الماتىداعى زەينەتكەرلەرگە ارنالعان كۇندىزگى ورتالىقتا «جىل اجەسىن» تاڭدايدى. قاتىسۋشىلار دايىندىقتى باستاپ تا كەتىپتى. ءىس تىگىپ، تاعام ازىرلەۋدەن بولەك، قاريالار قوعامدا بەلسەندى ەكەنىن دە دالەلدەۋى ءتيىس. ورتالىققا كەلۋشىلەردىڭ دەنى مۇنداعى ساۋىقتىرۋ شارالارىنان كەيىن بەلسەندى بولۋعا بەيىمدەلىپ جاتقان كورىنەدى.
ىرعاقتى «قارا جورعا» انىنە بيلەپ جاتقان قاريالار ءبىر ءسات وزدەرىنىڭ جان اۋرۋلارى مەن ءتان اۋرۋلارىن ۇمىتقانداي. توپتىق بي – پسيحولوگيالىق ادىستەردىڭ ءبىر ءتۇرى. مامانداردىڭ ايتۋىنشا، ونىڭ ناتيجەسى دە جامان ەمەس. قارتتارعا ارنالعان كۇندىزگى ورتالىق تاۋلىگىنە 56 ادامدى قابىلداي الادى. دارى-دارمەكسىز ەمدەۋ ۋاقىتى 2 ايعا ەسەپتەلگەن.
«قارتتاردىڭ وسىندا بولاتىن 2 ايىندا بايقاعانىمىز، كوڭىلدەرى كوتەرىلىپ، ارتىق سالماقتارىن تاستاپ، قان قىسىمدارى مەن قانت دەڭگەيى تومەندەدى. سونىمەن قاتار، پسيحولوگيالىق جاعدايى دا جاقسارادى. ولار مۇندا سويلەسىپ، اڭگىمەلەسۋ ءۇشىن كەلەدى. جاڭا دوستار تاۋىپ، كۋرستان كەيىن دە بىر-بىرىمەن قارىم-قاتىناستى ۇستاپ وتىرادى»، – دەدى «كۇمىس عاسىر» قوعامدىق قورىنىڭ جوبا جەتەكشىسى اينۇر ەشمانوۆا.
ءومىرىنىڭ قىرىق جىلىن بالالارعا ءبىلىم بەرۋگە ارناعان 69 جاستاعى دينا ەسقارايەۆا – ورتالىقتىڭ بەلسەندى مۇشەسى. وسىندا بولعان ءبىر جارىم ايدىڭ ىشىندە دەنساۋلىعىنىڭ جاقسارعانىن ايتادى. ەندى بوس ۋاقىتىن يوگامەن، ايكۋنەمەن اينالىسۋعا ارنايمىن دەيدى. ايتا كەتەيىك، ايكۋنە – كوشپەندى حالقىمىز ۇستانعان قازاق گيمناستيكاسىنىڭ ءبىر ءتۇرى.
«دەنەمدەگى كوپ اقاۋلارىمدى جوندەپ كەلەمىن. بەلىم اۋىراتىن ەدى، ودان مۇلدەم ساۋىقتىم دەۋىمە بولادى. باسىم دا اۋىراتىن. جاسى ۇلكەن ادامداردىڭ قان تامىرلارىنىڭ تارىلاتىنى بەلگىلى عوي، ول جاعى دا رەتتەلىپ قالدى»، – دەيدى دينا ەسقارايەۆا.
ورتالىققا جولداما الۋ ءۇشىن بىرنەشە كەزەڭنەن ءوتۋ كەرەك. الدىمەن ۋچاسكەلىك دارىگەر مەن حالىققا قىزمەت كورسەتۋ ورتالىعىندا بىرنەشە قۇجاتتاردى الۋى ءتيىس. سودان سوڭ زەينەتكەردە قانت ديابەتى مەن ەسىن جوعالتۋ سەكىلدى اۋرۋى بولسا، قارتتارعا ارنالعان كۇندىزگى ورتالىققا كەزەككە قويادى.
بيىل جازدا اشىلعان مەكەمە زەينەتكەرلەر اراسىندا سۇرانىسقا يە بولىپ ۇلگەرگەن. فيزيكالىق جاتتىعۋلاردان بولەك، مۇندا مامانداردىڭ كەڭەستەرى دە تەگىن بەرىلەدى. ورتالىقتاعى اجەيلەر ءقازىر سايىسقا دايىندىق ۇستىندە. سكانديناۆيالىق ءجۇرىس بويىنشا ءوز ونەرلەرىن كورسەتەدى. ودان وزەگ، «جىل اجەسى» بىرنەشە تالاپتار بويىنشا ىرىكتەلمەك.
«جىل اجەسى ءوزىنىڭ بەلسەندى ەكەنىن دالەلدەپ، قالاداعى ءوتىپ جاتقان وقيعالاردان حاباردار بولۋى ءتيىس. سونىمەن قاتار، ءساندى كيىم ۇلگىسىن دە كورسەتەدى»، – دەدى «كۇمىس عاسىر» قوعامدىق قورىنىڭ جوبا جەتەكشىسى اينۇر ەشمانوۆا.
قاريالار ۋاقىتتارىن ورتالىقتا عانا ەمەس، ورتالىق سىرتىندا دا جاقسى وتكىزىپ، مۋزەيلەر مەن تاۋعا ءجيى بارىپ تۇرادى.
