الماتىعا جۇمىس ساپارى كەزىندە پارلامەنت سەناتىنىڭ دەپۋتاتى داريعا نازاربايەۆا قالاداعى جۇمىسپەن قامتۋ ورتالىعىن ارالادى.
وسىدان 7 جىل بۇرىن قۇرىلعان مەكەمە بۇگىندە اشىق كەڭسە قاعيداتىنا سۇيەنىپ، تىڭ تاسىلمەن قىزمەت كورسەتۋگە كوشكەن. اسىرەسە، مۇمكىندىگى شەكتەۋلى جانداردى قولداپ، كاسىپ تابۋعا مۇندا ايرىقشا دەن قويىلعان. جالپى، جىل باسىنان بەرى ورتالىققا جۇمىس ىزدەگەن 35 مىڭنان استام تۇرعىن جۇگىنگەن. ولاردىڭ 30 مىڭى جۇمىسقا ورنالاسىپتى. اسىرەسە، تاجىريبەسى جوق جاس ماماندارعا قولداۋ ەرەكشە كورسەتىلۋدە. سونداي-اق، پروباسيالىق باقىلاۋدا تۇرعان ازاماتتاردىڭ دا قوعامعا قوسىلىپ، ەل قاتارلى جۇمىس ىستەۋىنە كەدەرگى جوق. ءقازىر وسى ساناتتاعى ازاماتتاردىڭ ەڭبەككە قابىلەتتىلىگى تالدانىپ جاتىر.
«ءبىرتالاي ازامات كۇندە كەلىپ تۇرادى ەكەن. ولاردىڭ 70-80 پايىزى وزدەرىنىڭ جۇمىس ورىندارىن تاۋىپ قىزمەت ىستەپ جاتىر. مەنىڭشە، وسى جۇمىستى ودان ارى جالعاستىرۋ كەرەك. اناليتيكا جاعىنان دا ءبىرتالاي جۇمىس ىستەۋ كەرەك. كىم كەلىپ جاتىر، قانداي ۆاكانسيالار بار، قانداي قىزمەتكە جاڭا ماماندار كەرەك، سونىڭ بارىنە تالداۋ جاساپ، ۇكىمەتكە جىبەرىپ تۇرۋ كەرەك. وسى تۇرعىدان جۇمىستى جاقسارتۋ قاجەت»، – دەدى ق ر پارلامەنتى سەناتىنىڭ دەپۋتاتى داريعا نازاربايەۆا.
سەناتور بۇدان وزگە، Open Almaty قوعامدىق قابىلداۋىنا دا باس سۇقتى. داريعا نازاربايەۆا بيلىك پەن قالا تۇرعىندارى اراسىنداعى ءوزارا بايلانىستىڭ بىرەگەي الاڭىنا اينالعان قىزمەت جۇمىسىمەن تانىستى. بۇل مەكەمەدە تۇرعىندار مەملەكەتتىك قىزمەتكەرلەردەن قاجەتتى اقپاراتتار مەن كەڭەستەرىن الادى.
سونداي-اق، داريعا نازاربايەۆا مەگاپوليس جاستارىمەن كەزدەستى. ولاردىڭ تالاپ-تىلەكتەرىن تىڭداپ، مەملەكەت باسشىسىنىڭ سوڭعى جولداۋىن ءتۇسىندىرىپ بەردى. ايتا كەتسەك، پرەزيدەنت 2019 جىلدى «جاستار جىلى» دەپ جاريالاعان ەدى. بۇل اسىرەسە، ستۋدەنتتەر قالاسى اتانىپ كەتكەن الماتى ءۇشىن وتە ماڭىزدى. بۇگىندە شاھاردا جاتاقحانا ماسەلەسى شەشىمىن تاۋىپ، «جاستاردى قولداۋدىڭ جول كارتاسى» ىسكە اسۋدا.
«پرەزيدەنتتىڭ جولداۋىندا جاستارعا قاتىستى كوپ ماسەلە كوتەرىلگەن. وقۋ گرانتتارى، جاڭا مۇمكىندىكتەر مەن جاستاردىڭ ەڭبەك ەتۋ تۋرالى دا ايتىلدى. تومەن جالاقىعا جۇمىس ىستەيتىندەر جايى دا ءسوز بولدى. ەندى ولاردىڭ جالاقىسى كوتەرىلەدى. جالپى، ەلىمىز بويىنشا شامامەن، 1،5 ميلليون ادامنىڭ ەڭبەكاقىسى وسەدى»، – دەدى داريعا نازاربايەۆا.
