جۋرناليستەردىڭ جيىنى. وڭىرلىك بۇقارالىق اقپارات قۇرالدارى ءوزارا تاجىريبە الماستى. سەمينار-ترەنينگكە ەلىمىزدىڭ ءتورت وبلىسىنان مەديانارىقتىڭ بەلسەندى مۇشەلەرى جينالدى. اقپارات الامانىندا ايماقتىق ارنالار مەن باسىلىمداردىڭ بۇگىنگى جاي-كۇيى تالقىلاندى. رەسپۋبليكا بويىنشا باق-تىڭ 70 پايىزدان استامى وڭىرلىك كوممۋنيكاسياعا تيەسىلى ەكەنىن ەسكەرگەن سالا ماماندارى اقپارات الماسۋدىڭ اسا ماڭىزدى ەكەنىن العا تارتتى.
الماتىدا قىزىلوردا، تۇركىستان، جامبىل جانە الماتى وبلىسىنان كەلگەن ب ا ق سالاسىنىڭ ماماندارى باس قوستى.سەميناردا جۋرناليستىك ەتيكادان باستاپ، وراتورلىق قابىلەتتى ارتتىرۋ بويىنشا ءتيىمدى تاسىلدەردى ترەنەرلەر تاپتىشپەپ تۇسىندىرۋگە تىرىستى. سونداي-اق، جانجالدى جاعداي تۋعان كەزدە مىنەز-قۇلىق تانىتا ءبىلۋ ماسەلەسى دە قوزعالدى. ءۇش كۇنگە سوزىلاتىن جيىننىڭ العاشقى كۇنىندە-اق ءتىس قاققان تىلشىلەر مەن باق-تىڭ بارلىق قازانىندا قايناعان اعا بۋىننىڭ كەڭەسىنە قۇلاق تۇرۋگە كەلگەندەردىڭ قاراسى كوپ بولدى. ويتكەنى، مۇنداي باسقوسۋ مەديا مايتالماندارىمەن تىلدەستىرىپ قانا قويماي، كاسىبي جۋرناليست بولۋعا ىنتالىلارعا موتيۆاسيا بەرەرى ءسوزسىز دەيدى قاتىسۋشىلار.
«اۋديتوريادا وتىرعان قاتىسۋشىلاردىڭ ىشىندە ماعان كەڭەس ايتاتىن جۋرناليستەر دە بار. ويتكەنى، بۇل سالانىڭ قۇدىرەتى دە سول. تىلشىلەر ۇنەمى ىزدەنىستە جۇرەدى. سوندىقتان جاسقا قاراماي تاجىريبە الماسۋىمىز – زاڭدىلىق. بۇگىن ءبىز جوعارى كاسىبي تۇرعىدا سۇحبات الۋ شەبەرلىگىن بىرلەسە وتىرىپ تالقىلادىق. ادامدارمەن سويلەسۋدىڭ پسيحولوگيالىق تاسىلدەرى تۋرالى ورتاق وي بولىستىك. سونداي-اق، ءار نارسەنىڭ شەگى بولاتىنىن ەسكە سالا وتىرىپ، سۇحبات بارىسىندا جىبەرۋگە بولمايتىن قاتەلىكتەردى ايتتىق»، – دەدى تاۋەلسىز جۋرناليست سەرگەي پونوماريەۆ.
بۇگىندە كورەرمەننىڭ كوزىن كوگىلدىر ەكراننان تايدىرتپاي، ءبىر باعدارلامانى سوڭىنا دەيىن قىزىقتىرۋ قيىن ەكەنىن جاسىرمايدى سالا ماماندارى. ءدال سول سەكىلدى، باسىلىم بەتتەرىندەگى تاقىرىپتار دا قىسقا ءارى نۇسقا قويىلماسا، ءبىر بەتتىك اقپاراتتى قورىتۋعا وقىرماننىڭ زاۋقى سوقپايدى. باستىسى، قالام تەربەگەن قاۋىم ماسەلەنى ايتىپ قانا قويماي، ونىڭ شەشۋ جولدارىن مامانداردىڭ پىكىرىمەن ۇسىنۋى ۇتىمدى. ال ناسيحاتتىق مالىمەتتەردى كوپتەپ جاريالاۋ ارقىلى بۇقارانىڭ الەۋمەتتىك جاعدايلاردان بەي-جاي قالماۋىنان باستاپ، قارجىلىق ساۋاتتىلىعىن ارتتىرۋىنا سەپتەسەدى. ءبىر عانا تۇركىستان قالاسىنداعى مەديسينالىق پاسپورتتىڭ 80 پايىز دايىن بولۋىنا وڭ اسەر ەتۋ دە وسى باق-تىڭ ەنشىسىنە تيگەن ەڭبەك.
«سەمينارمەن ۇشتاستىرىپ وتىرعان – «سيفرلى قازاقستان». ەلباسىنىڭ ءتورتىنشى ونەركاسىپتىك جاڭعىرۋىندا سيفرلى فورماتتى حالىققا ناسيحاتتاۋ كەڭىنەن، مەملەكەتتىك قىزمەتتى ەلەكتوروندى تۇردە بولۋدى ناسيحاتتاۋ العا قويىپ جاتىرمىز. ءبىز قازىرگى تاڭدا سول ناسيحات جۇمىستارىن اتقارۋدامىز. تۇركىستان قالاسى مەديسينا سالاسىنداعى ەلەكتروندى پاسپورتتاۋ جاعىنان ەڭ جوعارى دەڭگەيدە كەلەمىز»، – دەدى سەمينارعا قاتىسۋشى ايتكۇل قوڭىروۆا.
«مەملەكەتتىلىگىمىزدى ايقىندايتىن، ايشىقتايتىن رۋحاني جاڭعىرۋ باعدارلاماسىن ىسكە اسىرۋدىڭ تەتىكتەرىن، ەرەكشە تاسىلدەرىن ءبىز وسى ءوڭىرارالىق سەمينارعا قاتىسا وتىرىپ، جۇزەگە اسىرۋ تاسىلدەرى عانا ەمەس، وڭىرلەردە دە تاجيىربيە الماسۋ ماقساتىندا دا قولدانىپ وتىرمىز. جامبىل وبلىسىندا ەكى تەلەارامىز بار، 10-عا جۋىق اقپاراتتىق اگەنتتىگىمىز بار. نەگىزگى، مەملەكەتتىڭ ۇلەسىندەگى 15-كە جۋىق گازەت بار. وزگە دە 30-عا جۋىق تاۋەلسىز گازەت بار»، – دەدى جامبىل وبلىسى اكىمدىگى ىشكى ساياسات باسقارماسى باسشىسىنىڭ ورىنباسارى بەرىك باگەلييەۆ.
باس قوسۋ بارىسىندا بۇقارانىڭ ساندىق تەلەارنالارعا قوسىلۋى تۋرالى دا ايتىلدى. مىسالى، 2012 جىلى سيفرلىق ارنامەن قامتىلعان حالىقتىڭ ۇلەسى 23% بولاتىن، 2016 جىلى بۇل كورسەتكىش 77،5 پايىزعا جەتكەن. ال 2017-2020 جىلدارعا ارنالعان «سيفرلىق قازاقستان» باعدارلاماسى اياسىندا كورەرمەن سانىن 95 پايىزعا جەتكىزۋ كوزدەلگەن.
