الماتى كوشەلەرىن قاردان تازارتاتىن تەحنيكالار سانى ارتتى.
الماتىنىڭ كوممۋنالدىق قىزمەتتەرى قىتىمىر قىسقا ءتاستۇيىن دايىن. بيىل ەلىمىزدە قاھارلى قىس بولاتىنىن ەسكەرگەن جاۋاپتى باسقارما وكىلدەرى، قالا كوشەلەرىن اق ۇلپادان ارشۋعا 3 مىڭعا تارتا ادام جۇمىلدىرماق. ال قاردى 1 مىڭنان استام ارنايى تەحنيكا تازارتادى. ونىڭ 13ء-ى ەندى عانا ساتىپ الىنعان سۋ جاڭا ماشينا ەكەن. جالپى، الىپ شاھاردى كوكتايعاقتان قورعايتىن قوسپالار قورى جەتكىلىكتى مە؟
كوممۋنالدىق قىزمەتكەرلەر ءۇشىن قالا كوشەلەرىن تازارتۋعا ارنالعان تاپتىرماس تەحنيكانىڭ ءبىرى – مىنا داتتىق ماشينا. كوپفۋنكسيونالدى «Epok» تەحنيكاسى جازدا كوشەلەردى جۋۋعا قولدانىلسا، قىستا اق ۇلپادان ارىلتۋعا قولايلى ەكەن. كولىكتىڭ ۇستىندەگى سيستەرناعا 6 توننا تۇز قۇيىلىپ، كوشەلەردى كوكتايعاقتان قورعاۋ ءۇشىن سەبىلەدى. ارتىنشا ارنايى ششەتكاسى ەرىگەن مۇزدى تازارتىپ شىعادى. بۇعان دەيىن قالادا مۇنداي اۋىر تەحنيكانىڭ 14ء-ى جۇمىس ىستەپ كەلگەن ەدى. كولىكتىڭ تيىمدىلىگىن كورگەن كوممۋنالشىلار ەندى بيىل ولاردىڭ تاعى التاۋىن ساتىپ الماق.
«تۇز سەپكەندە ءار شارشى مەترگە قانشا گرامم كەرەك ەكەنىن ءوزى اۆتوماتتى تۇردە انىقتاپ شىعادى. ول جاۋعان قار مولشەرىنە بايلانىستى، تەمپەراتۋرا دا اۆتوماتتى تۇردە رەتتەلىپ وتىرادى. تۇز سەپكەننەن كەيىن جول قاتپايدى. ءبىز بۇرىن قۇم سەبەتىن ەدىك قوي، ال بۇل ماشينالار قۇم سەپپەيتىندىكتەن جول تازا بولىپ قالادى. كەيىن كوشەلەردى سىپىرۋ دا وڭايعا تۇسەدى»، – دەدى «الماتى تازالىق» مكك بوستاندىق اۋدانى بويىنشا باسشىسى نۇرلان ساقبايەۆ.
بيىل جالپى سانى 1050 ارنايى تەحنيكا قالا كوشەلەرىن قاردان تازارتادى. ونىڭ 13ء-ى ەندى عانا ساتىپ الىنعان سۋ جاڭا ماشينالار ەكەن. كولىكتەردىڭ قاتارىندا «Epok» تەحنيكاسىنان بولەك، تروتۋارلارداعى كوك مۇزدى كۇرەۋگە ارنالعان شاعىن تراكتورلار دا بار. جالپى، الماتىداعى قاردان ارشىلاتىن كوشە اۋماعى 23 ميلليون شارشى مەتردەن اسىپ جىعىلادى. ونىڭ 60 پايىزدان استامىن «الماتى تازالىق» مەكەمەسى تازالاسا، قالعان اۋماقتى اق ۇلپادان ارىلتۋ 13 شاعىن كاسىپورىننىڭ موينىندا.
«بيىل ءبىزدىڭ مەكەمەمىزدە جالپى سانى 628 تەحنيكامىز بار. ونىڭ بارلىعى قىستا جۇمىس ىستەيدى دەپ ايتا المايمىن. شامامەن، 500-دەن استام كولىگىمىز قار تازالاۋعا جۇمىلدىرىلادى. «Jetbroom» تەحنيكامىزدىڭ سانىن 8-گە جەتكىزدىك. ول اسىرەسە، ماگيسترالدى ۇلكەن كوشەلەردىڭ قارىن كۇرەۋگە قولايلى. سوندىقتان بۇل تەحنيكانى وسى قىستا ءبىرجاقتى قوزعالىستاعى كوشەلەردى تازارتۋعا قولدانامىز»، – دەدى «الماتى تازالىق» مكك ديرەكتورىنىڭ ورىنباسارى الەكساندر كين.
بىلتىر قالاداعى جۇرگىنشىلەرگە ارنالعان كوشەلەردىڭ قارىن كۇرەۋگە شۆەيساريادان اكەلىنگەن شاعىن 20 «پوني» تەحنيكاسى قولدانىلعان. 50 شاقتى جۇمىسشى سول اۋماقتاردىڭ تازالىعىنا جاۋاپتى بولعان ەدى. وسى قىستا دا بۇل جۇمىستار ءوز جالعاسىن تاپپاق. اباي، ابىلاي حان جانە نازاربايەۆ داڭعىلىنداعى كەسپەتاس توسەلگەن جەرلەردى تازارتۋعا 5 شاعىن تراكتور ءبولىنىپ وتىر.
«وسى قىسقا 72 مىڭ توننا قۇم ارالاس حلور قوسپاسى مەن 15 مىڭ توننا تۇز دايىن تۇر. ەسەبىمىز بويىنشا قوسپالار جەتۋى ءتيىس. ءبىراق قار قالىڭ تۇسسە قاجەتىنشە قوسىمشا تاعى اكەلەمىز»، – دەدى الماتى قالاسى تابيعي رەسۋرستار جانە تابيعاتتى پايدالانۋدى رەتتەۋ باسقارماسىنىڭ ءبولىم باسشىسى الەكساندر سەرگەيەۆ.
قالانىڭ كوممۋنالدىق قىزمەت وكىلدەرى قىسقى ماۋسىمعا ءتاستۇيىن دايىنبىز دەپ سەندىردى. ولار تەحنيكالارعا جانار-جاعارماي قورى دا جەتكىلىكتى ەكەنىن ايتادى. ايتا كەتسەك، بيىل قىس قاھارلى بولاتىنىن ەسكەرگەن جاۋاپتى مەكەمەلەر جۇمىسشىلاردىڭ سانىن دا ارتتىرۋعا بەكىنىپ وتىر. وسى جىلى قار كۇرەۋ جۇمىستارىنا 3000-عا جۋىق ادام جۇمىلدىرىلادى.
