الماتى قالاسى ءماسليحات دەپۋتاتتىعىنا كانديدات اسحات شىلىكبايەۆ جەتىسۋ اۋدانى تۇرعىندارىنىڭ نازىن تىڭدادى. ۇمىتكەردىڭ سايلاۋالدى باعدارلاماسىمەن تانىسقان جۇرت اۋلا تازالىعىن قاداعالاپ، جولدى جوندەپ بەرۋىن سۇرادى. اسحات قاشقىنباي ۇلى جەرگىلىكتى حالىقتىڭ وزگە دە ەسكەرتپەلەرى مەن سۇراقتارىن ەسكەرەتىنىن ايتىپ، بارلىق ماسەلەنى ءتۇرتىپ الدى.

«ماعان بۇل جەردە مىندەتتى تۇردە جارىقتاندىرۋ جۇمىستارىن، سۋ ماسەلەسىن، جولداردى كۇردەلى جوندەۋدەن وتكىزۋ ماسەلەلەرىمەن اينالىسۋ كەرەك. قاراۋسىز قالعان عيماراتتار وتە كوپ. ول ماسەلەنى شەشۋ كەرەك، نە قالپىنا كەلتىرۋ نەمەسە تازالاۋ كەرەك. ءسۇيىنباي كوشەسىندەگى تەمىرجول ۆوكزالىندا ورنالاسقان تۇرعىن ۇيلەر ماڭىنداعى قوقىستاردى تازارتىپ، ازداپ بوس كەڭىستىك جاساعان ءجون»، – دەدى الماتى قالاسى ءماسليحات دەپۋتاتتىعىنا كانديدات اسحات شىلىكبايەۆ.

تۇركسىب اۋدانىنىڭ تۇرعىندارىمەن كەزدەسكەن ۇمىتكەر گۇلناس كەنجەتايقىزىنا جينالعان جۇرت سان ساۋال جولدادى. «قايرات» ىقشاماۋدانىنىڭ تۇرعىندارىن ەڭ الدىمەن قاۋىپسىزدىك ماسەلەسى الاڭداتىپ وتىر. تۇرعىندار بەينەباقىلاۋدىڭ جوقتىعىنان ۇيىمىزدەن ۇزاي المايمىز دەيدى. ىقشاماۋداندا ءالى كۇنگە دەيىن اتى جوق كوشەلەر دە كوپ ەكەن. ءوز كەزەگىندە كانديدات وزەكتى ماسەلەردى جازىپ الدى. 

«ءقازىر جاس «قايرات» ىقشاماۋدانىندامىز. «قايرات» ىقشاماۋدانى 2013 جىلى الماتى قالاسىنا قوسىلعان. وسى قىسقا مەرزىمنىڭ ىشىندە ءبىراز نارسەلەر جاسالدى. جارىق، گاز، سۋ قوسىلدى. دەگەنمەن، تۇرعىنداردىڭ ايتۋى بويىنشا ءالى دە كوپ ماسەلەلەر بار. ەگەر مەن دەپۋتات بولىپ سايلانسام، سول ماسەلەلەردى شەشۋگە كومەكتەسۋدى الدىما ماقسات ەتىپ قويار ەدىم»، – دەدى الماتى قالاسى ءماسليحات دەپۋتاتتىعىنا كانديدات گۇلناس احمەتوۆا.  

سونداي-اق، قالا ءماسليحاتىنا ۇمىتكەر ميحايل گراچيەۆ وكرۋگ تۇرعىندارىنىڭ ءۋاجىن تىڭدادى. حالىقتى اۆتوبۋستار سانى، جول ساپاسى، كوشەنى جارىقتاندىرۋ جانە دەمالاتىن ورىن تاپشىلىعى الاڭداتۋدا.  

«بۇل اۋداننىڭ ماسەلەلەرىن ءبىرىنشى كەزەكتە قاراۋ كەرەك دەپ ويلايمىن. ويتكەنى، حالىقتىڭ ايتقاندارى ورىندى. بۇل جەردە قوعامدىق كولىك جايى وتە وزەكتى بولىپ تۇر. حالىق وكرۋگتە اۆتوبۋس جەتكىلىكسىزدىگىن ايتتى. جاڭا باعىتتار قوسىلسا، تۇرعىندار وڭاي قاتىنايتىن ەدى»، – دەدى الماتى قالاسى ءماسليحات دەپۋتاتتىعىنا كانديدات ميحايل گراچيەۆ.

ايتا كەتەيىن، قالالىق 3 ءماسليحات دەپۋتاتىنىڭ بوس ورىندارىنا 9 كانديدات سايلاۋعا تۇسۋدە. ونىڭ ۇشەۋى ايەل ادام. ال سايلاۋ 28 قازاندا تۇركسىب جانە جەتىسۋ اۋداندارىندا ورنالاسقان 3 وكرۋگتە وتەدى.