16 جاسار نازيرا قىدىربايەۆا اقتاۋداعى نازاربايەۆ زياتكەرلىك مەكتەبىنىڭ 11-سىنىبىندا وقيدى. جاساندى قول تەحنيكاسى تۋرالى زەرتتەپ جۇرگەنىنە ەكى جىلعا تاياعان. بۇعان ونىڭ مۇمكىندىگى شەكتەۋلى جاندارعا دەگەن قولداۋ نيەتى، قامقورلىعى تۇرتكى بولىپتى.

mangystaumedia.kz مالىمەتىنشە، نازيرا بۇل جوباسى ارقىلى قاراپايىم ءارى قولجەتىمدى قول پروتەزىن جاساپ شىعارۋدى ماقسات ەتكەن. ساۋ قولدىڭ بۇلشىق ەتتەرى جيىرىلعاندا داچيكتەن ميكرو باقىلاۋشىعا سيگنال كەلەدى. ميكروكونتروللەر ونى وڭدەپ، موتورعا باعىتتايدى. كەلگەن سيگنالعا سايكەسىنشە سەرۆوموتور ساۋساقتاردى جۇمىپ نەمەسە اشىپ قيمىل جاسايدى.

جوبانىڭ ەڭ باستى ارتىقشىلىعى — جوبانىڭ ىسكە اسۋىنا قاراجاتتىڭ از جۇمسالاتىنى. بۇل داچيكتەردىڭ باسىم بولىگىنىڭ قولدان جاسالۋىنا بايلانىستى.

-قولى جوق ادامعا زاتتاردى ۇستاۋعا مۇمكىندىك بولسا، قانداي جاقسى! مەن جاساندى قولمەن زاتتاردى الۋعا كومەكتەسەتىن قۇرىلعى جاساۋعا تىرىستىم. بۇل مەنىڭ العاشقى تاجىريبەم. ەگەر تابىستى بولىپ جاتسا، وسىنداي قۇرىلعىلار ارقىلى مۇگەدەكتەرگە كومەك كورسەتۋدى جالعاستىرعىم كەلەدى. بۇل قۇرالدار وتە قاراپايىم جانە ارزان بولۋى كەرەك. ونەرتابىس مۇمكىندىگى شەكتەۋلى جانداردىڭ ءومىرىن جاقسارتۋعا ارنالعان. مۇنى تۋا ءبىتتى جارىم جاندار نەمەسە باقىتسىز جاعدايلار سالدارىنان قولىن جوعالتقان ادامدار قولدانا الادى»،- دەيدى ونەرتاپقىش وقۋشى.

اقاۋى بار قول جاساندى ماتەريالدان جاسالعان مەحانيكالىق قولمەن بىرىكتىرىلەدى. ول بەلگىلى ءبىر سيگنال بەرىلگەن سوڭ، مىقتاپ قىسىلادى. سيگنال سەنسور ارقىلى ساۋ قولعا قوسىلعان قۇرىلعىدان كەلەدى. سەنسورلار ساۋ قولدىڭ بيسەپس جانە تريسەپسىنە ورناتىلىپ، كۇش جۇمساپ جاتقاندا سيگنال بەرۋدى جۇزەگە اسىرادى. قۇرىلعى كومەگىمەن جاساندى قول جۇمىلادى نەمەسە اشىلادى.

نارىققا شولۋ جاساعان ونەرتاپقىش قىز ەلىمىزدە 100 ملن. تەڭگەگە 50-70 ادام پروتەز سالدىراتىنىن ايتادى. شامامەن ءبىر جاساندى قول 2 ملن تەڭگەگە جۋىقتايدى. بۇل قاراپايىم حالىقتىڭ قالتاسىنا اۋىرتپالىق سالاتىنىن ايتادى ول.

«مەنىڭ تاڭداعان ماتەريالدارىمنان ءبىر قول 500 مىڭعا جۋىقتايدى، جوبا ناتيجەسىن بەرسە، 100 مىڭ تەڭگەگە دەيىن تومەندەتۋگە مۇمكىندىك بولادى،- دەيدى نازيرا.

وقۋشىنىڭ جوباسىنا باستاپقى قارجى رەتىندە 2 ملن. 800 مىڭ تەڭگە قاجەت. اتالعان قاراجاتتى تابۋعا كومەكتەسەر جان تابىلسا، جاس ونەرتاپقىش بولاشاعىن وسى كاسىپتى دامىتۋمەن بايلانىستىرماق.