اپكەلەرىنىڭ قازاسى سىڭلىلەرىنە دە اسەر ەتكەن. «ءىنجۋىمنىڭ ولىمىنەن كەيىن ەكى قىزىم قاتتى كۇيزەلىسكە ءتۇسىپ كەتتى»، - دەيدى دينارا بايماعامبەتوۆا. بالالاردىڭ جاعدايى قالاي؟ ءبۇتىن ءبىر وتباسىنىڭ بالالارىن اينالدىرعان نە سىرقات؟ بۇل تۋرالى ەۋرازيا ءبىرىنشى ارناسى حابارلايدى.

قىزىنىڭ قازاسىنان كەيىن ءالى ەس جيناپ ۇلگەرمەگەن دينارا اۋرۋحانامەن ەكى ورتادا شاپقىلاپ جۇرگەنىن ايتادى. 2 جاسار تارعىنى مەن 4 جاستاعى نۇرباقىتى اۋرۋحاناعا ءتۇسىپ قالىپتى. ءقازىر نيەۆرولوگيا بولىمىندە جاتىر ەكەن. بالالاردىڭ سىرقاتىنا ءىنجۋدىڭ ءولىمى قاتتى اسەر ەتتى دەپ وتىر.

«نۇرباقىت ىنجۋدەن كەيىن كۇيزەلىسكە ۇشىرادى. جىلاپ، تۇندە مەنى ۇرىپ، «ءىنجۋدى الىپ كەل، ول ءتىرى، ءتىرى» دەپ قويمايدى. تۇرىپ جىلاي بەرەدى»، - دەيدى مارقۇمنىڭ اناسى دينارا بايماعامبەتوۆا.

تارعىن مەن نۇرباقىت ءقازىر قالالىق بالالار كلينيكالىق اۋرۋحاناسىندا ەم قابىلداپ جاتىر. ولارمەن جۇزدەسۋگە اۋرۋحانا باسشىلىعى رۇقسات ەتپەدى. بالالارعا اكەسى باس-كوز بولىپ وتىر ەكەن.

دارىگەرلەر بالالاردىڭ جاعدايى ورتاشا دەيدى. ەكەۋىنىڭ دە قانى از. ۇيدە اياق-قولدارى قۇرىسىپ، تارتىلىپ قالعان. اق حالاتتىلار وعان نە سەبەپ بولعانىن ءالى انىقتاي الماي وتىر. 

«بالالاردى بىزگە ۋچاسكەلىك نيەۆروپاتولوگ جىبەرگەن. ەكەۋىنىڭ دە اياق-قولى تارتىلىپ، تالماسى ۇستاعان. ءبىراق بىزگە تۇسكەلى ونداي بەلگىلەر بايقالمادى. ءازىر باقىلايمىز. ءتيىستى ەم-دومىن جاساپ جاتىرمىز»، - دەيدى ناتاليا گولوۆىرينا.

♦جەدەل جاردەم 40 مينۋتتا كەلەمىن دەگەنشە كىشكەنتاي قىز ءولدى

ەستەرىڭىزگە سالساق، وسىدان ەكى اپتا بۇرىن 7 جاستاعى ءىنجۋ جانكينا جەدەل جاردەم كۇتىپ جاتىپ، كوز جۇمعان ەدى. جەتكىنشەكتىڭ اناسى بۇعان كەشىگىپ جەتكەن دارىگەرلەردى كىنالادى. كەيىن وبلىستىق دەنساۋلىق ساقتاۋ باسقارماسى جەدەل جاردەمنىڭ 49 مينۋتقا كەشىگىپ جەتكەنىن راستادى. ال وقۋشى قىزدىڭ "مەحانيكالىق اسفيكسيادان" قايتىس بولعانى بەلگىلى بولدى. ءقازىر بولعان وقيعاعا قاتىستى تاۋەلسىز كوميسسيا تەكسەرۋ جۇرگىزىپ جاتىر.