الماتىدا جىلۋ ماۋسىمى باستالدى. قالاداعى تۇرعىن ءۇي قورىنىڭ 40 پايىزى بۇگىننىڭ وزىندە جىلۋمەن قامتىلدى.
جىلۋ تاراتۋ جۇمىستارىنىڭ تاۋلىك بويىنا جۇرگىزىلۋىنە قاراماستان، ءبىرقاتار ماسەلە دە تۋىنداپ وتىر. ياعني، ءبىرقاتار ۋچاسكەلەردە ىستىق سۋدى بولەتىن ينجەنەرلىك جەلىلەر دايىن ەمەس كورىنەدى. ەگەر ۇيگە جىلۋ جەتپەي جاتسا، بىردەن پاتەر يەلەرى كووپەراتيۆىنە حابارلاسۋ كەرەك دەيدى جاۋاپتىلار. دەسەك تە، الماتىداعى الەۋمەتتىك نىساندارعا جىلۋ 100 پايىز جەتكىزىلگەن.
«جىلۋ بەرۋ جۇيەسىنە قاتىستى بارلىق بريگادا جۇمىلدىرىلۋدا. سوندىقتان الداعى بىرنەشە كۇن ىشىندە تۇرعىنداردىڭ ءبارى جىلى جەردە وتىراتىن بولادى. ەگەر قانداي دا ءبىر قيىندىق تۋىنداسا، ەڭ الدىمەن، پاتەر يەلەرى كووپەراتيۆىنە ءوتىنىش بەرۋ كەرەك. ۇيگە جىلۋ نە ءۇشىن جەتپەگەنىن سول جەردەن انىقتاۋ قاجەت»، – دەدى الماتى قالاسى تۇكش جىلۋ-ەنەرگو كەشەندەرىنىڭ رەسمي وكىلى يان گيرين.
