اتىراۋ وبلىستىق تاريحي-ولكەتانۋ مۋزەيىندە عىلىمي قورعا تاريحي قۇندىلىقتاردى قابىلداۋ ساراپتامالىق كوميسسياسىنىڭ كەزەكتى وتىرىسى ءوتتى. تاريحي-مادەني ءمانى بار جادىگەرلەردى وبلىستىق، اۋداندىق مۋزەيگە قابىلداپ، قوردى تولىقتىرۋ ماقساتىندا وتكەن جيىندا «مەن سىيعا تارتقان جادىگەر» اكسياسىندا، «وتباسىمەن مۋزەيگە» فەستيۆالىندە تۇرعىنداردىڭ سىيعا تارتقان دۇنيەلەرى ساراپقا سالىندى.

ناتيجەسىندە مۋزەي سورەلەرىنەن مەملەكەت جانە قوعام قايراتكەرى س.مۇقاشيەۆتىڭ جەكە قورىندا جيناقتالعان ءتۇرلى تاقىرىپتاعى توسبەلگىلەر جيىنتىعى، 1911 جىلى قازان باسپاسىنان شىققان اراب جازۋىمەن جازىلعان ءدىني كىتاپشا ورىن الدى. ولاردىڭ قاتارىندا 1980 جىلدارى قولدان توقىلعان تۇيە ءجۇن جەمپىر جانە بەلدەمشە، فونار، بىلتەلى شام، «سيريۋس» راديوللاسى، 1957 جىلى توقىلعان الاشا مەن قۇر، شويىن قازان، ءىس ماشيناسى، كەبەجە دە بار. اۋداندىق مۋزەيلەر بولىمشەلەرىنە ۇلى وتان سوعىسىنىڭ ارداگەرى تولەۋ سابىرعالييەۆتىڭ زاتتاي جانە قۇجاتتاي ماتەريالدارى، يساتاي اۋداندىق سپورت مەكتەبىنىڭ كۋبوك، مەدالوندارى ۇسىنىلدى.

«بۇدان باسقا، قازاق كسر-ىنىڭ بالىق ونەركاسىبى حالىق كوميسسارى، قازاق كسر جوعارعى كەڭەسىنىڭ دەپۋتاتى ابىشيەۆ شايحىنىڭ 1958 جىلدارى پايدالانعان تەلەفون اپپاراتى،  قازاقستان كومپارتياسى گۋريەۆ وبلىستىق كوميتەتىنىڭ ەسكەرتكىش تۋى،  ۇلى كۇيشى دينا نۇرپەيىسوۆانىڭ بەينەسى بەينەلەنگەن كىلەمشە، قۇرمانعازى اۋدانىنىڭ ازاماتى مۇحتاسيف بەكتەنوۆتىڭ قۇجاتتاي ماتەريالدارى قابىلداندى. ەندىگى ۋاقىتتا قور بەلگىلى قوعام قايراتكەرى مەللات سابىروۆانىڭ، ق ر حالىق ءارتىسى ءازيدوللا ەسقالييەۆتىڭ، ج.ناجىمەدەنوۆتىڭ، ا.قايۋپوۆانىڭ، ق.تەمىرتاشيەۆتىڭ زاتتاي جانە قۇجاتتاي ماتەريالدارىمەن تولىعادى. جالپى، بيىل بۇگىنگە دەيىن بارلىعى 436 دانا جادىگەر قابىلداندى» دەدى مۋزەي ديرەكتورى راشيدا حاريپوۆا.