قازاقستاننىڭ سىرتقى ىستەر مينيسترلىگى ەكونوميكالىق جانە ساۋدا ديپلوماتياسى باعىتىنداعى قارىم-قاتىناستى جاقسارتۋ ماقساتىندا ەلدەگى ديپلوماتيالىق وكىلدەرمەن بايلانىستى نىعايتۋدا. وسىعان وراي، مينيسترلىك رەسپۋبليكادا ءارنتۇرلى جاعىمدى يگى شارالاردى جۇزەگە اسىرۋ ۇستىندە.

 وسىنداي يگى شارالاردىڭ ءبىرى كەشە قازاقستان سىرتقى ىستەر مينيسترلىگىنىڭ ۇيىمداستىرۋىمەن جۇزەگە استى.

اتاپ ايتار بولساق، سىرتقى ىستەر مينيسترلىگى شەتەل ديپلوماتيالىق ميسسيالارىنىڭ جانە استانا قالاسىنىڭ مەكتەپ-گيمنازيالارىنىڭ قاتىسۋىمەن «Jas Diplomat» بىرەگەي جوباسىن ىسكە قوستى. ءىس-شارا مەملەكەت باسشىسىنىڭ «رۋحاني جاڭعىرۋ» باعدارلاماسى اياسىندا سىرتقى ساياسي ۆەدومستۆونىڭ باستاۋىمەن ءبىلىم جانە عىلىم مينيسترلىگىنىڭ، ەلوردا اكىمدىگىنىڭ جانە بۇۇ مودەلى ۇيلەستىرۋشى ورتالىعىنىڭ قولداۋىمەن قولعا الىنىپ وتىر.

جوبا شەڭبەرىندە استانا قالاسىنىڭ مەملەكەتتىك مەكتەپتەرى مەن شەتەلدىك ديپلوماتيالىق ميسسيالار اراسىنداعى ىنتىماقتاستىق كوزدەلگەن. وسى جىلعى قاراشا-جەلتوقسان ايلارىندا مەكتەپ وقۋشىلارىنا ديپلوماتيالىق قىزمەتتىڭ قىر-سىرىن تىكەلەي ديپلوماتتاردىڭ وزدەرىنەن بىلۋگە مۇمكىندىك بەرەتىن ءتۇرلى ءىس-شارالاردى وتكىزۋ جوسپارلانعان. جوبا اۆتورلارىنىڭ پايىمداۋىنشا، وقۋشىلار وزدەرى جۇمىس جاساعان شەتەلدىك ديپلوماتتاردىڭ ەلدەرىنىڭ اتىنان ءسوز سويلەپ، بۇۇ مودەلىنە سايكەس «بولاشاق ەنەرگياسى» تاقىرىبىندا وتىرىس وتكىزەدى.

ءىس-شارادا ءسوز سويلەگەن قازاقستان سىرتقى ىستەر ءمينيسترىنىڭ ورىنباسارى رومان ۆاسيلەنكو شەتەلدىك ەلشىلىكتەر مەن مەكتەپ-گيمنازيالارعا وسى جوباعا قاتىسۋعا كەلىسىم بەرگەندەرى ءۇشىن العىس ءبىلدىرىپ، جوبانىڭ وسكەلەڭ ۇرپاقتىڭ ءوي-ورىسىنىڭ كەڭەيۋىنە ايتارلىقتاي ۇلەس قوساتىنىن اتاپ ءوتتى.

«وتكىزىلىپ وتىرعان ءىس-شارانىڭ مەملەكەت باسشىسىنىڭ قازاقستان حالقىنا جولداۋىندا «جاستار جىلى» بولىپ جاريالانعان 2019 جىلدىڭ قارساڭىندا ىسكە قوسىلۋىنىڭ ماڭىزى ەرەكشە»، - دەدى ر. ۆاسيلەنكو.

اتالعان جوباعا 7 مەملەكەتتىڭ - برازيليا، گەرمانيا، گرۋزيا، كورەيا، پولشا، تۇركيا جانە جاپونيا ەلشىلىكتەرى جانە ەلوردالىق №3، №4، №5، №6، №48، №75 ي №81 مەكتەپ-گيمنازيالارى قاتىسۋعا كەلىسىم بەردى.

ەركىن قالدان