قازاقستان مەن وزبەكستان ەكونوميكانىڭ ءارتۇرلى سالالارىندا ىنتىماقتاستىقتى نىعايتادى. 7 قاراشادا وتكەن كەزدەسۋدە اقتوبە وبلىسىنىڭ اكىمى بەردىبەك ساپاربايەۆ پەن ناۋاي وبلىسى اكىمىنىڭ ورىنباسارى فاحريددين سولييەۆ وسىنداي كەلىسىمگە كەلدى.
ءوڭىر باسشىسى وزبەكستانمەن ءوزارا قارىم-قاتىناستى جولعا قويۋ ەلدىڭ سىرتقى ساياساتىنىڭ ستراتەگيالىق باعىتى بولىپ تابىلاتىنىن اتاپ ءوتتى.
«وسى جىلدىڭ توعىز ايى ىشىندە اقتوبە وبلىسىنىڭ وزبەكستانمەن اراداعى ىشكى تاۋار اينالىمى 11،4 ملن. اقش دوللارىن قۇرادى، سونىڭ ىشىندە ەكسپورت – 9،8 ملن. اقش دوللارى، يمپورت 11،4 ملن. اقش دوللارى. كوكونىس، بيداي، ارپا، ۇن، كۇنباعىس مايى، حروم وكسيدى، قارا مەتالداردان جاسالعان ونىمدەر ەكسپورتتالۋدا. قارقىندى دامىپ كەلە جاتقان ناۋاي وبلىسى ءبىزدىڭ ءوڭىر ءۇشىن ۇلكەن قىزىعۋشىلىق تۋدىرادى،-دەپ اتاپ ءوتتى بەردىبەك ساپاربايەۆ.
«ءبىز اقتوبەگە تاتۋ كورشىلىك قارىم-قاتىناسىمىزدى جالعاستىرۋ ءۇشىن كەلدىك. ىسكەرلىك بايلانىس ورناتىپ، ەكونوميكانىڭ ءتۇرلى سالالارىنداعى ىنتىماقتاستىقتى جولعا قويامىز، سونىمەن قاتار، ءوزىمىزدىڭ اتقارعان جۇمىستارىمىزبەن جانە تاجىريبەمىزبەن بولىسەمىز دەپ سەنەمىز»،- دەدى فاحريددين سولييەۆ ءوز كەزەگىندە.
بەردىبەك ساپاربايەۆ دەلەگاسياعا وبلىستىڭ ينۆەستيسيالىق مۇمكىندىكتەرىن تانىستىرىپ، مۇندا بيزنەستى دامىتۋ ءۇشىن، سونىڭ ىشىندە شەتەلدىك كومپانيالارمەن دە بارلىق جاعداي جاسالعانىن اتاپ ءوتتى. تاراپتار ءوزارا قارىم-قاتىناس مۇمكىندىكتەرىن تالقىلادى.
وڭىرلەردىڭ حيميالىق ونەركاسىپتى دامىتۋدا، وزبەكستاننىڭ اۋىل شارۋاشىلىعى تەحنيكاسىن اقتوبە وبلىسىندا ساتۋدا جانە سەرۆيستىك قىزمەت كورسەتۋدە ديستريبيۋتورلىق ورتالىقتار اشۋدا الەۋەتى زور، وزبەكستاننىڭ فارموسيەۆتيكالىق سەكتورىن دامىتۋداعى تاجىريبەسى، سونىمەن قاتار جەڭىل ونەركاسىپ سالالارى قىزىقتى.
وسىعان بايلانىستى اقتوبەلىك تاراپ دارىلىك زاتتار مەن بيولوگيالىق بەلسەندى قوسپالاردى شىعارۋدا وزبەكستاننىڭ فارماسيەۆتيكالىق كومپانيالارىمەن ارىپتەستىكتى جولعا قويۋدى، سونىمەن قاتار، تىگىن جانە تريكوتاج بۇيىمدارىن شىعاراتىن بىرلەسكەن كاسىپورىنداردى قۇرۋدى جوسپارلاپ وتىر.
ناۋاي وبلىسىنىڭ دەلەگاسياسى ەكى كۇن بويى ءىرى كاسىپورىنداردىڭ جۇمىستارىمەن، ءوڭىردىڭ مەملەكەتتىك-جەكە سەرىكتەستىكتى دامىتۋداعى تاجىريبەسىمەن تانىسىپ، الەۋمەتتىك نىسانداردى ارالايدى.
