الماتىدا ەلباسى جولداۋىن ءتۇسىندىرۋ جۇمىستارى قارقىندى ءجۇرىپ جاتىر. وسى ۋاقىتقا دەيىن 150-گە جۋىق ءىس-شارا وتكەن. بۇگىن پرەزيدەنت جولداۋىنداعى كوزدەلگەن مىندەتتەردى كەڭىنەن ءتۇسىندىرۋ ماقساتىندا پرەمەر-مينيستردىڭ ورىنباسارى ەربولات دوسايەۆ باستاعان توپ «وڭتۇستىك استاناعا» ارنايى كەلدى. قالالىق اكىمدىكتە ۆيسە-پرەمەر مەن حالىق قالاۋلىلارى جولداۋدى كەڭىنەن تالقىلاپ، ونى جۇزەگە اسىرۋ جوسپارلارىمەن ءبولىستى.

ماڭىزدى جيىنعا ەربولات دوسايەۆ باستاعان رەسپۋبليكالىق اقپاراتتىق توپتان جالپى سانى 13 ادام ارنايى كەلگەن. كەزدەسۋگە قالالىق قۇرىلىمداردىڭ باسشىلارى، اۋدان اكىمدەرى، ءماسليحات دەپۋتاتتارى جانە قوعامدىق كەڭەس مۇشەلەرى قاتىستى. قالا اكتيۆىمەن كەزدەسۋدە العاش بولىپ ءسوز العان ەربولات دوسايەۆ كەلەسى جىلدان باستاپ ەڭ تومەنگى جالاقىنىڭ قانشا تەڭگەگە وسەتىنىنە توقتالدى. ونىڭ ايتۋىنشا، بۇل ماقساتقا جىل سايىن 86 ميلليارد تەڭگە بولىنەدى ەكەن.      

«قازاقستان بويىنشا 1 ميلليون 300 مىڭ قىزمەتكەردىڭ جالاقىسى وسەتىن بولادى. سونىڭ ىشىندە الماتىدا 176 400  قىزمەتكەردىڭ ايلىق جالاقىسىنا 30 پايىز قوسىلادى. ازاماتتىق قىزمەتتەگى 275 مىڭ جۇمىسشىنىڭ جالاقىسى 35 پايىزعا ارتادى»، - دەدى ق ر پرەمەر-مينيسترىنىڭ ورىنباسارى ەربولات دوسايەۆ اتالعان جيىن بارىسىندا.

بۇگىنگى تاڭدا الماتىدا ەلباسى جولداۋىن ءتۇسىندىرۋ جۇمىستارى قارقىن العان. قالا اكىمى باۋىرجان بايبەكتىڭ ايتۋىنشا، وتكىزىلگەن 150-گە جۋىق ءىس-شارا 14 مىڭنان استام ادامدى قامتىپتى. بۇل جۇمىستار ودان ءارى دە جالعاسا بەرمەك.

«ءبىز قالالىق اكىمدىك تاراپىنان ناقتى ءىس-شارالار جوسپارىن بەكىتتىك. سول بويىنشا جۇمىستى باستاپ كەتتىك. سوندىقتان، ۇكىمەتتىڭ قولداۋىمەن ءبىز ەلباسى بەرگەن تاپسىرمالاردى تولىق جانە ۋاقىتىلى جۇزەگە اسىرامىز»، - دەدى الماتى قالاسىنىڭ اكىمى باۋىرجان بايبەك.      

سونىمەن قاتار، جولداۋدا ايتىلعان ينفراقۇرىلىمدى جاقسارتۋ ماسەلەسى دە ءسوز بولدى. وتكەن جىلى ەلىمىزدە 100 مىڭنان استام جانۇيا باسپانالى بولعان ەكەن. ال، الماتىدا 16 مىڭ 482 پاتەرلى تۇرعىن ءۇيدىڭ ىرگەتاسى قالانعان. جاڭادان سالىنىپ جاتقان ۇيلەرگە ينجەنەرلىك جۇيەلەردى تارتۋ ءۇشىن ەلباسى تاپسىرماسى بويىنشا جىل سايىن 100 ميلليارد تەڭگەگە جۋىق قاراجات بولىنبەك.  

«الماتى اكىمدىگى ەلباسى جولداۋى بويىنشا قارقىندى جۇمىس ىستەپ جاتقان العاشقى قالا. مۇندا جاستاردى قولجەتىمدى باسپانامەن قامتۋ باعدارلاماسى وڭ ناتيجە بەرىپ جاتىر. مۇنداي تاجىريبەنى باسقا وڭىرلەردەگى جەرگىلىكتى بيلىك وكىلدەرى دە قولدانىپ باستادى. بۇل وتە جاقسى كورسەتكىش دەپ ويلايمىن»، - دەپ اتاپ ءوتتى ق ر ينۆەستيسيالار جانە دامۋ ۆيسە-مينيسترى قايىربەك وسكەنبايەۆ.      

كەلەر جىلدىڭ 1 قىركۇيەگىنە قاراي 2030 جىلعا دەيىنگى اۋماقتىق-كەڭىستىكتىك دامۋدىڭ ستراتەگياسى جاسالادى، مۇندا باسقارىلاتىن ۋربانيزاسياعا اسا ءمان بەرىلمەك. حالىقتى ورنالاستىرۋ، وڭىرلەردىڭ ارنايى سالالارىن انىقتاۋ، ءونىدىرىستى دامىتۋ، ينفراقۇرىلىمدى قامتاماسىز ەتۋ وسى پريزما ارقىلى جۇزەگە اسادى، ال بۇل ەل وڭىرلەرىندە كىشى ۋربانيزاسيانىڭ دامۋىنا تىڭ سەرپىن بەرەدى.

سونىمەن قاتار، جيىندا وڭىرلەردەگى تۇرعىنداردىڭ ءومىرىن جاقسارتۋ «نۇرلى جول» جانە «نۇرلى جەر» سىندى باعدارلامالاردى 2025 جىلعا دەيىن جۇزەگە اسىرۋمەن تىكەلەي بايلانىستى ەكەنى ايتىلدى. الماتىنىڭ وزىندە عانا جىل اياعىنا دەيىن 2 ملن شارشى مەتر تۇرعىن ءۇيدى ىسكە قوسۋ جوسپارلانعان.