اباي وبلىسىنىڭ اقسۋات اۋدانىندا 5–7 ماۋسىم ارالىعىندا وتكەن «اسىل بەسىك – اقسۋات» سپورت جانە ونەر فەستيۆالى بيىل دا ەل نازارىن وزىنە اۋدارعان تاعىلىمدى جوبالاردىڭ بىرىنە اينالدى. ۇلتتىق سپورت، ونەر، ءبىلىم مەن رۋحانياتتى ءبىر ارناعا توعىستىرعان اۋقىمدى شارا ءۇش كۇن بويى اقسۋات ءوڭىرىن دۋمانعا بولەپ، ەلدىڭ تۇكپىر-تۇكپىرىنەن كەلگەن جۇرتشىلىقتى ورتاق قۇندىلىقتار توڭىرەگىنە توپتاستىردى. باس دەمەۋشى – ASSYLTAS قوعامدىق قورى
«تۋعان جەرگە تۋىڭدى تىك» دەگەن تاعىلىمدى ۇستانىمدى تەمىرقازىق ەتكەن فەستيۆالدىڭ اۆتورى ءارى باستاماشىسى – بەلگىلى كاسىپكەر، مەسەنات، ASSYLTAS قوعامدىق قورىنىڭ نەگىزىن قالاۋشى، اقسۋاتتىڭ پەرزەنتى دۋلات تۇرسىن ۇلى تاستەكەي. ونىڭ تۋعان جەرگە دەگەن جاناشىرلىعى مەن ازاماتتىق ۇستانىمىنان تۋعان بۇل جوبا بۇگىندە ەلدىك مۇراتقا قىزمەت ەتەتىن، ۇلتتىق رۋحتى ۇلىقتايتىن ءىرى قوعامدىق باستاماعا اينالدى. 
فەستيۆالدىڭ نەگىزى 2019 جىلى قالاندى. العاشىندا «تۇعىرى بيىك تارباعاتاي» اتاۋىمەن باستالعان يگى ءىس ۋاقىت وتە كەلە مازمۇندىق جانە ۇيىمداستىرۋشىلىق تۇرعىدان جاڭا دەڭگەيگە كوتەرىلىپ، «اسىل بەسىك – اقسۋات» فەستيۆالى رەتىندە جالعاسىن تاپتى. بۇگىندە بۇل جوبا تۋعان جەردى تۇلەتۋدىڭ، ۇلتتىق قۇندىلىقتاردى دارىپتەۋدىڭ جانە جاس ۇرپاققا ونەگە كورسەتۋدىڭ جارقىن ۇلگىسى رەتىندە تانىلىپ وتىر.
بيىلعى فەستيۆال باعدارلاماسى مازمۇنى مەن اۋقىمى جاعىنان بۇرىنعىدان دا باي بولدى. ءۇش كۇن بويى اقسۋات تورىندە ۇلتتىق سپورتتىڭ ءدۇبىرى مەن ونەردىڭ ورنەگى، رۋحانياتتىڭ ساۋلەسى مەن ءبىلىمنىڭ قۇندىلىعى قاتار كورىنىس تاپتى.
فەستيۆال اياسىندا العاش رەت توعىزقۇمالاقتان رەسپۋبليكالىق تۋرنير ۇيىمداستىرىلدى. قازاق حالقىنىڭ زياتكەرلىك مۇراسىنا اينالعان ۇلتتىق ويىننان وتكەن جارىسقا ەلىمىزدىڭ ءار وڭىرىنەن حالىقارالىق دارەجەدەگى سپورت شەبەرلەرى، سپورت شەبەرلەرى جانە جاس دارىندار قاتىستى. اقىل مەن پاراسات سىنعا تۇسكەن دودا توعىزقۇمالاقتىڭ ومىرشەڭدىگىن تاعى ءبىر مارتە دالەلدەپ، ۇلتتىق زياتكەرلىك سپورتتىڭ كوكجيەگىن كەڭەيتە ءتۇستى.
فەستيۆالدىڭ باستى سپورتتىق وقيعالارىنىڭ ءبىرى قازاق كۇرەسىنەن وتكەن «ASSYL ARLAN – 2026» رەسپۋبليكالىق ءتۋرنيرى بولدى. اقسۋات تورىنە الەم چەمپيوندارى، ازيا چەمپيوندارى، قازاقستان چەمپيوندارى، «قازاقستان بارىسى» جانە «الەم بارىسى» تۋرنيرلەرىنىڭ جەڭىمپازدارى مەن جۇلدەگەرلەرى جينالىپ، كورەرمەندەرگە جوعارى دەڭگەيدەگى تارتىستى بەلدەسۋلەر سىيلادى. سوڭعى جىلدارى قازاق كۇرەسىنىڭ بەدەلدى دودالارىنىڭ بىرىنە اينالعان بۇل تۋرنير ۇلتتىق سپورتتىڭ الەۋەتىن ايقىن كورسەتتى.
