الماتىدا قازاقستان حالقىنىڭ بىرلىگى كۇنىنە وراي ەرەكشە فورماتتاعى نەوندىق «بىرلىك جۇگىرىسى» ۇيىمداستىرىلدى. ءىس-شاراعا ءتۇرلى ۇلت وكىلدەرىنەن 100-دەن استام ادام قاتىسىپ، ول دوستىقتىڭ، تاتۋلىقتىڭ جانە مادەني الۋاندىقتىڭ جارقىن كورىنىسىنە اينالدى.

الماتى قالاسى سپورت باسقارماسىنىڭ وكىلدەرىنىڭ مالىمەتىنشە، بيىلعى ءىس-شارادا زاماناۋي فورماتقا باسىمدىق بەرىلىپ، تۇرعىنداردى بۇقارالىق سپورتقا كەڭىنەن تارتۋ كوزدەلگەن.

جۇگىرۋ كەشكى ۋاقىتتا ءوتتى: ساعات 21:00-دە باستالىپ، قاتىسۋشىلار نەون جارىقتارى، اۋەن جانە مەرەكەلىك اتموسفەرا اياسىندا قاشىقتىقتى ەڭسەردى. قاتىسۋشىلار جارىق بەرەتىن اكسەسسۋارلار مەن ءتۇرلى ەلەمەنتتەر تاعىپ شىعىپ، زاماناۋي قالالىق ستيل قالىپتاستىردى.

مۋزىكالىق باعدارلاما دا ارتۇرلىلىگىمەن ەرەكشەلەندى. ديدجەي-سەتتە الەم مادەنيەتتەرىنىڭ اۋەندەرى ۇيلەسىم تاۋىپ، بىرلىك رۋحىن ايشىقتاي ءتۇستى. قاشىقتىق بويىندا جانكۇيەرلەردىڭ قولداۋى مەن جۇرگىزۋشىنىڭ جىگەرلەندىرۋى قاتىسۋشىلارعا كۇش بەرىپ وتىردى.

مارە ءساتى ەرەكشە ەستە قالدى: بارلىق قاتىسۋشىعا «1-ورىن» مەدالى تابىستالىپ، بۇل جارىستا جەڭىلگەن جان جوق ەكەنى كورسەتىلدى. ال شاڭىراق پىشىنىندە بەزەندىرىلگەن تۇعىرناما ورتاق ءۇي – قازاقستاننىڭ سيمۆولى رەتىندە ۇسىنىلىپ، ءار ادامنىڭ ءبىرتۇتاس قوعامنىڭ بولشەگى ەكەنىن بەينەلەدى.

ءىس-شارا باعدارلاماسى ەلەكترودومبىرا ۇنىمەن جانە جاساندى ينتەللەكت ەلەمەنتتەرى قولدانىلعان مۋلتيمەديالىق كورسەتىلىممەن تولىقتى. بۇل ءداستۇر مەن زاماناۋي تەحنولوگيالاردىڭ ۇيلەسىمدى توعىسقانىن كورسەتتى.

«بىرلىك جۇگىرىسى» تەك سپورتتىق ءىس-شارا ەمەس، ادامداردى بىرىكتىرەتىن، ءوزارا قۇرمەت پەن قوعامدىق كەلىسىمدى نىعايتاتىن ماڭىزدى الاڭ ەكەنىن دالەلدەدى.