مەملەكەتتىك رامىزدەر كۇنى قارساڭىندا الماتى وبلىسىندا پاتريوتتىق رۋح پەن سۇيىسپەنشىلىك سەزىمىن وياتاتىن مازمۇندى شارالار لەگى تولاستاعان جوق. سولاردىڭ ءبىرى قونايەۆ قالاسىنداعى ورتالىق الاڭدا ءوتتى. شارا بارىسىندا ارنايى تىكۇشاق كوك تۋىمىزدى كوك اسپاندا قالىقتاتىپ، جينالعان قاۋىمنىڭ رۋحىن وياتتى. ءانۇرانىمىز اۋەلەتە شىرقالىپ، ەلتاڭبانىڭ تاۋەلسىزدىگىمىزدىڭ سيمۆولى رەتىندەگى ءمان-ماڭىزى ناسيحاتتالدى. مەملەكەتتىك قىزمەتكەرلەر انت قابىلداپ، وبلىستىڭ دامۋ جولىندا ايانباي ەڭبەك ەتكەن جاندار ماراپاتتالدى.

سالتاناتتى جيىندا مەملەكەتتىك تۋدىڭ اۋەدە قالىقتاعان اسەرلى ءساتى ەرەكشە ەستە قالدى. قونايەۆ اسپانىندا جەلبىرەگەن كوك بايراعىمىز تاۋەلسىز ەلدىڭ اسقاق بولمىسىن، بەرەكە-بىرلىگى مەن جارقىن بولاشاققا دەگەن سەنىمىن ايقىن كورسەتتى. جينالعان قاۋىمنىڭ بويىندا ماقتانىش سەزىمىن وياتىپ، مەملەكەتتىك رامىزدەرگە دەگەن قۇرمەتىن ودان ءارى ارتتىرا ءتۇستى.

شاراعا وبلىس اكىمى مارات سۇلتانعازييەۆ قاتىسىپ، تۇرعىنداردى ايتۋلى مەرەكەمەن قۇتتىقتادى.
«1992 جىلى 4 ماۋسىمدا تاۋەلسىز قازاقستاننىڭ العاشقى مەملەكەتتىك تۋى مەن ەلتاڭباسى رەسمي تۇردە بەكىتىلىپ، شەجىرەمىزدىڭ جاڭا پاراعى اشىلدى. شاكەن نيازبەكوۆتىڭ ايبىندى كوك تۋى مەن جانداربەك مالىبەكوۆ پەن شوت-امان ءۋاليحانوۆتىڭ بىرەگەي ەلتاڭباسى، كەيىننەن ءشامشى قالداياقوۆتىڭ اۋەزدى انىمەن تولىققان ءانۇرانىمىز ۇلتتىق بولمىسىمىز بەن ازاتتىق رۋحىمىزدىڭ ماڭگىلىك سيمۆولىنا اينالدى.

مەملەكەت باسشىسى قاسىم-جومارت توقايەۆ: «ۇلت رامىزدەرى – تاۋەلسىزدىگىمىزدىڭ كيەلى بويتۇمارى، مىزعىماس مەملەكەتتىگىمىزدىڭ بەلگىسى. قاستەرلى نىشاندارىمىز قازاقستاننىڭ ەگەمەن ەل، ەڭسەلى جۇرت ەكەنىن جەر جۇزىنە ايگىلەيدى»، – دەپ رامىزدەردىڭ ماڭىزدىلىعىنا ەرەكشە توقتالعان بولاتىن.
بيىلعى مەرەكەنىڭ ءبىز ءۇشىن ماڭىزى تىپتەن ەرەكشە، سەبەبى ەلىمىز جالپىحالىقتىق رەفەرەندۋمدا قابىلداعان جاڭا كونستيتۋسيانىڭ قاعيداتتارىنا سۇيەنە وتىرىپ، دامۋدىڭ جاڭا كەزەڭىنە قادام باستى. جاڭارعان اتا زاڭىمىز – ادىلەتتى قازاقستاندى قۇرۋ جولىنداعى مەملەكەتىمىزدىڭ ەگەمەندىگى مەن تۇتاستىعىنىڭ باستى كەپىلى. وسىعان وراي، «رامىزدەر رۋحى – كونستيتۋسيا كۇشى» جالپىۇلتتىق پاتريوتتىق اكسياسى اياسىندا قوعامدا ۇلتتىق رۋح بەكەمدەلىپ، اتا زاڭ مەن رامىزدەرگە دەگەن قۇرمەت مادەنيەتى جاڭا دەڭگەيگە كوتەرىلۋدە.

مەملەكەتتىك رامىزدەرىمىزدە بۇكىل قازاقستان حالقىن بىرىكتىرەتىن قۇدىرەتتى كۇش بار. تاۋەلسىزدىگىمىزدىڭ التىن كۇمبەزى سانالاتىن نىشاندارىمىزدىڭ مارتەبەسى ارتا بەرسىن»، – دەدى ايماق باسشىسى.

سونداي-اق ءوڭىر دامۋىنا ۇلەس قوسىپ جۇرگەن ءبىرقاتار ازاماتتى مەملەكەتتىك ناگرادامەن ماراپاتتادى. سولاردىڭ ءبىرى – 40 جىلعا جۋىق ۋاقىت بويى ءبىلىم سالاسىندا ەڭبەك ەتكەن، قاراساي اۋدانى شالقار ورتا مەكتەبىنىڭ ديرەكتورى بانۋ امانوۆا. «بۇگىنگى مەملەكەتتىك رامىزدەر كۇنىندە «قۇرمەت» وردەنىمەن ماراپاتتالۋ مەن ءۇشىن ۇلكەن مارتەبە. بۇل مەنىڭ عانا ەمەس، ءبىلىم سالاسىنا ولشەۋسىز ۇلەس قوسىپ كەلە جاتقان بارلىق ارىپتەستەرىمنىڭ، بارلىق ۇستازداردىڭ ەڭبەگى دەپ باعالايمىن. وسى قاجىرلى ەڭبەگىمىزدى ەلەپ-ەسكەرىپ جاتقان پرەزيدەنتىمىزگە، وبلىس اكىمدىگىنە، وبلىستىق ءبىلىم باسقارماسىنا العىسىم شەكسىز. تاۋەلسىزدىگىمىز تۇعىرلى بولسىن. كوك تۋىمىز، ءانۇرانىمىز بەن ەلتاڭبامىز وتانىمىزبەن بىرگە ماڭگى جاساسىن. ەلىمىزدىڭ داڭقى اسقاقتاي بەرسىن»، – دەدى ماراپات يەسى.

شارا بارىسىندا مەملەكەتتىك قىزمەتتىڭ ءتۇرلى باعىتىندا ەڭبەك جولىن باستاعان ماماندار ەلگە ادال قىزمەت ەتىپ، كونستيتۋسيا زاڭدارىن بەرىك ساقتاۋعا سالتاناتتى تۇردە انت بەردى.
وسىلايشا، ەگەمەندىك ايشىعى بولعان مەملەكەتتىك رامىزدەر كۇنى الماتى وبلىسىندا ءمانى تەرەڭ، كوڭىلگە رۋحاني سەرپىلىس سىيلايتىن مازمۇندى شارالارمەن جوعارى دەڭگەيدە اتالىپ ءوتتى.