وبلىس اكىمى بەردىبەك ساپاربايەۆ 24 قازان كۇنى جۇمىس بابىمەن مۇعالجار اۋدانىندا بولىپ، مەملەكەتتىك باعدارلامالاردىڭ جۇزەگە اسىرىلۋىمەن تانىستى جانە بىرنەشە الەۋمەتتىك نىسانداردىڭ اشىلۋىنا قاتىستى.

قاندىاعاش قالاسىندا بەردىبەك ساپاربايەۆ مەملەكەتتىك-جەكەمەنشىك ارىپتەستىك اياسىندا سالىنعان 170 ورىندىق بالاباقشانىڭ سالتاناتتى اشىلۋىنا قاتىستى. مەكتەپكە دەيىنگى مەكەمە عيماراتىنىڭ جالپى الاڭى مىڭ شارشى مەتر. جوبا قۇنى - 60 ملن تەڭگە. «باقىتتى بالا» بالاباقشاسى بارلىق قاجەتتى جابدىقتارمەن جاراقتانعان، بالالاردىڭ جەكە، شىعارماشىلىق قابىلەتىن دامىتۋ ءۇشىن جاعداي جاسالعان. ماتەريالدىق-تەحنيكالىق بازاسىمەن تانىسقان وبلىس باسشىسى بالاباقشاعا تەلەديدار تارتۋ ەتتى.

ايتا كەتەيىك، جىل باسىنان بەرى وبلىستا 3700 ورىنعا 37 جاڭا مەكتەپكە دەيىنگى مەكەمە اشىلعان. وبلىستىڭ بارلىق اۋداندارىنداعى 3-6 جاس ارالىعىنداعى بالالار مەكتەپكە دەيىنگى بىلىممەن 100% قامتىلعان.

وسى كۇنى قاندىاعاشتا سونداي-اق، الپىس پاتەرلى بەسقاباتتى تۇرعىن ءۇي دە پايدالانۋعا بەرىلدى. بۇل كۇنى كوپبالالى وتباسىلار، جەتىم بالالار، مۇگەدەكتەر مەن بيۋدجەت سالاسىنىڭ قىزمەتكەرلەرى قونىس تويىن تويلادى.

- ءاربىر ادام ءۇشىن ءوزىنىڭ باسپاناسى بولعانى ماڭىزدى. سوندىقتان، تاۋەلسىزدىك العان كۇننەن باستاپ پرەزيدەنت حالىقتىڭ ءال-اۋقاتىن كوتەرۋگە، سونىڭ ىشىندە ءاربىر قازاقستاندىقتى تۇرعىن ۇيمەن قامتاماسىز ەتۋگە باسا نازار اۋدارىپ كەلەدى. سول ءۇشىن كوپتەگەن مەملەكەتتىك باعدارلامالار قابىلدانىپ جاتىر. ماسەلەن، بۇگىندە «نۇرلى جەر»، «7-20-25» باعدارلامالارى ءتيىمدى جۇزەگە اسىرىلۋدا. تەك قاندىاعاشتىڭ وزىندە بيىل 240 پاتەر بەرىلدى، ال جالپى وبلىستا وسى كەزەڭنىڭ ىشىندە كەم دەگەندە 870 مىڭ شارشى مەتر تۇرعىن ءۇي سالىناتىن بولادى، - دەدى بەردىبەك ساپاربايەۆ قۇتتىقتاۋ سوزىندە.

جاڭا قونىس يەلەرىنە جىلۋلىق پەن وتباسى جايلىلىعىن تىلەگەن وبلىس اكىمى ازات ابييەۆتىڭ ۇيىندە قوناقتا بولدى. جاس جىگىت جەتىم بالا رەتىندە ءۇي كەزەگىندە تۇرعان. بۇگىن ونىڭ ارمانى ورىندالدى. العاشقى قوناق بولىپ كەلگەن بەردىبەك ساپاربايەۆ پاتەر يەسىنە توڭازىتقىش سىيعا تارتتى.

ءوڭىر باسشىسى سونداي-اق، بيىل قىركۇيەك ايىندا پايدالانۋعا بەرىلگەن جاڭا جەكەمەنشىك مەديسينا ورتالىعىنىڭ قىزمەتىمەن تانىسىپ، تەمىرجول ۆوكزالىنىڭ الاڭىندا ورنالاسقان انالار اللەياسىندا بولدى.

بەردىبەك ساپاربايەۆ «استانا» ساياباعى مەن الپامىس باتىر ەسكەرتكىشىنىڭ سالتاناتتى اشىلۋىنا قاتىستى. ساياباق اۋماعىنىڭ الاڭى – 2،15 گەكتار. ەسكەرتكىشتىڭ بيىكتىگى تۇعىرىمەن ەسەپتەگەندە 12 مەترگە جۋىق.

ۇلى باتىردىڭ جاۋىنگەر جىلقىنىڭ ۇستىندە وتىرعانى بەينەلەنگەن. مونۋمەنتتىڭ ارتىندا كولوننادا ورنالاسقان. جوبا «تۋعان جەرگە تاعزىم» اكسياسى اياسىندا جۇزەگە اسىرىلعان.