الماتىدا جارتى ميلليون ابونەمەنت ءۇيىن گازبەن جىلىتادى. ساقىلداعان سارى اياز قىسقان كەزدە قىسىم كەمىپ، تۇرعىنداردىڭ توڭۋى جىلدا قايتالانادى. ال جىل سايىن كەزدەسەتىن كەلەڭسىزدىك بيىل بولمايدى دەپ وتىر مونوپوليستەر. تۇرعىندار قارا سۋىقتا كوگىلدىر وتىننىڭ تاپشىلىعىن تارتپاس ءۇشىن جاۋاپتىلار قانشا ميلليون تەكشە مەتر گازعا تاپسىرىس بەرگەن؟    

كومىر جاعۋدىڭ قيىندىعىنان قۇتىلعان قارت انانىڭ ءبىرى – ءباتيما جۇمابەك قىزى. سۋىقتا وزىنەن بۇرىن نەمەرەلەرىنىڭ توڭباۋىن ءتۇن تولعانىپ ۋايىمدايتىن اپا، قارا التىننىڭ تاپشىلىعىمەن قوسا قىمباتتاعانىن ويلاپ قينالعان كۇندەرى از بولماعان. جەتپىس جاستان اسقان قاريا بۇدان بىلاي كومىر تاسىپ، كۇل شىعارۋدان تولىق قۇتىلدى. ايتۋىنشا، «التىن القاسىنىڭ» ارقاسىندا ەلۋ پايىز جەڭىلدىكپەن ۇيىنە گاز قوستىرعان.  

«مۇنىڭ الدىندا ءبىز كومىر جاعاتىنبىز. كومىر تاسىپ، وتىن جارىپ، كادىمگىدەي قينالاتىنبىز. جىلىنا 7-8 توننا كومىر جاعاتىنبىز. ال گاز قوسقالى راحات بولدى. ەلۋ پايىز كومەكپەن ماعان گاز قوسىپ بەردى. ءازىر ۇيىمىزدە جىلى، اسىمىز دا گازبەن ءپىسىپ جاتىر. گازدىڭ باسشىلارىنا راقمەت. نەمەرەلەرىم دە جىلى ۇيدە ءوسىپ جاتىر»، – دەيدى ءباتيما فازىلوۆا.    

اۋا رايىن بولجاۋشىلار تۇرعىندارى تىعىز وڭتۇستىك وڭىردە بيىلدا قىستىڭ قاتتى بولاتىنىن، ايازدى كۇندەردىڭ از بولمايتىنىن ەسكەرتتى. ال وتكەن جىلى كۇن كۇرت سۋىتقاندا گاز قىسىمى كەمىپ، پەشى جانباي، قۇبىرى قاتقان حالىق اپتالاپ قيىندىق كورگەن ەدى. وتكەننەن ساباق العان مونوپوليستەر كەلەڭسىزدىك قايتالانباۋ ءۇشىن قىسىم رەتتەگىش قۇرىلعىلار مەن كولەمى كەڭ قۇبىرلاردى بيىل قايتا قويدىق دەيدى.  

«رەتتەگىش قۇرالدارىنىڭ  20-سى جاڭادان قويىلىپ، 35ء-ى جاڭادان جوندەلىپ اۋىستىرىلدى. ءبارى زاماناۋي گاز رەتتەۋىش قۇرىلعىلارىنا رەتتەلىپ قويىلدى. اۋىلدى ۇلكەن قىسىمنان ورتاشا قىسىمعا ءتۇسىرىپ، حالىققا جەتكىزىپ وتىرۋ ءۇشىن قويىلدى»، – دەدى الماتى وبلىسى گاز شارۋاشىلىقتارى قاۋىمداستىعىنىڭ باس ينجەنەرى مەيرامبەك ابىشبايەۆ.  

جىلۋعا جارىماي، جاۋراعان جۇرت اسىرەسە، قاراساي، ىلە اۋداندارىنىڭ اۋماعىندا كوپ بولعان ەدى. الماتى وبلىسى گاز شارۋاشىلىقتارىنىڭ باسشىلارى بولسا جامبىل، تالعار، ناۋرىزباي جانە الاتاۋ اۋداندارىنداعى 63 مىڭ جەكە تۇرعىن ءۇي مەن بالاباقشا، مەكتەپ سىندى 3500-دەن استام وزگە دە الەۋمەتتىك نىسانداردى قىستان قىسىلماي الىپ شىعامىز دەپ وتىر. اۋماقتى كوگىلدىر وتىنمەن قامتۋ اياسىندا جانۇيانىڭ ساناتىنا قاراي جەڭىلدىك جاسالادى.  

«گاز قىسىمىنىڭ تولىقتاي جەتۋىن ءبىز باستى مىندەت دەپ قاداعالاپ وتىرمىز. تولىقتاي جەتۋ ماقاستىندا قوسىمشا گاز جەلىسى جانە شكافتىق گاز رەتتەۋ قۇرالدارى قويىلدى. ءبىزدىڭ الماتى وبلىسىنا قاراستى جاڭاعى قاراساي، تالعار، جامبىل اۋدانى جانە الماتى قالاسىنىڭ قاراساي، ناۋرىزباي اۋداندارىندا بارلىق سوماسى 20 ميلليونعا جۋىق جەڭىلدىكتەر جاسالىنىپ، كوگىلدىر وتىنمەن قامتىپ وتىرمىز»، – دەدى الماتى وبلىسى گاز شارۋاشىلىقتارى قاۋىمداستىعى ءتوراعاسىنىڭ ورىنباسارى رۇستەم وتەمبايەۆ.

ال الماتى قالاسىندا 500 مىڭداي ابونەمەنت جەكە گاز پەشىنە تاۋەلدى. وبلىسپەن سالىستىرعاندا قالادا گازعا قوسىلۋ قۇنى الدەقايدا تومەن. جۇمىس ينۆەستيسيالىق باعدارلاما اياسىندا جاسالعاندىقتان، گاز تارتقىزۋ اقىسى 150 مىڭ تەڭگە.

«بىلتىرعىداي 30 گرادۋستاي سالقىن بولۋى مۇمكىن. ءبىز بۇل سۋىققا دايىنبىز. بارلىق جابدىقتارىمىز ورىندالعان. جابدىقتارىمىز قولىمىزدا. «قازترانسگاز» جاعىنان گاز مولشەرى دە، كولەمى دە بار. قىسقا دايىنبىز»، – دەدى «قازترانسگازايماق» اق الماتى ءوندىرىسىنىڭ ديرەكتورى باقتيار ءىزباساروۆ.

وتكەن جىلى 1 ميلليارد 100 ميلليون تەكشە مەتر گاز جاعىلعان ەدى. ال الداعى جىلۋ ماۋسىمى كەزىندە جارتى ميلليون ءۇيدىڭ سۇرانىسىن قامتاماسىز ەتۋ ءۇشىن 1 ملرد 200 ملن تەكشە مەتر گازعا تاپسىرىس بەرىلىپتى.