«I'm a Singer Kazakhstan» تالانتتار شوۋىنداعى دۋەتتەرگە كەيدە ادام تاڭعالادى. ءتىپتى جۇپتارعا قاراپ وتىرىپ، بۇل ەكەۋى قالاي بىرگە ءان سالىپ ءجۇر ءوزى دەگەن ويعا قالاسىز. الايدا، بايقاۋدىڭ ەرەكشەلىگى دە وسى – قالاي بولعاندا جەڭىمپاز اتانۋ. ويتكەنى «وتكىر قانجار قاپ تۇبىندە جاتپايتىنى»، قاشان بولسىن ايتەۋىر قاپتى جارىپ شىعاتىنى بەسەنەدەن بەلگىلى. وعان قوسا جاندى وركەستردىڭ سۇيەمەلدەۋىندە ءان شىرقاۋ دا انشىلەرگە وڭايعا سوقپاسى بەلگىلى. وركەسترگە قوسىلۋ ناعىز تالانتتى قاجەت ەتەدى.
«I'm a Singer Kazakhstan» بۇكىلحالىقتىق شوۋىندا ناعىز سىناق ەندى باستالدى. سەبەبى قازىلار ەڭ مىقتى دەگەن ورىنداۋشىلاردى ىرىكتەپ الدى. ولار ەندى جەكە دارا ەمەس، دۋەت ايتىپ جارىسادى. جۇپتاسىپ ءان شىرقاۋ جالعىز شىرقاۋدان الدەقايدا قيىن. جاڭا كەزەڭدە كورەرمەن ەكى ءانشىنىڭ بىرەۋىنە عانا داۋىس بەرە الاتىن بولسا، قازىلار ەكەۋىنىڭ قايسىسى ءاندى مىقتى ورىنداسا، سونى شوۋدا قالدىرادى. داۋىستى كوبىرەك جيناعان ورىنداۋشى شوۋدا قالسا، از جيناعان ءانشى شومەن قوشتاسادى.
«I'm a Singer Kazakhstan» تالاناتتار شوۋىنا كورىك بەرەتىن قاتىسۋشىلار عانا ەمەس. ولاي دەيتىنىمىز، مۇندا كەزدەيسوقتىق، تىگىسىن جاتقىزاتىن وقيعالار، تەكەتىرەستەر، سونىمەن قاتار قاتىسۋشىلاردىڭ وزدەرى كۇتپەگەن تاپسىرمالار ءجيى ورىن الىپ تۇرادى. ماسەلەن، وپەرا ءانشىسى ءادىل احمەتجانوۆ پەن ەسترادا ءانشىسى ەركەبۇلان امانتايدىڭ دۋەتىندە، ءبىر قاراعاندا، ۇلكەن ايىمارشىلىق بار. ولاردىڭ ءستيلى، ءاندى ورىنداۋ شەبەرلىگى، ءتىپتى داۋىستارى دا بىر-بىرىنە ۇقسامايدى. ءادىلدىڭ ءوزى مويىنداعانداي: «نەگىزىندە، مەنىڭ داۋسىم ەركەبۇلاننىڭ داۋسىن «ءوشىرىپ» تاستاي الادى. ول راس». الايدا، ءادىلدىڭ ايتۋىنشا، قازىرگى جاستارعا، كورەرمەننىڭ كوڭىلىنە، ارىسەسە قىزدار جاعىنا ەركەبۇلاننىڭ ءان ورىنداۋ مانەرى مەن ليريكالىق اندەرى كوبىرەك ۇنايدى ەكەن.
قارسىلاسىنىڭ قۋاتتى تەمبرىن ەركەبۇلاننىڭ ءوزى دە مويىندادى. بۇل دۋەتكە ارناپ تاڭدالعان ءاندى ورىنداۋ كەزىندە ەركەبۇلانعا كۇردەلى نوتالاردى الۋ قيىنعا سوعىپتى. سونىمەن، قازىلار ەكەۋىنىڭ قايسىسىن تاڭدايدى: ءادىلدىڭ وپەرالىق داۋسىن با، ەركەبۇلاننىڭ ءليريزمىن بە؟
«البەتتە، ول مەنەن مىقتىمىن دەپ ويلايتىن شىعار. الايدا ءاندى بىرەۋى جوعارى داۋىسپەن، بىرەۋ تومەنگى داۋىسپەن شىرقاسا، ادەمى ءان شىقپايدى»، - دەدى ەركەبۇلان. «مەن ونىڭ جەڭىلگەنىن قالامايمىن. قاجەت بولسا، ول جەڭىسكە جەتسىن»، - دەدى كەنەتتەن ءادىل. بۇل جولى قازىلاردىڭ ءوزى ەكى تالانتتىڭ قايسىسىن تاڭدارعا بىلمەي، قاتتى قوبالجىدى. ءتىپتى ساكەن مايعازييەۆ شەشىم قابىلداۋ ءۇشىن تايم-اۋت سۇرادى. ال سىنشى ەلحان احمەدوۆ ەكى جىگىتكە دە جاقسى دەگەن باعا بەردى. انشىلەردىڭ شەبەرلىگىنە باعا بەرۋ كەزىندە ماقپال ءجۇنىسوۆا: «مەن قازىرگى جاستارعا قاراپ قۋانامىن. سەندەردىڭ ارقالارىڭدا وسىنداي حالىقارالىق ساحنادا ءبىزدىڭ كومپوزيتورلاردىڭ اندەرى شىرقالۋدا. اركىم ءوزم دەڭگەيىندە ورىنداپ شىقتى. دەگەنمەن، ماعان ەركەبۇلاننىڭ ورىنداۋ ناقىشى كوبىرەك ۇنادى»، - دەپ ويىن ءبىلدىردى.
«ءادىل ءان سالعان كەزدە ەركەبۇلاننىڭ داۋسى مۇلدە شىقپاي قالدى»، - دەدى ماقپال يسابەكوۆا. – ءادىل ءان شىرقاپ تۇرىپ، «مەنىڭ داۋسىم مىقتىراق» دەيتىندەي كورىندى ماعان. ونى تۇسىندىك. ءسىزدىڭ وسى تۋرعا جەتكەنىڭىزدىڭ ءوزى - داۋسىڭىزدىڭ ارقاسى. بويىڭىزدا تالانت بارىنا كوزىمىز جەتتى. ال ەركەبۇلان، سىزگە ساحنالىق ەركىندىك جەتىسپەيدى. مەيلى، ول كونسەرۆاتوريانى ءبىتىرسىن، مەيلى ءسىز ساۋلەتشى بولا بەرىڭىز. الايدا ساحناعا شىققان ەكەنسىز، دەمەك ءسىز ءارتىسسىز. ال ءارتىس ساحنادا ءوزىن ەركىن ۇستاۋى كەرەك. قىسىلىپ-قىمتىرىلساڭىز، كورەرمەن ءسىزدى ءتۇتىپ جەيدى.
بۇل داۋدىڭ نۇكتەسىن ادىلگە 72 ۇپاي بەرگەن كورەرمەن قويدى. قازىلاردىڭ دا ورتاق تاڭداۋى ادىلگە تۇسكەن بولاتىن. سايكەن ايتقانداي، كەلەسى تۋردا ول ءوزىن جان-جاقتى قىرىنان كورسەتەدى دەپ ۇمىتتەنەمىز. انشىگە سەنىم ارتىلدى، ونىڭ مىندەتى – ەندى سونى اقتاپ شىعۋ
