«جاستارعا ونەركاسىپ سالاسىنا قاجەتتى ماماندىقتى يگەرۋگە مۇمكىندىك بەرۋ - ۇكىمەتتىڭ باستى مىندەتى». پرەزيدەنتتىڭ بيىلعى جولداۋدا ايتقان بۇل ءسوزىن الماتىلىق جاستار دا قولدايدى. ولار بۇل باستاما جاستارعا بولاشاقتا ءوز جولىن تابۋعا مۇمكىندىك بەرەدى دەپ سەنەدى.

بۇگىن الماتىداعى كاسىپوداق فەدەراسياسىندا وتكەن كونفەرەنسيادا جولداۋدىڭ نەگىزگى باعىتتارى تالقىلاندى. ايتا كەتسەك، 5 قازاندا ەلباسى جولداۋىندا جاستاردىڭ بارلىق ساناتىن قولداۋعا ارنالعان شارالاردى تولىق قامتيتىن الەۋمەتتىك ساتىنىڭ اۋقىمدى پلاتفورماسىن قالىپتاستىرۋ كەرەك ەكەنىن ايتقان بولاتىن. سونداي-اق، پرەزيدەنت كەلەر جىلدى جاستار جىلى دەپ جاريالادى. كاسىپوداق مۇشەلەرى بيىلعى جولداۋ ناقتى تاپسىرمالارىمەن جانە ولاردى شەشۋ جولدارىمەن ەرەكشەلەندى دەيدى.

«ءبىز جاستار تاراپىنان ەلباسىنىڭ ۇلكەن سەنىمىن كورىپ وتىرمىز. سونىمەن قاتار، جاستارعا ۇلكەن مۇمكىندىكتەر اشىلىپ جاتىر. قازىرگى جاستاردىڭ تۇرعىن ءۇي ماسەلەسى، شاعىن جانە ورتا بيزنەسكە ارنالعان نەسيەلەر، وسىنىڭ ءبارى ەلىمىز جاعدايىنىڭ جاقسارۋىنا اسەر ەتەتىنىنە سەنىمدىمىز»، – دەدى «الماتى قالاسى كاسىپوداقتار ورتالىعى» اۋماقتىق كاسىپوداق بىرلەستىگىنىڭ وكىلى ەرجان بايانبايەۆ.