اباي وبلىسىنىڭ اقسۋات اۋدانىندا وتكەن «اسىل بەسىك – اقسۋات» سپورت جانە ونەر فەستيۆالى ءداستۇرلى گالا-كونسەرتپەن قورىتىندىلاندى. ءۇش كۇن بويى ۇلتتىق سپورتتىڭ ءدۇبىرى مەن رۋحانياتتىڭ تاعىلىمىنا كۋا بولعان جۇرتشىلىق فەستيۆالدىڭ سوڭعى كەشىندە ءان مەن ونەردىڭ مەرەكەسىن تاماشالادى.
بۇگىندە رەسپۋبليكا كولەمىندە كەڭىنەن تانىلعان «اسىل بەسىك – اقسۋات» فەستيۆالى ۇلتتىق سپورتتى، ونەر مەن رۋحانياتتى توعىستىرعان بىرەگەي جوباعا اينالدى. بەلگىلى كاسىپكەر، مەسەنات، ASSYLTAS قوعامدىق قورىنىڭ نەگىزىن قالاۋشى، اقسۋات ءوڭىرىنىڭ تۋماسى دۋلات تۇرسىن ۇلى تاستەكەيدىڭ باستاماسىمەن جۇزەگە اسىپ كەلە جاتقان فەستيۆالدىڭ باستى ماقساتى – تۋعان جەردىڭ مەرەيىن ءوسىرۋ، ۇلتتىق قۇندىلىقتاردى دارىپتەۋ جانە جاستاردى ونەر مەن سپورتقا باۋلۋ.
فەستيۆالدىڭ تاريحى 2019 جىلى باستاۋ العان «تۇعىرى بيىك تارباعاتاي» جوباسىنان باستالادى. كەيىن بۇل باستاما جاڭا مازمۇنمەن تولىعىپ، «اسىل بەسىك – اقسۋات» فەستيۆالى رەتىندە جالعاسىن تاپتى. بۇگىندە بۇل جوبا وڭىردەگى عانا ەمەس، ەل كولەمىندەگى ماڭىزدى مادەني-رۋحاني شارالاردىڭ بىرىنە اينالىپ وتىر.
بيىلعى فەستيۆال باعدارلاماسى بۇرىنعىدان دا اۋقىمدى بولدى. اقسۋات تورىندە قازاق كۇرەسىنەن «ASSYL ARLAN» رەسپۋبليكالىق ءتۋرنيرى، توعىزقۇمالاقتان رەسپۋبليكالىق تۋرنير، اۋدارىسپاق جارىسى، «ASSYL TULPAR» بايگەسى ۇيىمداستىرىلدى. سونىمەن قاتار «ارتىق ءبىلىم – كىتاپتا» وبلىستىق كىتاپ وقۋ بايقاۋىنىڭ فينالى وتكىزىلىپ، ۇزدىك كومانداعا اۆتوكولىك تابىستالدى.
فەستيۆالدىڭ قورىتىندى گالا-كونسەرتى ءۇش كۇندىك مەرەكەنىڭ شارىقتاۋ شەگىنە اينالدى. اقسۋاتتىڭ ورتالىق الاڭىنا جينالعان مىڭداعان كورەرمەن تانىمال ونەر جۇلدىزدارىنىڭ ونەرىن تاماشالادى.
كەش شىمىلدىعىن ەرجان ەسەنگەلدى اشىپ، كورەرمەنگە تۋعان جەر مەن ۇلتتىق رۋح تاقىرىبىنداعى اندەرىن ۇسىندى. سونىمەن قاتار ساحنادا سەرىك يساحان، جانار سەرىكبەك قىزى، ساۋلەجان تاقزيا، اسپانبەك شۇعاتاي، قاجىمۇرات شەشەنقۇل، ديدار سەكىلدى ونەرپازدار ونەر كورسەتتى. اسىرەسە تۋعان ولكە تۋرالى اندەر كورەرمەننىڭ ەرەكشە ىقىلاسىنا بولەنىپ، اقسۋاتتىڭ قاسيەتى مەن تارباعاتاي ءوڭىرىنىڭ تاريحىن ءان ارقىلى ورنەكتەدى.
كەشتىڭ ەكىنشى بولىگىندە قازاقستاندىق ەسترادانىڭ تانىمال وكىلدەرى ساحناعا شىقتى. كوپشىلىكتىڭ ىستىق ىقىلاسىنا بولەنگەن ءابدىجاپپار ءالقوجا ءوز شىعارمالارىن ورىنداپ، كورەرمەنمەن ەركىن سىرلاستى. سونداي-اق ايدانا مەدەنوۆا، TURAR، جاسۇلان كوپبەرگەن مەن شۇعىلا ەشەن، Niyazkul، ايبەك سەرىكحانوۆ، BAYANSULU، BYTANAT & MONNY سەكىلدى ونەر يەلەرى فەستيۆال قوناقتارىنا كوتەرىڭكى كوڭىل كۇي سىيلادى.
كونسەرتتىڭ باستى ەرەكشەلىگى – ءار بۋىننىڭ تالعامىن ەسكەرە وتىرىپ جاسالعان باعدارلاماسىندا بولدى. ءبىر ساحنادا ءداستۇرلى ءان مەن زاماناۋي ەسترادا، تۋعان جەر تاقىرىبى مەن جاستار شىعارماشىلىعى ۇندەسىپ، ۇلتتىق ونەردىڭ ساباقتاستىعىن كورسەتتى.
«اسىل بەسىك – اقسۋات» فەستيۆالى سوڭعى جىلدارى تەك سپورتتىق نەمەسە مادەني شارا عانا ەمەس، ەلدىك قۇندىلىقتاردى دارىپتەيتىن ءىرى قوعامدىق جوبا رەتىندە قالىپتاسىپ كەلەدى. ونىڭ باستى ۇرانى – «تۋعان جەرگە تۋىڭدى تىك». بۇل يدەيا فەستيۆالدىڭ بارلىق باعىتى ارقىلى كورىنىس تاۋىپ، تۋعان جەرگە قىزمەت ەتۋدىڭ ۇزدىك ۇلگىسىنە اينالدى.
اقسۋات اسپانىن انگە بولەگەن گالا-كونسەرت فەستيۆالدىڭ جارقىن قورىتىندىسى بولدى. ۇلتتىق سپورتتىڭ ءدۇبىرى، كىتاپتىڭ قۇدىرەتى، ونەردىڭ قۋاتى مەن تۋعان جەرگە دەگەن قۇرمەت توعىسقان ءۇش كۇندىك مەرەكە كورەرمەن جادىندا ۇزاق ساقتالارى ءسوزسىز.
