قازاقستان رەسپۋبليكاسى پرەزيدەنتى قاسىم-جومارت كەمەل ۇلى توقايەۆتىڭ كىتاپ وقۋ مادەنيەتىن دامىتۋ جانە «زەردەلى ۇلت» قالىپتاستىرۋ جونىندەگى باستامالارىن قولداۋ ماقساتىندا ۇيىمداستىرىلعان بۇل جوبا قوعامدا رۋحاني-تانىمدىق قۇندىلىقتاردى دارىپتەۋگە، جاس ۇرپاقتىڭ كىتاپ وقۋعا دەگەن قىزىعۋشىلىعىن ارتتىرۋعا، ولاردىڭ سىني جانە شىعارماشىلىق ويلاۋ قابىلەتتەرىن جەتىلدىرۋگە، سونداي-اق كىتاپسۇيەر جاستاردىڭ بەلسەندى ورتاسىن قالىپتاستىرۋعا باعىتتالدى.

بارشاڭىزدى «ارتىق ءبىلىم – كىتاپتا» وبلىستىق بايقاۋىنىڭ قورىتىندى كەزەڭىمەن شىن جۇرەكتەن قۇتتىقتايمىن!بيىلعى 16 مامىردا پرەزيدەنتتىڭ «كىتاپ وقۋ مادەنيەتىن دامىتۋ جانە زەردەلى ۇلت قالىپتاستىرۋ جونىندەگى شارالار تۋرالى» جارلىعى قابىلدانىپ، ەلىمىزدە كىتاپ وقۋ مادەنيەتىن دامىتۋ، جاڭا فورماتتاعى كىتاپحانالار اشۋ، وتاندىق قالامگەرلەر مەن باسپا ءىسىن قولداۋ مەملەكەتتىك ساياساتتىڭ ماڭىزدى باعىتى رەتىندە ايقىندالدى،- دەدى ولجاس تۇسىپبەك ۇلى.

اتالعان ءىس-شارانى اباي وبلىسىنىڭ ءبىلىم باسقارماسى، اباي وبلىسىنىڭ جاستار ساياساتى ماسەلەلەرى جونىندەگى باسقارماسى، «Assyltas» قورى جانە «OQU CLUB» ۇيىمى بىرلەسىپ وتكىزدى. جوبانىڭ جالپى جۇلدە قورى 2 700 000 تەڭگەنى قۇرادى. سونىمەن قاتار، بايقاۋدىڭ باس جۇلدەسى رەتىندە قۇنى 6 500 000 تەڭگە بولاتىن اۆتوكولىك تابىستالدى.

- مەن «ارتىق ءبىلىم – كىتاپتا» وبلىستىق بايقاۋىنا قاتىسىپ، ءوز ءبىلىمىمدى سىناپ، كوپتەگەن جاڭا مالىمەتتەر الدىم. ءىس-شارا بارىسىندا كىتاپ وقۋدىڭ ماڭىزىن تەرەڭ ءتۇسىنىپ، ءوزىم سياقتى كىتاپسۇيەر جاستارمەن تانىستىم. ۇيىمداستىرۋشىلارعا وسىنداي تاعىلىمدى جوبا وتكىزگەندەرى ءۇشىن العىسىمدى بىلدىرەمىن. بۇل بايقاۋ مەنىڭ كىتاپ وقۋعا دەگەن قىزىعۋشىلىعىمدى ودان ءارى ارتتىردى،- دەدى قاتىسۋشى ايزەرە سايلاۋبەك.

باعدارلاما اياسىندا قاتىسۋشىلار مەن قوناقتارعا ارنالعان ءبىرقاتار مادەني-تانىمدىق ءىس-شارالار ۇيىمداستىرىلدى. اتاپ ايتقاندا، كىتاپ كورمەسى
وقىرماندار كلۋبىنىڭ ارنايى وتىرىسى،باسپا ۇيىمدارى وكىلدەرىمەن كەزدەسۋ،كىتاپ وقۋ بويىنشا ينتەللەكتۋالدىق بايقاۋ كەزەڭدەرى،قاتىسۋشىلار مەن قوناقتارعا ارنالعان مادەني-تانىمدىق الاڭدار جۇمىس ىستەدى.

اتالعان جوبا كىتاپ وقۋدى ناسيحاتتاۋعا، جاستاردىڭ زياتكەرلىك الەۋەتىن ارتتىرۋعا، ۇلتتىق قۇندىلىقتاردى دارىپتەۋگە جانە ءبىلىمدى، ويلى ۇرپاق تاربيەلەۋگە ءوز ۇلەسىن قوستى. ءىس-شارا جاستاردىڭ كىتاپقا دەگەن قىزىعۋشىلىعىن ارتتىرىپ، وقىرمان مادەنيەتىن دامىتۋعا باعىتتالعان ماڭىزدى الاڭعا اينالدى.