الماتى وبلىسىنا جۇمىس ساپارىمەن كەلگەن قازاقستان رەسپۋبليكاسىنىڭ كولىك ءمينيسترى نۇرلان ساۋرانبايەۆ وبلىس اكىمى مارات سۇلتانعازييەۆپەن بىرگە قونايەۆ قالاسىنداعى تەمىرجول ۆوكزالىن جاڭعىرتۋ جۇمىستارىن كوردى.

ۆوكزال اۋماعىنداعى قۇرىلىستىڭ قارقىندى ءجۇرىپ، بۇگىندە اياقتالۋعا تاياعان. عيماراتتىڭ نەگىزگى كەلبەتى قالىپتاسىپ، ىشكى ارلەۋ مەن ينجەنەرلىك جۇيەلەردى ىسكە قوسۋ جۇمىستارى اتقارىلۋدا. قۇرىلىس الاڭىندا مەردىگەر ۇيىمداردىڭ ماماندارى بەلگىلەنگەن مەرزىمگە ۇلگەرۋ ءۇشىن جۇمىستى جۇيەلى جالعاستىرۋدا.

نىسان باسىندا وتكەن كوشپەلى كەڭەستە وبلىس اكىمدىگى، «قازاقستان تەمىر جولى» ۇق» اق جانە جاۋاپتى مەكەمەلەردىڭ وكىلدەرى جوبانىڭ ورىندالۋ بارىسى جونىندە ەسەپ بەردى.
مامانداردىڭ ايتۋىنشا، بۇگىندە قۇرىلىس-مونتاج جۇمىستارىنىڭ 93 پايىزى اياقتالعان. قازىرگى تاڭدا سىرتقى ەلەكتر جانە گاز جەلىلەرىن قوسۋ، سونداي-اق عيماراتتى جيھازبەن جانە زاماناۋي كەڭسە تەحنيكاسىمەن جابدىقتاۋ جۇمىستارى جۇرگىزىلۋدە.

ۆوكزال عيماراتىنىڭ قابىرعالارى تولىق تۇرعىزىلىپ، شاتىر جابىلعان. سۋ قۇبىرى، كارىز، جىلىتۋ جانە جەلدەتۋ جۇيەلەرى ورناتىلعان. جولاۋشىلار پلاتفورماسىنىڭ قۇرىلىسى دا تولىق اياقتالعان.
جالپى اۋماعى 503،8 شارشى مەتر بولاتىن نىساندى بيىلعى ماۋسىم ايىنىڭ سوڭىنا دەيىن پايدالانۋعا بەرۋ جوسپارلانىپ وتىر.

جيىن بارىسىندا وبلىستاعى وزگە دە تەمىرجول ۆوكزالدارىن جاڭعىرتۋ جۇمىستارى سارالاندى. قازىبەك بەك (ۇزىناعاش) جانە شامالعان ۆوكزالدارىنىڭ دايىندىعى 99 پايىزعا، جەتىسۋ ۆوكزالىنداعى جۇمىستاردىڭ ورىندالۋى 92 پايىزعا جەتكەن.

كولىك ءمينيسترى قۇرىلىس قارقىنىن وڭ باعالاپ، جاۋاپتى مەكەمەلەرگە بارلىق جۇمىستى بەلگىلەنگەن مەرزىمدە اياقتاپ، نىسانداردى ۋاقىتىلى پايدالانۋعا بەرۋدى تاپسىردى. ونىڭ ايتۋىنشا، جاڭعىرتىلعان ۆوكزالدار جولاۋشىلار ءۇشىن قولايلى ءارى ءقاۋىپسىز بولۋى ءتيىس.

ايتا كەتەيىك، مەملەكەت باسشىسىنىڭ تاپسىرماسىنا سايكەس ەلىمىزدە 124 تەمىرجول ۆوكزالىن جاڭعىرتۋعا باعىتتالعان اۋقىمدى باعدارلاما جۇزەگە اسىرىلىپ جاتىر. بۇل باستاما اياسىندا ۆوكزالدار زاماناۋي ينجەنەرلىك جۇيەلەرمەن جابدىقتالىپ، كۇتۋ زالدارى جاڭارتىلىپ، سەرۆيستىك قىزمەت كورسەتۋ ساپاسى جاقسارتىلۋدا. سونىمەن قاتار مۇمكىندىگى شەكتەۋلى ازاماتتاردىڭ كەدەرگىسىز قاتىناۋىنا قاجەتتى جاعدايلار قاراستىرىلعان.

مۇنداي جوبالار ەلىمىزدىڭ كولىك-لوگيستيكالىق الەۋەتىن نىعايتۋعا ىقپال ەتەدى.
قونايەۆتاعى ۆوكزالدىڭ جاڭارۋى دا – وسى باعىتتاعى ماڭىزدى قادامداردىڭ ءبىرى.