قاسكەلەڭنىڭ تۇرعىندارى الماتىعا جاڭا باعىتتاعى اۆتوبۋستارمەن قاتىنايتىن بولادى. №202 باعىتتاعى قوعامدىق كولىك جىل اياعىنا دەيىن ىسكە قوسىلماق. ءسويتىپ، شاعىن اۆتوبۋستارعا سىيماي، جول ازابىن تارتقان جولاۋشىلاردىڭ ماسەلەسى جەڭىلدەي تۇسپەك. ءقازىر تاسىمالداۋشىلار بۇل باعىت ءۇشىن سۋ جاڭا اۆتوبۋستار ساتىپ الىپ جاتىر ەكەن. ال قالا اۋماعىندا بىرنەشە كوعامدىق كولىكتىڭ باعىتى وزگەردى.

قاسكەلەڭ مەن الماتى اراسىندا قاتىنايتىن توزىعى جەتكەن شاعىن اۆتوبۋستارعا سىيماي، جول ازابىن ابدەن تارتقان جولاۋشىلارعا جاعداي جاسالادى. ەندى قوس باعىتتا جاڭادان ىسكە قوسىلاتىن №202 اۆتوبۋستار جۇرەدى. قوعامدىق كولىك رايىمبەك داڭعىلىنىڭ بويىمەن ءجۇرىپ، تۇرعىنداردى سايران اۆتوبەكەتىنە جەتكىزەدى. ءقازىر تاسىمالداۋشىلار بۇل باعىتقا سۋ جاڭا اۆتوبۋستار ساتىپ الىپ جاتىر ەكەن. 20 مەترلىك قوعامدىق كولىكتەر جىل سوڭىنا دەيىن جولعا شىعادى.

«قالادا جۇرگەن ۇلكەن اۆتوبۋستاردىڭ سىيىمدىلىعى – 80 ادامدىق. قازىرگى كەزدە قاسكەلەڭ، الماتى اراسىندا سىيىمدىلىعى از شاعىن اۆتوبۋستار جۇرەدى. ءبىراق ارلى-بەرلى قاتىنايتىن ادام سانى كوپ. سوندىقتان باسقارما وسىنداي ماسەلەنى قاراستىرىپ جاتىر»، – دەدى الماتى قالاسى جولاۋشىلار كولىگى جانە اۆتوموبيل جولدارى باسقارماسىنىڭ باس مامانى شىڭعىس بايقاداموۆ.  

ەسەسىنە، قالاداعى №49 مارشرۋت كەستەدەن الىنىپ تاستالدى. ويتكەنى، بۇل باعىتتاعى قوعامدىق كولىك رايىمبەك داڭعىلىنىڭ بويىمەن جۇرەتىن ءبىرقاتار مارشرۋتتاردى قايتالايدى. جالپى، رايىمبەك داڭعىلىنىڭ بويىنداعى اۆتوكولىكتەردىڭ ءجۇرۋ قارقىنىن ازايتۋ ماقساتىندا بىرنەشە اۆتوبۋستىڭ ءجۇرىسى وزگەرتىلدى. ماسەلەن، بۇعان دەيىن رايىمبەك داڭعىلى ارقىلى ساياحاتقا قاتىنايتىن №8، 17، 73 قوعامدىق كولىكتەر ەندى ماقاتايەۆ كوشەسىمەن جۇرەدى.

«مەدەۋ اۋدانى تۇرعىندارىنىڭ سۇراۋى بويىنشا، №73 مارشرۋتتىڭ ءجۇرۋ سىزباسى ماقاتايەۆ كوشەسىنەن، كوك بازاردان ارى قاراي بالتابايەۆ، بازاربايەۆ كوشەسىنە جانە شىعىس اينالما جولىنا دەيىن ۇزارتىلدى. سونداي-اق، №34 اۆتوبۋستىڭ سوڭعى ايالداماسى برت جەلىسىندە بولعانىنا بايلانىستى مۇستافين كوشەسىنەن قوجابەكوۆ پەن روزىباكييەۆ كوشەلەرىنىڭ قيىلىسىنا، «مەگا» ورتالىق ماڭىنا قاراي وزگەرتىلدى»، – دەدى شىڭعىس بايقاداموۆ.

ال №11 مارشرۋت بۇرىنعىداي «اسىل ارمان» شاعىن اۋدانىنا بارمايدى، ءجۇرىسىن اباي ساياجايلارىندا اياقتايدى. ونىڭ ورنىنا №16 جانە №14 اۆتوبۋستار قىزمەت ەتەدى. قالانىڭ قوعامدىق كولىكتەرىندەگى بۇل وزگەرىستەرگە تۇرعىندار دا ريزا.

« – ۇلكەن اۆتوبۋستار ءجۇرىپ جاتىر، كەيبىرەۋلەرى جاقسى جۇرەدى. جامان ەمەس.

– الماتى اۆتوبۋستارىنا كوڭىلىم تولادى، ءىشى جىلى، ءجۇرۋ ارالىعى ۋاقتىلى.

– كوپ توسپايمىز، ۋاقىتىمەن كەلەدى»، – دەستى ءبىز سوزگە تارتقان جولاۋشىلار.

نازاربايەۆ داڭعىلىن جانسۇگىروۆ كوشەسىنە دەيىن ۇزارتۋ جۇمىستارى اياقتالعاندا، قوسىمشا تاعى دا ءبىرقاتار اتۆوبۋستاردىڭ ءجۇرىسى وزگەرەتىن كورىنەدى. جاۋاپتى باسقارما وكىلدەرى ءسۇيىنباي داڭعىلىمەن قاتىنايتىن №92، 32، 98 جانە №2 مارشرۋتتاردى نازاربايەۆ داڭعىلىنان ساياحاتتى اينالىپ وتكىزبەك.