاناتتى ءىس-شارالار ۇيىمداستىرىلىپ، مەملەكەتتىك ءانۇران جاپپاي ورىندالدى. الماتى تۇرعىندارى ەل ءانۇرانىن ساياباقتاردا، مەكتەپتەردە جانە وزگە دە قوعامدىق ورىنداردا ورىنداپ، مەملەكەتتىك رامىزدەردىڭ ماڭىزى مەن ۇلتتىق بىرلىكتىڭ ءمانىن ايقىنداي ءتۇستى.

مەرەكە اياسىندا قالادا تاقىرىپتىق كونفەرەنسيالار، جاستار چەللەندجدەرى مەن اعارتۋشىلىق اكسيالار وتكىزىلدى. ارباتتاعى عيماراتتار مەن الماتى قوناق ءۇيى عيماراتىنىڭ قاسبەتتەرىنە مەملەكەتتىك تۋلار ءىلىندى.

مەرەكەلىك باعدارلامانىڭ قورىتىندىسى رەتىندە كوكتوبە اۋماعىندا اشىق اسپان استىندا (Open Air) كونسەرت وتەدى. وعان قازاقستاننىڭ تانىمال ونەرپازدارى قاتىسادى.