ش.سارييەۆ اتىنداعى كوركەمسۋرەت جانە قولدانبالى-ساندىك ونەر مۋزەيىندە قىركۇيەك ايىندا اتىراۋلىقتارعا ەسىگىن ايقارا اشقان «ن.نازاربايەۆ: ءداۋىر، تۇلعا، قوعام» كوشپەلى قور كورمەسىن «اتىراۋ-اقپارات» مەديا سەرىكتەستىگىنىڭ  ۇجىمى دا ارنايى بارىپ تاماشالادى. مەملەكەت باسشىسى نۇرسۇلتان نازاربايەۆتىڭ جوعارى مەملەكەتتىك ناگرادالارىنىڭ بىرەگەي جيناعى، مەملەكەت باسشىلارى جانە وتاندىق اۆتورلار تارتۋ ەتكەن قولتاڭباسى بار كىتاپتار مەن ەلباسىنىڭ شەت تىلدەرگە اۋدارىلعان ەڭبەكتەرىن تاماشالاعان ۇجىم قىزمەتكەرلەرى، كورمەدەن كوپ وي ءتۇيىپ، ەرەكشە اسەر الىپ قايتتى. 

ەلباسى كىتاپحاناسىنىڭ ارحيۆ، كىتاپحانا، مۋزەي قورلارىنىڭ جادىگەرلەرى ۇسىنىلعان كورمە ءتورت نەگىزگى بولىمنەن تۇرادى. «ەلباسى جولى» ءبولىمى قازاقستان رەسپۋبليكاسى تۇڭعىش پرەزيدەنتى – ەلباسى ن.ءا.نازاربايەۆتىڭ ءومىر كەزەڭدەرىنەن سىر شەرتەدى. مۇندا رۋحاني سانانىڭ دامۋى مەن ءداۋىر مازمۇنىن ايشىقتايتىن تاريحي ۇدەرىستەر مەن وقيعالار سيپاتتالادى. ال، «ەلباسى فەنومەنى» بولىمىندە ەلىمىزدىڭ نەگىزىن قالاعان، جاھاندىق كەڭىستىكتە تۇراقتىلىق پەن قاۋىپسىزدىكتىڭ جاڭا يدەيالارىن ەنگىزگەن ەلباسىنىڭ مەملەكەتتىك قۇرىلىم تۇجىرىمداماسىنىڭ قالىپتاسۋى مەن دامۋ تاريحى كورىنىس تاپقان. اتالعان بولىمدە «اتىراۋ-اقپارات» مەدياحولدينگ قىزمەتكەرلەرى سەمەي يادرولىق پوليگونىنىڭ جابىلۋىنان باستاپ، مەملەكەت استاناسىن اۋىستىرۋ يدەياسىن جۇزەگە اسىرۋعا دەيىنگى تاريحي ماڭىزى بار شەشىمدەر، باستامالارمەن ءجىتى تانىستى.

الەمدىك دەڭگەيدەگى ساياساتكەر، مەملەكەت باسشىسى نۇرسۇلتان نازاربايەۆتىڭ بيىك بەدەلى مەن اسقاق ابىرويىنىڭ جەمىسى رەتىندە ەلىمىزدىڭ قارقىندى سىرتقى ساياساتىن ايرىقشا اتاپ ايتۋعا بولادى. بۇل جايىندا «الەم تانىعان ەلباسى» بولىمىندە كورسەتىلەدى. مۇندا ەلىمىزدىڭ كوپۆەكتورلى سىرتقى ساياساتىن ايقىندايتىن ديپلوماتيالىق تارتۋ-تارالعىلار، جەكە جازبالار، ارحيۆتىك ماتەريالدار مەن  مەملەكەت باسشىسىنىڭ ەرەن ەڭبەگىن تانىعان شەتەلدىك مەملەكەت جانە ۇكىمەت باسشىلارىنىڭ جەكە قۇرمەتى رەتىندە بەرىلگەن كادەسىيلار دا بار.

ۇجىم مۇشەلەرى «ەلباسى مارتەبەسى – ەل مارتەبەسى» بولىمىنەن مەملەكەت باسشىسىنىڭ جانە قازاقستان حالقىنىڭ جاھاندىق ۇدەرىستەردىڭ تۇراقتىلىعى مەن وركەندەۋىنە قوسقان ۇلەسى ءۇشىن تابىس ەتىلگەن ەلباسىنىڭ جوعارى مەملەكەتتىك ماراپاتتارىن دا اسا قىزىعۋشىلىقپەن تاماشالادى.

