اقتاۋدا 3-4 قاراشا كۇندەرى «ماڭعىستاۋ-ارەنا» سپورت كەشەنىندە دزيۋدودان تۇرار جولدىبايەۆتى ەسكە الۋعا ارنالعان اشىق ازيا كۋبوگى ءوتتى. وندا قازاقستان، قىرعىزستان، گرەكيا، تاجىكستان، موڭعوليا، وزبەكستان جانە گرۋزيادان كەلگەن 100-دەن اسا سپورتشى ب ا ق سىنادى.

تۋرنير 2009 جىلدان بەرى ءداستۇرلى تۇردە ۇيىمداستىرىلىپ كەلەدى.

سايىسقا سپورتتىق جەكپە جەك جانە كۇش قولدانىلاتىن سپورت تۇرلەرى كونفەدەراسياسىنىڭ باس ديرەكتورى، قازاقستان دزيۋدو فەدەراسياسىنىڭ ۆيسە-پرەزيدەنتى ەلدوس رامازانوۆ جانە ازيا دزيۋدو وداعىنىڭ سپورت ديرەكتورى ديەۆيد كارتەر، ماڭعىستاۋ وبلىسى دزيۋدو فەدەراسياسىنىڭ پرەزيدەنتى اسىلبەك جولدىبايەۆ، حالىقارالىق انتيادرولىق «نيەۆادا-سەمەي» قوزعالىسىنىڭ ۆيسە-پرەزيدەنتى سۇلتان كارتويەۆ، قازاقستان دزيۋدو فەدەراسياسىنىڭ باس حاتشىسى اسحات جيتكەيەۆ، قازاقستان دزيۋدو فەدەراسياسىنىڭ اتقارۋشى ديرەكتورى سامات جىلقىبايەۆ، الەم چەمپيوناتىنىڭ جەڭىمپازدارى مەن جۇلدەگەرلەرى ماكسيم راكوۆ، ازامات مۇقانوۆ، وتگونسەسەگ گالبادراح سىندى ەلىمىزدىڭ بەتكە ۇستار دزيۋدوشىلارى قوناق بولدى.

ماڭعىستاۋ وبلىسىنىڭ اكىمى ەرالى توعجانوۆ جارىس الدىندا قاتىسۋشىلارعا ساتتىلىك تىلەپ، وسىنداي ۇلكەن شاراعا جينالعاندارعا العىسىن ءبىلدىردى.

جارىس ناتيجەسىندە قازاقستان قۇراماسى 7 التىن، 10 كۇمىس، 13 قولا جۇلدەنى ەنشىلەپ، 1-ورىنعا جايعاستى. گرەكيا قۇراماسى 4 التىن مەدالمەن 2-ورىن، 1 التىن، 1 كۇمىس جۇلدەمەن تاجىكستان قۇراماسى ۇشتىكتى قورىتىندىلادى.

اشىق ازيا كۋبوگى ليسەنزيالىق تۋرنير بولعاندىقتان، جەڭىمپازدار مەن جۇلدەگەرلەرگە رەيتينگتىك ۇپايلار بەرىلەدى. ءبىرىنشى ورىن يەگەرىنە الەم رەيتينگىندە 100 ۇپاي، ەكىنشى ورىن العاندار – 60 ۇپاي، ءۇشىنشى ورىن العاندار 40 ۇپاي بەرىلەدى.