ق ر ەنەرگەتيكا ءمينيسترى قانات بوزىمبايەۆ ورىنباسارى اناتوليي شكارۋپانىڭ ۇستالعانىن رەسمي حابارلادى.
«ءيا. اناتوليي شكارۋپانىڭ ۇستالعانىن بىلەمىن»، - دەدى بوزىمبايەۆ دۇيسەنبىدە وتكەن ۇكىمەت وتىرىسىندا.
سونىمەن قاتار بوزىمبايەۆتىڭ ايتۋىنشا، شكارۋپانىڭ قىزمەتىنەن كەتۋ تۋرالى ءوتىنىش حاتى ءتيىستى ورگاندارعا جىبەرىلدى.
«مۇنىڭ ءبارى وتكەن اپتادا بولعان. ايتىپ تۇرمىن عوي. ءتيىستى ءوتىنىش حاتتى مينيسترلىكتىڭ كانسەليارياسىنا دا، پرەزيدەنت اكىمشىلىگىنە دە جىبەردىم»، - دەپ ءسوزىن قورىتىندىلادى مينيستر.
ەسكە سالا كەتەيىك، مەملەكەت باسشىسىنىڭ قاتىسۋىمەن وتكەن قاۋىپسىزدىك كەڭەسى بارىسىندا ق ر باس پروكۋرورى قايرات قوجامجاروۆ ەنەرگەتيكا ۆيسە-مينيسترى شكارۋپاعا قاتىستى نارازىلىعى بارىن ەسكەرتكەن.
«جۋىردا عانا ەنەرگەتيكا ۆيسە-مينيسترى بولىپ تاعايىندالعان شكارۋپاعا قاتىستى نارازىلىق تۋىنداپ وتىر. وعان 2015 جىلى ساران قالاسىندا جىلۋى جوق اۋداندارعا گاز جىبەرۋ ءۇشىن بولىنگەن 215 ميلليون تەڭگە اقشانى جىمقىردى دەگەن ايىپ تاعىلعان. ىسكە بايلانىستى قىلمىستىق تەرگەۋ باستالدى»، - دەگەن ەدى قوجامجاروۆ.
