اقتوبەدە اۆتوبۋس ورتىنە قاتىستى قىلمىستىق ءىس بويىنشا ۇكىم شىعىپ، سوتتالۋشىلار 3،6 جىل مەن 5 جىلعا باس بوستاندىقتارىنان ايرىلدى. سونىمەن قاتار، سوتتالۋشىلار بىرلەسىپ، جابىرلەنۋشىلەردىڭ ءارقايسىسىنا 2 ميلليون تەڭگە مورالدىق شىعىن وتەۋى ءتيىس، دەپ حابارلايدى Qamshy.kz اقپارات اگەنتتىگى Aktobenews.kz سايتىنىڭ دەرەگىنە سۇيەنىپ.
«جابىرلەنۋشىلەردىڭ مورالدىق زياندى وتەۋ تۋرالى ازاماتتىق تالاپ ارىزدارى ءىشىنارا قاناعاتتاندىرىلسىن. سوتتالعاندار نۇرجان قىرعىزبايەۆ، ماقسات پەرنەبەكوۆ، بارات تاڭاتوۆ، ءباحادۇر پەردەبايەۆ، نۇرلىبەك تىلەپبايەۆتان ورتاق تۇردە جابىرلەنۋشىلەردىڭ ءارقايسىسىنا 2 ميلليون تەڭگە ءوندىرىلسىن. زاڭ بويىنشا مورالدىق شىعىندى وتەۋگە 1 اي ۋاقىت بەرىلەدى»، — دەدى ىرعىز اۋداندىق سوتىنىڭ سۋدياسى سەرىك ماحامبەتوۆ. بارلىعى 43 وتباسىعا 2 ميلليون تەڭگە وندىرىلەتىن بولدى. سوندا 43 ادام ءۇشىن 2 ميلليون تەڭگەدەن وندىرىلسە، بارلىعى 86 ميلليون تەڭگە ەسەپتەلىپ وتىر. ال 5 سوتتالۋشىعا بولگەندە، ءارقايسىسى وزبەكتساندىقتاردىڭ وتباسىنا 17،2 ميلليون تەڭگە تولەۋى ءتيىس.
ايتا كەتەيىك، جابىرلەنۋشىلەردىڭ 10-نان استامى مورالدىق شىعىن تالاپ ەتپەدى. سوت ۇكىمى وقىلعان سوڭ سوتتالۋشىلاردىڭ تۋىستارى وزبەكستاندىقتارتىڭ تالاپ ارىزى بويىنشا ءارقايسىسىنا 2 ميلليون تەڭگە تاۋىپ بەرە المايتىنىن جەتكىزدى.
«ءبىزدىڭ 7 بالامىز بار، ەش جەردە جۇمىس ىستەمەيمىز. ءبىز وزبەكستاندىقتاردىڭ تالاپ ارىزىن ورىنداي المايمىز. ءقازىر 7 بالانى قالاي باعامىن دەپ ويلاپ وتىرمىن. بۇگىن جەڭىلدىك جاساپ، بوساپ شىعارادى دەپ ويلادىم»،- دەيدى بارات تاڭاتوۆتىڭ جۇبايى اينۇر تاڭاتوۆا.
♦52 وزبەكستاندىقتىڭ ءومىرىن قيعان قايعىلى جايتقا كىم كىنالى ەكەنى بەلگىلى بولدى
♦اۆتوبۋستا تىرىدەي ورتەنگەن 52 ازاماتتىڭ تۋىستارى: بالالارىمىز ءتىرى...
سوت زەرتتەۋىندە بەلگىلى بولعانداي، اۆتوبۋسقا ءۇش جۇرگىزۋشىدەن بولەك 54 وزبەك ازاماتى مىنگەن. جۇرگىزۋشىلەر شىمكەنتتەن سالقىن ايازعا شىدامايتىن جانارماي قۇيادى. ىرعىز اۋدانىنىڭ تۇسىندا جانارمايى قاتىپ، قوزعالتقىشى ىستەن شىققان اۆتوبۋس توقتاپ قالدى.
جۇرگىزۋشىلەر جانارماي باگىن دانەكەرلەۋشى شاممەن قىزدىرعان. ولار تەرگەۋ كەزىندە جەكە باسى انىقتالماعان ايەلدەن بەس ليتر بەنزين ساتىپ العانى انىقتالدى. جانارمايدىڭ 1،5 ءليترىن دانەكەرلەۋ شامىنا قۇيىپ، قالعان 3،5 ليترلىك بەنزيندى الىپ جۇرگىزۋشى قىرعىزبايەۆ اۆتوبۋسقا كىرگەن.
سالون ىشىنە "پايالنيكپەن" اياعىن قىزدىرادى. سول كەزدە قاستارىنا باسقا اۆتوبۋس كەلىپ توقتايدى. قىرعىزبايەۆ پەن تاڭاتوۆ دانەكەرلەۋ وتىن سوندىرمەي، توقتاعان اۆتوبۋسقا قاراي شىعىپ كەتكەن. اۆتوبۋستان ءبىرىنشى شالبارى جانىپ، جولاۋشى يساقوۆ شىعادى. كەيىن قىرعىزبايەۆ پەن تاڭاتوۆ اۆتوبۋسقا جۇگىرەدى. ايتۋلارىنشا، قۇتقارۋعا ۇلگەرمەي قالعان. جولاۋشى مىرزاحمەتوۆ پەن جۇرگىزۋشى پەرنەبەكوۆ جاراقات الىپ، سالوننان شىعىپ ۇلگەرەدى. جۇرگىزۋشىلەر شىڭعىرعان داۋىستار توقتاعانعا دەيىن ءورتتى ءوز ەرىكتەرىمەن سوندىرمەك بولادى.
ەسكە سالا كەتەيىك، وزبەكستان ازاماتتارى مىنگەن "يكارۋس" اۆتوبۋسى 18 قاڭتار كۇنى "سامارا-شىمكەنت" باعىتىنىڭ 1069 شاقىرىمىندا، اقتوبە وبلىسى ىرعىز اۋدانىنىڭ تۇسىندا ورتكە وراندى. ورتەنگەن اۆتوبۋس ىشىنەن شىعا الماعان 52 ادام تىرىدەي جانىپ كەتىپ، اجال قۇشقان ەدى. ال اۆتوبۋس يەسى وردۋحان مەحتەيەۆ ءالى كۇنگە دەيىن ىزدەۋدە ءجۇر.
