الماتىدا ايگىلى مانەرلەپ سىرعاناۋشى الەكسەي ياگۋدين شەبەرلىك ساباعىن وتكىزدى. ال ەرتەڭ جاس سپورتشىلارمەن جەكە شىعارماشىلىق كەزدەسۋ وتكىزبەك.

بۇل باستامانى وسىعان دەيىن دەنيس تەن جۇزەگە اسىرىپ كەلگەن ەدى. ەندى يگى ءداستۇردى ارى قاراي ونىڭ دوستارى جالعاستىرماق. الەكسەي ياگۋدين «حالىق ارەنادا» 30 شاقتى جاس سپورتشىنى توپقا ءبولىپ، 1 ساعاتتان شەبەرلىك ساباقتارىن كورسەتتى. بولاشاقتا باسقا دا ەسىمى ەلگە ايگىلى سپورتشىلار دا كەستە بويىنشا وتكىزەدى دەپ جوسپارلانىپ وتىر.

«ونداي مۇمكىندىك بولسا، مەن بىردەن كەلەمىن. الدىڭعى شەبەرلىك ساباعىن دەنيس تەنمەن بىرگە وتكىزگەنمىن. بۇل مەنىڭ تەك نەگىزگى جۇمىسىم عانا ەمەس، ادامگەرشىلىك تۇرعىداعى بورىشىم دا. قانداي جاعداي بولماسىن، ادام بولىپ قالۋ كەرەك. ءوسىپ كەلە جاتقان جاس سپورتشىلارعا بىلگەنىمدى ۇيرەتكىم كەلەدى. كوكتەمدە رەسەيدە مانەرلەپ سىرعاناۋدى ۇيرەتەتىن ءوز مەكتەبىم دە اشىلىپ قالار. العان ءبىلىمدى ءبولىسۋ دە كەرەك دەپ ويلايمىن»، – دەدى رەسەي سپورتىنىڭ ەڭبەك سىڭىرگەن شەبەرى الەكسەي ياگۋدين.

وسىلايشا، ارىپتەستەرى ەل ماقتانىشى، مانەرلەپ سىرعاناۋشى دەنيس تەننىڭ اردا ەسىمىن ۇمىتتىرماۋدى كوزدەيدى. ەندى كۇزدە «دەنيس جانە ونىڭ دوستارى» شوۋى جالعاسىن تابۋى مۇمكىن. شەبەرلىك ساباعىن وتكىزۋدىڭ وزىندىك قيىندىقتارى بولادى دەيدى ماماندار. ال ماستە- كلاسسقا قاتىسقان شاكىرتتەر كوپ نارسەنى ۇيرەنگەندەرىن ايتادى.