«بالاباقشا تاربيەلەنۋشىلەرىنەن باستاپ، وقۋشىلار مەن ستۋدەنت جاستارعا دەيىن ءتۇرلى ساناتتاعى كەلۋشىلەرگە ارنالعان ەكسكۋرسيالار كورمەنىڭ بارلىق جۇمىس كۇندەرى جۇمىس جاسايدى. جادىگەرلەردى بۇگىنگە دەيىن وتىز مىڭعا جۋىق ادام كەلىپ تاماشالادى»، –  دەيدى ەكسكۋرسيا جۇرگىزۋشىسى دينارا ەسقازييەۆا.

قىزمەتكەرلەر ەلباسىنىڭ تاۋەلسىز قازاقستاننىڭ تاريحي ومىرىندەگى رولىنە اتالعان كورمە ارقىلى تاعى ءبىر مارتە كوز جەتكىزگەندەي بولدى. ونداعى قۇندى جادىگەرلەر مەملەكەت باسشىسىنىڭ بالالىق شاعى مەن بۇگىنگى بيىگى تۋرالى سىر شەرتىپ قانا قويماي، ەل دامۋىنىڭ ايقىن بەت-بەينەسىن اڭعارتىپ تۇرعانداي.

– ەلباسى مەن ەل تاريحى – ەگىز ۇعىم. بۇگىن ءبىز كورمەنى تاماشالاي وتىرىپ، سونى ايقىن اڭعارعاندايمىز. سوندىقتان، مۋزەيدەن كوشپەلى ەلىمىزدىڭ تۇتاس تاريحىنا كۋا بولدىق. قۇندى جادىگەرلەرمەن تانىسىپ، ەرەكشە اسەرگە بولەندىك. اسىرەسە، ەلباسىمىزدىڭ سىن ساعاتتاردا قول قويعان ەلدىڭ تاعدىرىن شەشۋدەگى باستى ءرول اتقارعان قۇجاتتاردىڭ ءتۇپنۇسقاسى، كوپتەگەن فوتو جانە ۆيدەو ماتەريالدارىن ەرەكشە ىقىلاسپەن تاماشالادىق، - دەدى وبلىستىق «پريكاسپييسكايا كوممۋنا» گازەتىنىڭ شولۋشىسى قايرات ساتايەۆ.

– تۇڭعىش پرەزيدەنت مۋزەي قورىندا ساقتالعان جادىگەرلەردىڭ بارلىعى – ءبىزدىڭ تاۋەلسىزدىگىمىزدىڭ تاريحي دەرەگى. اسىرەسە، ۇلت كوشباسشىسىنىڭ شەتەلدەرگە ءىسساپار بارىسىندا جازعان قولجازبالارى، ماڭىزدى شەشىم قابىلدار ساتتەگى ورامدى ويلارى ­– بۇگىنگى ۇرپاققا قۇندى مالىمەت ەكەنى داۋسىز. بىلگەنىمىزدەي، مۋزەيدەگى 11 مىڭنان استام جادىگەر – ەلباسىنىڭ جەكە زاتتارى. كوشپەلى قور كورمەسى سول بايلىعىمىزدى حالىققا تانىستىرىپ، جۇرتشىلىق اراسىندا ناسيحاتتاۋعا وڭ سەپتىگىن تيگىزۋدە، - دەپ ايتتى  وبلىستىق «اتىراۋ» گازەتىنىڭ ءبولىم مەڭگەرۋشىسى ايبوپە سابىروۆا.

– ەلوردامىزعا بارۋعا بارلىق ادامنىڭ مۇمكىندىگى بولا بەرمەيدى، سول سەبەپتى، كورمەنىڭ شالعاي ايماقتارعا شىعىپ، قۇندى جادىگەرلەردىڭ تانىستىرىلۋى ءبىز سەكىلدى جاس ۇرپاق ءۇشىن ماڭىزدى. ءبىز كورگەن جادىگەرلەردىڭ ءبارى ماڭىزدى، قۇندى مالىمەت، دەرەكتەر. كورمەدەن اتىراۋ تۋرالى ارناۋلى ءبولىمدى كورىپ، كەۋدەمىزدى قۋانىش سەزىمى كەرنەدى. ەلباسىمىزدىڭ ماحامبەت باتىردىڭ مەرەيتويىندا قالامىزداعى يساتاي-ماحامبەت ەسكەرتكىشىنىڭ اشىلۋ سالتاناتىندا سويلەگەن ءسوزىن وقىدىق. كورمەگە قويىلعان جادىگەردىڭ بارلىعى دا ءبىزدىڭ ەگەمەن ەل اتانعان جىلدارداعى تاريحي ساتتەردەن سىر شەرتىپ تۇرعانداي، - دەدى «اتىراۋ-اقپارات» ج ش س باسپاحاناسىنىڭ باسپاگەرى ارتۋر قابدولوۆ.