ۇلتتىق ات سپورتى تۇرلەرىنەن وتكەن «ASSYL TULPAR» جوباسى اياسىنداعى بايگە مەن اۋدارىسپاق جارىستارى دا فەستيۆالدىڭ شىرايىن كىرگىزدى. دالانىڭ دارقان رۋحىن، قازاقتىڭ جىلقى مادەنيەتىن ايشىقتاعان جارىستاردا ەلىمىزدىڭ ءار وڭىرىنەن كەلگەن شاباندوزدار مەن سايگۇلىكتەر ب ا ق سىنادى. ۇلتتىق سپورتتىڭ كورىگىن قىزدىرعان بۇل باسەكەلەر كورەرمەندەردىڭ ەرەكشە ىقىلاسىنا يە بولدى.
فەستيۆالدىڭ ماڭىزدى باعىتتارىنىڭ ءبىرى – ءبىلىم مەن رۋحانيات. وتكەن جىلى دۋلات تاستەكەيدىڭ باستاماسىمەن ءوڭىر جاستارىنا 14 مىڭ دانا كىتاپ تاراتىلىپ، كىتاپ وقۋدى ناسيحاتتاۋعا باعىتتالعان اۋقىمدى اكسيا جۇزەگە اسىرىلعان بولاتىن. سول باستامانىڭ زاڭدى جالعاسى رەتىندە بيىل «ارتىق ءبىلىم – كىتاپتا» وبلىستىق كىتاپ وقۋ بايقاۋى وتكىزىلدى. جۇزدەگەن وقۋشى قاتىسقان ءبىلىم بايگەسى جاستاردىڭ كىتاپقا دەگەن قىزىعۋشىلىعىن ارتتىرىپ قانا قويماي، ءبىلىمدى ۇلت قالىپتاستىرۋ جولىنداعى ماڭىزدى قادامداردىڭ بىرىنە اينالدى. بايقاۋ جەڭىمپازىنا اۆتوكولىك تابىستالۋى ءبىلىم مەن پاراساتقا كورسەتىلگەن ايرىقشا قۇرمەت رەتىندە باعالاندى.
 
جالپى فەستيۆال اياسىنداعى نەگىزگى جوبالاردىڭ جەڭىمپازدارىنا اۆتوكولىكتەردىڭ تابىستالۋى ۇلتتىق سپورتتى، ءبىلىم مەن ونەردى قولداۋدىڭ ناقتى كورىنىسى بولدى. بۇل باستاما جاستاردى ۇلكەن ماقساتتارعا ۇمتىلۋعا جىگەرلەندىرىپ، قوعامداعى ەڭبەك پەن تالانتتىڭ باعالانۋى ءتيىس ەكەنىن كورسەتتى.
فەستيۆال باعدارلاماسىندا رۋحاني مازمۇنداعى شارالار دا كەڭىنەن قامتىلدى. قاسيەتتى ىرعىزباي اتا كەسەنەسىنە زيارات جاسالىپ، بابالار رۋحىنا تاعزىم ەتىلدى. شىعارماشىلىق كەشتەر، تەاترلاندىرىلعان قويىلىمدار ۇيىمداستىرىلىپ، فەستيۆال گالا-كونسەرتپەن تۇيىندەلدى. ەلگە تانىمال ونەر مايتالماندارى قاتىسقان مادەني كەشتەر ۇلتتىق ونەردىڭ قادىر-قاسيەتىن ايشىقتاي ءتۇستى.
بۇگىندە «اسىل بەسىك – اقسۋات» فەستيۆالى قاراپايىم مادەني شارا نەمەسە سپورتتىق جارىستار توپتاماسى عانا ەمەس. ول – تۋعان جەرگە تاعزىم ەتۋدىڭ، ۇلتتىق بولمىستى ساقتاۋدىڭ، ۇرپاقتار ساباقتاستىعىن نىعايتۋدىڭ جانە ەلدىك سانانى قالىپتاستىرۋدىڭ ۇزدىك ۇلگىسىنە اينالعان بىرەگەي جوبا.
اقسۋاتتا وتكەن ءۇش كۇندىك مەرەكە ۇلتتىق رۋحتىڭ ماڭگىلىك قۇندىلىق ەكەنىن تاعى ءبىر مارتە دالەلدەدى. ۇلتتىق سپورتتىڭ ءدۇبىرى، ونەردىڭ ءورىسى، كىتاپتىڭ ءقادىرى مەن رۋحانياتتىڭ تاعىلىمى توعىسقان فەستيۆال تۋعان جەرگە قىزمەت ەتۋدىڭ جارقىن ۇلگىسىن كورسەتتى. بۇل – وتكەندى ۇلىقتاپ قانا قويماي، بولاشاققا باعىت سىلتەيتىن، ەلدىك مۇرات پەن ۇلتتىق مۇددەنى ساباقتاستىرعان تاعىلىمدى باستاما.