شاھاردىڭ شەجىرەسىنە اينالعان «ۆەچەرنيي الماتى» گازەتىنە 50 جىل، ال ونىڭ قازاقشا نۇسقاسى – «الماتى اقشامى» گازەتىنە 30 جىل.

ءا. قاستەيەۆ اتىنداعى مۇراجايدا قالا تاريحىنان سىر شەرتەتىن، وقىرماننىڭ كوڭىلىنەن شىققان باسىلىمداردىڭ جىلدار بويى جيناعان ماتەريالدارىنىڭ كورمەسى اشىلدى. كورمەگە فوتوتىلشىلەردىڭ 80-نەن استام جۇمىسى قويىلعان.

«ارينە 30 دەگەن دە ۇلكەن ءداۋىر. بۇل دا ءبىر كەزەڭ. مەرەيتوي دەگەن جاقسى عوي، ارينە. دەگەنمەن، سونى ينتەلەكتۋالدى باعىتتا، جۇرتقا وي سالاتىنداي ەتىپ وتكىزسەك دەپ ويلاعان ەدىك. سوندىقتان بۇگىن ەكى گازەتتىڭ فوتوكورمەسىن ۇيىمداستىرىپ وتىرمىز»، – دەدى «الماتى اقشامى» گازەتىنىڭ باس رەداكتورى قالي سارسەنباي.

كورمەدەگى ەسكى مۇراعاتتاعى سۋرەتتەردى جيناۋ ءۇشىن 3 ايدان اسا ۋاقىت كەتتى دەيدى ۇيىمداستىرۋشىلار. مۇنداعى ءار سۋرەتتىڭ وزىندىك ەستەلىكتەرى بار. كورمەگە كەلگەن فوتوتىلشىلەر وزدەرىنىڭ جۇمىستارىن كورىپ، ەسكى الماتىنى ەسكە ءتۇسىردى. مۇنداعى بۇرىنعى سيرك بەينەلەنگەن سۋرەتكە قاراپ، قالامىزدىڭ قانشالىقتى وزگەرگەنىن بايقاۋعا بولادى دەيدى كەلۋشىلەر. ايتا كەتەيىك، كورمە ەكى كۇنگە سوزىلادى.