كادەگە جاراعان ەسكى شامدار. الاتاۋ اۋدانىنداعى بۇرىن-سوڭدى جارىق بولماعان 15 كوشە جارىقپەن قامتىلماق. قالانىڭ ورتالىق كوشەلەرىنەن الىنعان ەسكى باعانالار ەشقاشان جارىقتاندىرىلماعان جەرلەرگە ورناتىلىپ جاتىر.

الاتاۋ اۋدانىنا ورناتىلاتىن جارىق باعانالارى بۇرىن قالاداعى قايتا جاڭارعان اباي، ابىلاي حان جانە نازاربايەۆ داڭعىلدارىنا جارىق بەرىپ تۇرعان شامدار. ال بۇل كوشەلەردەگى شامدار ەنەرگيا ۇنەمدەيتىن، ديودتى جارىق كوزدەرى بار لامپالارعا اۋىستىرىلعان بولاتىن. پايداعا جاراپ جاتقان ەسكى باعانالار ءالى تالاي جىل جارىق بەرىپ تۇرادى دەيدى مەردىگەرلەر.

«بۇگىندە 149 تاعان فاريزا وڭعارسىنوۆا كوشەسىنە ورناتىلدى. ەندى شامدارى ورناتىلادى. ەكىنشى كەزەكتە وتەمىس ۇلى كوشەسى تۇر. ول جاققا 49 تاعان ورناتىپ قويدىق، ءقازىر شامدارىن جۇرگىزىپ جاتىرمىز. اۋداندا جارىقتى قاجەت ەتەتىن 15 كوشە بولسا، ونىڭ ەكەۋىنە 200-دەي تاعان ورناتىپ تاستادىق. ەندى جىل سوڭىنا دەيىن تاعى ەكى كوشەگە ورناتىپ شىعامىز»، – دەدى مەردىگەر كومپانيا ديرەكتورىنىڭ ورىنباسارى سايان وتەۋوۆ.

ورناتىلىپ جاتقان ەسكى تاعانداردىڭ بارلىعى دا الدىن-الا بويالىپ، كەم-كەتىگى تۇزەلىپ كەلەدى ەكەن. ءبىر قاراعاندا جاڭاسىنان ەش ايىرماشىلىعى دا جوق. الداعى اپتا جارىق شامدارىن ورناتىپ، وسى ايدىڭ سوڭىنا دەيىن ىسكە قوسامىز دەيدى مەردىگەرلەر. قالعان كوشەلەردەگى جۇمىستار جىلدىڭ سوڭىنا دەيىن تولىق اياقتالىپ، جەرگىلىكتى تۇرعىنداردى قۋانتپاق.  

«قازىرگى ۋاقىتتا الاتاۋ اۋدانىنى بويىنشا 15 كوشەدە 730 كوشە شام جارىق شامدارىن ورناتۋ جۇمىستارى جۇرگىزىلىپ جاتىر. بۇل 15 كوشەدە بۇرىن ەشقانداي جارىق شامدارى بولماعان. بۇل كوشەلەر الاتاۋ اۋدانىنداعى ماڭىزدى، كولىك جانە جاياۋ جۇرگىنشىلەر كوپ جۇرەتىن ۇلكەن كوشەلەر»، – دەدى الماتى قالاسى الاتاۋ اۋدانى اكىمدىگى كورىكتەندىرۋ ءبولىمىنىڭ باسشىسى تورەبەك بايىمبەتوۆ.

الاتاۋ اۋدانىن جارىقتاندىرۋ جۇمىستارىنا 180 ملن تەڭگە بولىنگەن. كوشەلەردىڭ جالپى ۇزىندىعى 24 شاقىرىمدى كۇرايدى. ايتا كەتەيىك، جىل اياعىنا دەيىن الماتىدا 24 مىڭنان استام جارىق كوزدەرى ەنەرگيا ۇنەمدەيتىن جانە جارىقديودتى شامدارعا اۋىستىرىلادى.